crime news : कल्याणमध्ये धक्कादायक प्रकार! ई-केवायसीच्या नावाखाली महिलेचा फोन घेतला अन् अश्लील मेसेज आणि व्हिडिओ

kalyan crime news : लाडकी बहिण योजनेच्या केवायसी करण्याच्या नावाखाली महिल्यांची लूट होण्याच्या तक्रारी समोर आल्या होत्या. तोच काही दिवसांच्या आधी एका एजंटने ई-केवायसी करून देण्यासाठी महिलेकडे शरीर सुखाची मागणी केली होती. या घटनेनं राज्यभर संतापाची लाट उसळली होती. अद्याप हे प्रकरण चर्चेतून जात नाही तोच कल्याणमध्ये आणखी एक धक्कादायक प्रकार उघडकीस आला आहे. येथे एका खाजगी एजंटने महिलेच्या नावाने बनावट इंस्टाग्राम अकाउंट तयार करून अश्लील मेसेज आणि व्हिडिओ इतरांना पाठवल्याचा घृणास्पद प्रकार समोर आला आहे. यानंतर आता पोलिसांनी गुन्हा दाखल करून तपास सुरू केला.

राज्यात एकीकडे लाडक्या बहि‍णींसाठी राज्य सरकार मोठं मोठ्या घोषणा करत आहे. तर दुसरीकडे याच लाडक्या बहि‍णींना लुटण्यासह त्यांच्याकडे शरीर सुखाची मागणी केली जात आहे. या घटनांमुळे राज्यातील लाडक्या बहिणी दबावाखाली असतानाच आता पुन्हा एका खाजगी एजंटने धक्कादायक आणि घृणास्पद प्रकार केला आहे. रूतिक खंडारे असे त्याचे नाव असून त्याने महिलेच्या नावाने बनावट इंस्टाग्राम अकाउंट तयार करून अश्लील मेसेज आणि व्हिडिओ इतरांना पाठवल्याचे उघड झाले आहे.

रूतिक खंडारे याच्यावर पोलिसांनी गुन्हा दाखल केला असून पुढे तपास सुरू आहे. पण धक्कादायक बाब म्हणजे हा घृणास्पद प्रकार करणाऱ्याला पोलिसांनी नोटीस देऊन सोडून दिल आहे. यामुळे आता पोलिसांच्या कर्तव्यावरच प्रश्न उपस्थित केले जात आहेत. याबाबत मिळालेली माहिती अशी की, कल्याणमधील मोहने परिसरातील एका महिलेला लाडकी बहिण योजनेअंतर्गत पैसे येत नव्हते. चौकशी केल्यानंतर केवायसी न झाल्यामुळे पैसे येत नसल्याचे तिला समजले.

दरम्यान परिसरातील काही लोकांच्या सांगण्यावरून तिने रूतिक खंडारे नावाच्या व्यक्तीशी संपर्क साधला. जो ई-केवायसी करून देतो अशी माहिती देण्यात आली होती. त्याप्रमाणे संबंधित महिलेने केवायसी करण्यासाठी रूतिक खंडारे याच्याशी संपर्क साधला. यावेळी खंडारे याने केवायसीसाठी आवश्यक कागदपत्रे आणि एक हजार रुपये घेतले. तसेच ओटीपी प्रक्रियेसाठी महिलेचा मोबाईल देखील काही वेळासाठी स्वतःकडे ठेवून घेतला. मात्र, काही दिवस उलटल्यानंतरही केवायसी पूर्ण झाली नाही आणि महिलेला पैसे मिळाले नाहीत.

यामुळे संबंधित महिलेने हा विषय मनावर घेतला नाही पण काही दिवसांनी संबंधित महिलेपाशी एक व्यक्ती येऊन तक्रार करू लागला. तसेच तिच्या नावाच्या इंस्टाग्राम अकाउंटवरून त्याला अश्लील मेसेज आणि व्हिडिओ पाठवले जात असल्याची तक्रार केली. ही धक्कादायक बाब ऐकून ती महिला चक्रावलीच. कारण तिला इंस्टाग्रामबद्दल काहीही माहितीही नव्हती.

यानंतर संबंधित महिलेने या प्रकरणी खडकपाडा पोलिस ठाण्यात जावून तक्रार देत घडलला सर्व प्रकार सांगितला. ज्यानंतर रूतिक खंडारे याच्याविरोधात पोलिसांनी गुन्हा दाखळ करून घेतला. सध्या पोलिस पुढील तपास करत आहेत. या प्रकरणात खंडारे याला नोटीस देण्यात आली आहे.

FAQs :

1. या प्रकरणात नेमका काय प्रकार घडला
महिलेच्या नावाने बनावट इंस्टाग्राम अकाउंट तयार करून अश्लील मेसेज पाठवले गेले

2. हा प्रकार कशाशी संबंधित आहे
लाडकी बहिण योजनेच्या केवायसी प्रक्रियेशी संबंधित आहे

3. पोलिसांनी काय कारवाई केली
गुन्हा दाखल करून तपास सुरू केला आणि आरोपीला नोटीस दिली

4. आरोपी कोण आहे
केवायसी करणारा खाजगी एजंट असल्याचे सांगितले जाते

5. या प्रकारातून काय शिकायला मिळते
ऑनलाइन माहिती देताना सावधगिरी बाळगणे आवश्यक आहे