HSRP Number : फक्त एकचं दिवस शिल्लक! 10,000 रुपयांचा दंड टाळायचा असेल, तर आजच करा 'हे' काम!

High Security Registration Plate : राज्यातील सर्व वाहनधारकांसाठी एक अत्यंत महत्त्वाची आणि तातडीची माहिती समोर आली आहे. राज्य सरकारने सर्व वाहनांना एचएसआरपी म्हणजेच 'हाय सिक्युरिटी रजिस्ट्रेशन प्लेट' बसवणे बंधनकारक केले आहे. ही नंबरप्लेट बसवण्यासाठी आता केवळ एकच दिवस उरलेला आहे. ज्यांनी अजूनही आपल्या वाहनावर एचएसआरपी नंबरप्लेट बसवलेली नाही, त्यांनी तात्काळ नोंदणी करून ही प्रक्रिया पूर्ण करणे आवश्यक आहे. अन्यथा मोठ्या दंडाला सामोरे जावे लागू शकते.

परिवहन विभागाकडून मिळालेल्या माहितीनुसार, 1 एप्रिल 2019 पूर्वी नोंदणीकृत असलेल्या सर्व वाहनांना एचएसआरपी नंबरप्लेट बसवणे सक्तीचे आहे. यासाठी आतापर्यंत अनेक वेळा मुदतवाढ देण्यात आली होती. तरीही राज्यातील मोठ्या संख्येने वाहनधारकांनी अद्याप ही प्रक्रिया पूर्ण केलेली नाही. सध्या राज्यात सुमारे 40 लाखांहून अधिक वाहने अशी आहेत, ज्यावर अजूनही एचएसआरपी नंबरप्लेट लावलेली नाही.

मुदत संपल्यानंतरही जर वाहनावर एचएसआरपी नंबरप्लेट नसेल, तर संबंधित वाहनधारकावर दंडात्मक कारवाई केली जाणार आहे. काही प्रकरणांमध्ये हा दंड थेट 10,000 रुपयांपर्यंत जाऊ शकतो. त्यामुळे वाहनधारकांमध्ये सध्या मोठी चिंता पाहायला मिळत आहे. एवढ्या कमी वेळेत सर्व वाहनांना नंबरप्लेट बसवणे शक्य नसल्याने पुन्हा एकदा मुदतवाढ मिळण्याची शक्यता वर्तवली जात असली, तरी याबाबत अद्याप कोणतीही अधिकृत घोषणा झालेली नाही.

राज्यात सुमारे 1 कोटी वाहनधारकांनी आधीच एचएसआरपी नंबरप्लेट बसवली आहे. मात्र अजूनही सुमारे 35 टक्के वाहने या प्रक्रियेपासून दूर आहेत. त्यांच्यासाठी 31 डिसेंबरपर्यंतची अंतिम मुदत देण्यात आली आहे. या मुदतीनंतरही नियमांचे पालन न केल्यास प्रत्येकवेळी 1000 रुपयांपर्यंत दंड आकारला जाऊ शकतो.

तसेच, मूळ एचएसआरपी नंबरप्लेट बसवून नंतर पुन्हा फॅन्सी किंवा वेगळी नंबरप्लेट लावल्यास 500 रुपयांचा अतिरिक्त दंड ठोठावला जाईल. हा दंड वारंवार नियमभंग केल्यास वाढत जाणार आहे. त्यामुळे कोणताही आर्थिक फटका टाळायचा असेल, तर वाहनधारकांनी आजच अधिकृत वेबसाइटवर जाऊन एचएसआरपी नंबरप्लेटसाठी नोंदणी करून ही प्रक्रिया पूर्ण करावी.