Karad Politics : कराड दक्षिणमध्ये काँग्रेसचे अस्तित्व धोक्यात, उंडाळकरांच्या राष्ट्रवादीतील प्रवेशामुळे अडचण

संभाजी थोरात

Congress Politics : काँग्रेसचा बालेकिल्ला म्हणून ओळखल्या जाणाऱ्या कराड दक्षिण मतदार संघात काँग्रेस नेते उदयसिंह पाटील उंडाळकर यांनी राष्ट्रवादी काँग्रेसमध्ये प्रवेश केल्याने काँग्रेसचे अस्तित्व धोक्यात आले आहे. माजी मुख्यमंत्री पृथ्वीराज चव्हाण यांचे राजकीय वारस म्हणून ओळखल्या जाणाऱ्या उंडाळकर यांनीच काँग्रेसला रामराम केल्याने काँग्रेस कार्यकर्त्यामध्ये अस्वस्थता आहेत.

राज्याची स्थापना झाल्यापासून कराड दक्षिण विधानसभा मतदारसंघावर काँग्रेसचे वर्चस्व असलेल्या या मतदारसंघाचे नेतृत्व यशवंतराव मोहिते, विलासराव पाटील उंडाळकर आणि पृथ्वीराज चव्हाण यांच्यासारख्या दिग्गज नेत्यांनी केले. 2024 विधानसभा निवडणुकीत भाजपाच्या डॉ. अतुल भोसले यांनी तब्बल 39 हजार मतांच्या फरकाने पृथ्वीराज चव्हाण यांचा पराभव केला आणि काँग्रेसची परंपरा खंडीत केली.

विधानसभा निवडणुकीनंतरही काँग्रेसची पडझड सुरच आहे. माजी जिल्हा परिषद सदस्य शंकरराव खबाले, मलकापूर नगरपालिकेचे माजी नगरसेवक प्रशांत चांदे या दोन दिग्गजांनी काँग्रेसला रामराम करून भाजपात प्रवेश केला. 2024 विधानसभा निवडणुकीत पृथ्वीराज चव्हाण यांचे प्रमुख शिलेदार असलेल्या उदयसिंह पाटील यांच्याकडे 2029 च्या विधानसभा निवडणुकीत काँग्रेसचे उमेदवार म्हणून बघितले जात होते. तेच चव्हाण यांचे राजकीय वारस असतील असे चित्र होते.

मात्र स्वतः उदयसिंह पाटील यांनीच जोरदार शक्तीप्रदर्शन करत उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये प्रवेश केला त्यामुळे अगोदरच अडचणीत असलेल्या काँग्रेसमध्ये विभाजन झाले. काँग्रेसचा बालेकिल्ला म्हणून ओळखल्या जाणाऱ्या मलकापूर नगरपालिकेतही भाजपाच्या बांधणीमुळं काँग्रेस अडचणीत आली आहे. मलकापूरचे नेते मनोहर शिंदे यांच्या अडचणीत वाढ झाली आहे. अवघ्या दोन वर्षात झालेल्या घडामोडीमुळं 1953 पासून केंद्र आणि राज्यातील उच्चपदे भूषवलेल्या चव्हाण परिवाराची बिकट अवस्था झाली आहे.