Balasaheb Thorat : निवडणूक आयोगाची प्रेस; थोरात म्हणाले, 'जनतेच्या पैशातून महायुती सरकारचा राजकीय प्रोपोगंडा'

Mumbai News : महाराष्ट्रातील विधानसभा निवडणुकीच्या तारखा निवडणूक आयोगाने काही वेळातच जाहीर करणार आहे. तत्पूर्वी काँग्रेसचे नेता माजी मंत्री आमदार बाळासाहेब थोरात यांनी महाविकास आघाडीच्या जागाबाबत मोठं विधान केलं आहे.

"निवडणुका होतील की नाही, असा संभ्रम असतानाच जनतेच्या पैशातून महायुती सरकारने राजकीय प्रोपोगंडा करून घेतला. असू देत, पण महाविकास आघाडीची निवडणुकीची तयारी पूर्ण असून, जागा वाटप देखील फायनल होत आलं आहे आणि महाराष्ट्रात सत्ता परिवर्तन होईल", असे बाळासाहेब थोरात यांनी म्हटलं आहे.

महाराष्ट्रातील विधानसभा निवडणुका (Elelction) होणार नाही, असं महाविकास आघाडीतील दिग्गज नेते सुरवातीला सांगत होते. यातच हरियाणा आणि जम्मू-काश्मीरच्या निवडणुका झाल्या. निकाल लागले. महाराष्ट्र आणि हरियाणा राज्याच्या निवडणुकीत नेहमी बरोबर होतात. परंतु यावेळी असं झालं नाही. त्यामुळे महाराष्ट्रात निवडणुका होणार नाही, असे वाटत होते. मविआच्या नेत्यांनी यावरून केंद्र, राज्य आणि निवडणूक आयोगाला लक्ष्य केले होते.

काँग्रेसचे नेते माजी मुख्यमंत्री पृथ्वीराज चव्हाण, माजी मंत्री आमदार बाळासाहेब थोरात (Balasaheb Thorat) यांच्यासह प्रमुख नेत्यांनी महाराष्ट्रात राष्ट्रपती राजवट लागू शकते असे भाकीत वर्तवले होते. यातच हरियाणाच्या निवडणुकीचा जाहीर झाल्यानंतर केंद्रीय निवडणूक आयोगाचे पथक महाराष्ट्र दोन दिवसांच्या दौऱ्यावर आले. या दौऱ्यानंतर त्यांनी मुंबईत पत्रकार परिषद घेतली आणि राज्याच्या विधानसभेची मुदत संपण्यापूर्वी निवडणूक होईल, असे सांगितले.

निवडणूक आयोग आज दुपारी दिल्लीत पत्रकार परिषद घेऊन महाराष्ट्र आणि झारखंड राज्यातील निवडणुकांविषयी घोषणा करणार आहे. तत्पूर्वी बाळासाहेब थोरात यांनी निवडणुकांविषयी, मविआच्या जागा वाटपाविषयी आणि राज्यातील सत्ता परिवर्तनावर भाष्य केले.

बाळासाहेब थोरात नेमकं काय म्हणाले

"राज्यात निवडणूक प्रक्रिया होत आहे. संदिग्धता होती की, निवडणूक होणार की नाही, ही निवडणूक त्यांनी खूप पुढं नेली. सरकारने या कालावधीत जनतेच्या पैशातून राजकीय प्रोपोगंडा करून घेतला. असे असले, तरी महाविकास आघाडीने निवडणुकीची तयारी पूर्ण केली आहे. जागा वाटप देखील या आठवड्यात पूर्ण होणार आहे. तसंच महाराष्ट्रात सत्ता परिवर्तन होईल", असा दावा देखील बाळासाहेब थोरात यांनी केला.