Ravindra Chavhan : सिंधुदुर्गमध्ये तणाव शिगेला! निलेश राणेंवर गुन्हा दाखल होताच रवींद्र चव्हाणांचा युटर्न; म्हणाले,“मी असं काही बोललोच नाही”

Sindhudurg News : सिंधुदुर्ग जि्ल्ह्यातील नगरपरिषद निवडणुकीच्या पार्श्वभूमीवर जोरदार राजकीय वातावरण तापले असतानाच शिंदेंच्या शिवसेनेचे आमदार निलेश राणे यांनी स्टिंग ऑपरेशन करत खळबळ उडवून दिली. ज्यानंतर आता भाजप कार्यकर्त्यांच्या घरात बळजबरी घुसने त्यांना महागात पडले असून त्यांच्यावर गुन्हा दाखल झाला आहे. यावरून आता भाजप-शिवसेना आमने-सामने आली आहे. जिल्ह्यात यावरून वाद होण्याची शक्यता असतानाच भाजपचे प्रदेशाध्यक्ष रवींद्र चव्हाण यांनी कोल्हापुरात यावर प्रतिक्रिया न देताच अंग काढले आहे.

जिल्ह्यातील नगरपरिषद निवडणुकीच्या पार्श्वभूमीवर येथे राजकीय हालचाली वाढल्या असून मेळावे, सभा आणि प्रचाराने वातावरण तापण्यास सुरूवात झाली आहे. अशातच आमदार निलेश राणे यांनी भाजप कार्यकर्त्याच्या घरी धाड टाकून पैसांचा भांडाफोड केला. यानंतर जिल्ह्यासह राज्यभर खळबळ उडाली होती.

यावरून निलेश राणे यांनी, जर पैसे वाटून उमेदवार निवडून आला तर तो नगरपालिका लुटेल, ज्यामुळे नगरपालिका दिवाळखोरीत जाईल यासाठी हा प्रकार रोखण्याचा आमचा प्रयत्न असल्याचे म्हणत रवींद्र चव्हाणच हे सगळं घडवून आणत असल्याची टीका केली होती. ज्यानंतर भाजपने देखील यावर पलटवार करत त्यांचे आरोप फेटाळून लावले होते.

तर रवींद्र चव्हाण यांनी आपल्याला ही युती २ तारखेपर्यंत टिकवायची आहे असे म्हणत मित्र पक्षांनाच धमकी दिली होती. ज्यानंतर निकाल लागताच राज्यात राजकीय भूकंप होईल अशी शक्यता वर्तवली जात होती. तसेच रवींद्र चव्हाण यांनी निलेश राणेंवर टीका करताना तेही आता काँग्रेस प्रमाणेच वागतायत असा हल्लाबोल केला होता.

पण आज घरात घुसून स्टिंग ऑपरेशन करणाऱ्या निलेश राणेंवरच गुन्हा दाखल करण्यात आला असून निलेश राणे यांनी पुन्हा एकदा यासाठी भाजपलाच जबाबदार धरले आहे. यावरून रवींद्र चव्हाण यांनी प्रतिक्रिया दिली आहे. त्यांना पत्रकारांनी निलेश राणेंवर केलेल्या टीकेबद्दल विचारले असता, त्यांनी निलेश राणे काँग्रेस प्रमाणे वागत असल्याचे आपण बोललो नाही, तसे वक्तव्य केलेलं नाही, तुम्हीच हे कोठून ऐकलात असे म्हटलं आहे.

तसेच निलेश राणेंवर गुन्हा दाखल झाल्यावर प्रतिक्रिया न देता त्यांनी अंग काढले आहे. यावेळी त्यांनी राज्यभर 88 ठिकाणी स्थानिक स्वराज्य संस्थांच्या निवडणुका होत असून जेथे भाजपचे नगराध्यक्ष उमेदवार निवडणुकीत उभे आहेत. जे विजयी होणार असून तिथे आम्हाला चांगले यश मिळणार असल्याचा दावा व्यक्त केला आहे. पण त्यांनी यावेळी निलेश राणेंवर बोलणं टाळल्याचे समोर आले आहे.

FAQs :

1. निलेश राणेंवर गुन्हा का दाखल झाला?

भाजप कार्यकर्त्याच्या घरात जबरदस्ती घुसून स्टिंग ऑपरेशन केल्याचा आरोप झाल्याने त्यांच्यावर FIR दाखल झाला.

2. हा वाद कोणत्या निवडणुकीशी संबंधित आहे?

सिंधुदुर्ग जिल्ह्यातील नगरपरिषद निवडणुकीच्या पार्श्वभूमीवर हा वाद तीव्र झाला.

3. रवींद्र चव्हाण यांनी नेमकी काय प्रतिक्रिया दिली?

त्यांनी निलेश राणेंवर टीका केल्याचे वृत्त चुकीचे असल्याचे सांगत, “मी असं काही बोललोच नाही” असे स्पष्टीकरण दिले.

4. भाजप – शिवसेना तणाव वाढण्याचे कारण काय?

राणे स्टिंग प्रकरण, घरात घुसल्याचा आरोप आणि FIR यामुळे दोन्ही पक्षांमध्ये तणाव वाढला.

5. या प्रकरणाचा निवडणुकांवर परिणाम होईल का?

होय, जिल्ह्यात वातावरण तापले असून राजकीय समीकरणांवर याचा थेट परिणाम होऊ शकतो.