RSS Plans for BJP: भाजपसाठी RSS महाराष्ट्राच्या मैदानात, हरियाणापेक्षा वेगळी रणनीती; 'मविआ'ची कोंडी होणार?

Mumbai News: विधानसभा निवडणुकीचा घमासान सुरू आहे. विजयाचे महायुती आणि महाविकास आघाडीकडून दावे केले जात आहे. लोकसभा निडवणुकीत प्रचारापासून लांब राहिलेली राष्ट्रीय स्वयंसेवक संघ यावेळी महाराष्ट्रात भाजपसाठी मैदानात उतरला आहे.

मतदानासाठी अवघे सहा दिवस राहिले असतानाच, संघाकडून विशेष बूथ शक्तीकरणाची तयारी केली गेली आहे. संघाने या उतरलेल्या दिवसात जास्तीत जास्त लोकांपर्यंत पोचण्याचे नियोजन केले आहे.

राष्ट्रीय स्वयंसेवक संघाने (RSS) महाराष्ट्रात मतदारांपर्यंत पोचण्यासाठी विदर्भ, देवगिरी, पश्चिम महाराष्ट्र आणि कोकण या चार प्रातांत प्रचाराची रणनीती आखली आहे. यात सर्वाधिक जबाबदारी प्रांताधिकाऱ्यांची असणार आहे. प्रत्येक प्रांताधिकाऱ्याकडे दोन विधानसभांची जबाबदारी असणार आहे.

राष्ट्रीय स्वयंसेवक संघाने या रणनितीत विभागातील वेगवेगळ्या प्रमुखांना वेगवेगळी जबाबदारी दिली आहे. विभागातील दोन पदाधिकाऱ्यांना एका विधानसभेची जबाबदारी देण्यात आली आहे. यानुसार प्रत्येक विधानसभेत संघाचे तीन पदाधिकारी उपस्थित राहून काम मतदारपर्यंत (Voter) पोचण्याचे नियोजन असणार आहे. हे तिन्ही पदाधिकारी भाजप आणि सर्व सहयोगी संघटनांशी समन्वयक साधण्यासाठी रणनीती, तर बनवतीलच, पण बूथ स्तरावर नाराज आणि निष्क्रिय स्वयंसेवकांना एकत्र करण्याचे काम करतील.

बूथ रचनेवर सर्वाधिक लक्ष संघाच्या नेमलेल्या पदाधिकाऱ्यांचे असणार आहे. बूथ चार गटात विभागाले आहे. याला 'अबकड', अशी विभागणी केली आहे. 'अ' आणि 'ब'मध्ये बूथ सकारात्मक ठेवून तिथं, 100 टक्के मतदान घडवून आणण्याचे नियोजन संघाने केले आहे. तसेस भाजपशिवाय प्रत्येक बूथवर दोन टीम मतदारांना मतदान केंद्रापर्यंत घेऊन जाण्याचे काम करतील. 'क' गटात इथं पूर्वीपेक्षा जास्त दहा ते पंधरा टक्के मते वाढवण्यावर भर दिला जाणार आहे. तर नकारात्मक झोनमध्ये 'ड' गटासाठी विशेष रणनीती आखण्यात आली आहे.

लोकसभा निवडणुकीतील मतदानावर संघाकडून काही निरीक्षणं नोंदवली गेली आहेत. याचा अभ्यास करून लोकसभेत जैन आणि मारवाडी मतदारांनी नोटा मतदानावर अधिक भर दिल्याचे संघाच्या निरीक्षणात समोर आले. यावेळी तसं होऊ नये म्हणून या दोन्ही समाजातील प्रमुख लोकांच्या गाठीभेटीवर लक्ष असणार आहे. जातीय राजकारणाला गती मिळू नये, यासाठी संघ विशेष काळजी घेताना दिसतो आहे. यामुळे संघाने विविध जाती-समुदायातील प्रमुख व्यक्तींच्या गाठीभेटीवर भर दिला आहे.

हरियाणात काँग्रेसचे सरकार येणार असे भाकीत होते. परंतु तिथं धक्कादायक निकाल लागला अन् भाजप विजयी झाला. यामागे संघाचे सूक्ष्म नियोजन असल्याचे मानले जाते. राष्ट्रीय स्वयंसेवक संघ बूथ स्तरावर 50-50 युवा परिषदा आणि महिला माता परिषदा आयोजित करत आहे. परंतु हरियाणाची महाराष्ट्राशी तुलना करणे योग्य ठरणार नाही, असे संघ म्हणतो.

महाराष्ट्र हे खूप मोठे राज्य आहे आणि इथली राजकीय आणि सामाजिक परिस्थिती पूर्णपणे वेगळी आहे. त्यामुळे संघाने इथं वेगळ्या पद्धतीने जनजागृतीवर भर दिला आहे. यात वेगवेगळ्या रणनीतीचे आखण्यात आल्या आहेत.