Maharashtra Political Updates : मुंबईतील उमेदवारांना प्रत्येकी 5 कोटी देण्याची कामगिरी शिंदेंच्या पक्षाने बजावली, राऊतांचा गंभीर आरोप

मुंबईसह राज्यातील 29 महापालिका निवडणुकीच्या निकालावरून ठाकरेंच्या शिवसेनेचे खासदार संजय राऊत यांनी आपल्या रोखठोक या सामनातील सदरातून भाजप आणि एकनाथ शिंदेंच्या शिवसेनेवर हल्लाबोल केला आहे. या सर्व महापालिकांच्या निवडणुकीत हरामाचा पैसा वापरला आणि सत्तेतल्या तिन्ही पक्षांकडे हा पैसा होता. आणि याच भ्रष्ट पैशांवर भाजपने मुंबई अदानींच्या घशात घातली, अशा शब्दात राऊतांनी सत्ताधाऱ्यांवर प्रहार केला आहे. महापालिका निवडणुकीत शिंदे व त्यांच्या लोकांकडे ‘कॅश’ म्हणजे रोखीची चणचण भासली व फडणवीस यांना तेच हवे होते. हे खरे असले तरी मुंबईतील त्यांच्या उमेदवारांना प्रत्येकी 5 कोटी व इतर महानगरपालिकांत 2 कोटी देण्याची कामगिरी शिंदे यांच्या पक्षाने बजावली. मुख्यमंत्र्यांनी 40 हजार कोटींची कामे थांबवली ही शिंदे यांच्या आर्थिक उलाढालीतील लहान घटना आहे. महाराष्ट्राच्या राजकारणातही आता अमली पदार्थांच्या व्यवहाराचा पैसा पसरला आहे. याच पैशांनी ‘मतदार’ विकत घेतला जातो. हे सर्व भयंकर आहे. नशेच्या गोळ्या व नशेचा पैसा सत्ताधारी घरापर्यंत पोहोचवत आहेत. मग आता राहिले काय? असा सवाल राऊतांनी उपस्थित केला आहे.

वसंतदादाचे पणतू, माजी केंद्रीय मंत्री प्रतीक पाटील यांचे चिरंजीव आणि खासदार विशाल पाटील यांचे पुतणे हर्षवर्धन पाटील वयाच्या अवघ्या 23 व्या वर्षी नगरसेवक बनले आहेत. सांगली मधील प्रभाग 11 मधून ते विजयी झाले आहेत.

काश्मीरचे मुख्यमंत्री ओमर अब्दुलला आज मुंबई दौऱ्यावर येणार आहेत. ते टाटा मुंबई मॅरेथॉन २०२६ मध्ये सहभागी होणार आहेत.

अमरावतीत भाजप सध्या युवा स्वाभिमान सोबत जाणार असल्याचं चित्र असलं तरी बहुमताचा आकडा 44 आहे. भाजप आणि युवा स्वाभिमानच्या जागा मिळून 40 होत आहेत. त्यामुळे महापौरपदासाठी अजून 4 जागांची गरज आहे. तर दुसरीकडे काँग्रेसने मित्रपक्षांना सोबत घेऊन महापौर बसवण्याचा तयारीत असल्याचं सांगितलं जात आहे.