पुण्यातील सामाजिक कार्यकर्ते विद्यानंद बापट यांनी ध्वनीप्रदुषणावरून रान पेटवलं आहे. याच पार्श्वभूमीवर पुणे पोलिसांनी 150 गणेश मंडळांना लक्ष्मी रस्त्यावरून मिरवणुकीला परवानगी नाकारल्याची माहिती समोर येत आहे. यावरूनच माजी आमदार व शिवसेना नेते रवींद्र धंगेकर यांनी आक्रमक पवित्रा घेत मंगळवारी रात्री संबंधित गणेश मंडळांसह पोलीस अधिकाऱ्यांची भेट घेणार असल्याचं म्हटलं आहे.
भाजपाचे नेते आणि आमदार प्रसाद लाड यांनी दिशा सालियान प्रकरणावर महत्त्वपूर्ण विधान केलं आहे. ते म्हणाले, मुंबई हायकोर्टाने दिशा सालियान मृत्यू प्रकरण हे सीबीआयकडे वर्ग केले आहे. त्याच्यात ज्या ज्या आरोपींची त्यांची नावं आहेत, त्यांची चाैकशी करून त्याचा अहवाल देण्यास सांगितल्याची माहिती लाड यांनी दिली आहे.
महाराष्ट्राच्या ज्येष्ठ लावणीसम्राज्ञी शकुंतलाताई नगरकर यांचं मंगळवारी (ता.22 सप्टेंबर 2026) 66 व्या वर्षी निधन झालं. नगरकर यांच्या निधनानं लोककलेच्या क्षेत्रात मोठी पोकळी निर्माण झाली आहे. राज्य सरकारसह विविध संस्थांनी त्यांचा 'शाहीर पठ्ठे बापूराव पुरस्कार','नाट्य गौरव पुरस्कार', 'मुंबई महापौर' पुरस्कार देऊन गौरव केला होता.
स्पीकर लावताना आता परवानगीची गरज असणार आहे. तसेच अनामत रक्कमही भरावी लागणार आहे. नियमांचे उल्लघंन केल्यास अनामत रक्कम आणि उपकरणेही जप्त करण्यात येणार आहेत. ढोल-ताशांमध्ये हातोड्याने बडवण्यात येणाऱ्या सिलिंडरवरही बंदी घालण्यात आली आहे. सण-उत्सवाच्या दरम्यान सावर्जनिक ठिकाणी फटाके वाजविण्यास मुंबई उच्च न्यायालयाकडून बंदी घालण्यात आली आहे.
मुंबईतील प्रसिद्ध सुलेमान उस्मान मिठाईवर आज एफडीएने मोठी छापेमारी केली आहे. महमंद अली रोडवरील या दुकानाचा फूड मिठाई व्यापारी परवाना रद्द करण्यात आला आहे. स्वच्छतेचे उल्लघंन करण्यात आले आहे. मिठाईच्या साठ्यासाठी तापमान आणि आर्द्रता नियंत्रणाची योग्य व्यवस्था नव्हती. तसेच, तयार मिठाईही अस्वच्छ वातावरणात ठेवण्यात आली होती, त्यामुळे एफडीएने ही कारवाई केली आहे.
सोलापूर आणि नागपूरमधील डीजेबंदीचा उल्लेख करत मुंबई उच्च न्यायालयाने मुंबई आणि महाराष्ट्रात इतरत्र डीजे बंदी का होऊ शकत नाही, असा सवाल केला आहे. तुम्ही फक्त ध्वनी प्रदूषण नाही तर वायू प्रदूषणही करत आहात, असे न्यायमूर्ती कुलकर्णी यांनी म्हटले आहे. रस्ते अडविल्याने वाहतूक कोंडी होते, त्याचा लोकांना त्रास होतो. काही लोकांसाठी लाखो लोकांना त्रास होतो, असेही त्यांनी म्हटले आहे.
मुख्यमंत्री देवेंद्र फडणवीस व उपमुख्यमंत्री एकनाथ शिंदे हे उद्या दुष्काळी परिस्थितीची पाहणी करणार आहेत. फडणवीस हे सोलापूर, धाराशिव आणि लातूर जिल्ह्यात पाहणी करणार आहेत. लातूरमध्ये दोन ठिकाणी, तर धाराशिव आणि सोलापूर जिल्ह्यात प्रत्येकी तीन ठिकाणी पाहणी करणार आहेत. उपमुख्यमंत्री एकनाथ शिंदे हे अमरावतीमध्ये पाहणी दौरा करणार आहेत.
पुण्यातील कृषी महाविद्यालयात सुरू असलेल्या एम.एस.सी. ॲग्रीच्या प्रवेश प्रक्रियेत मोठा गोंधळ उडाला आहे. राज्यातील राहुरी, अकोला, कोकण आणि परभणी या चारही कृषी विद्यापीठांच्या प्रवेश याद्यांमध्ये घोळ झाल्याचा गंभीर आरोप संतप्त विद्यार्थ्यांनी केला आहे. यामुळे प्रवेश घेण्यासाठी आलेल्या विद्यार्थ्यांना मनस्ताप सहन करावा लागत असून, या प्रक्रियेत तात्काळ सुधारणा करण्याची मागणी विद्यार्थ्यांनी केली आहे.
लातूरच्या औसा तालुक्यात शेतकऱ्यांनी आंदोलन केलं.साईबाबा शुगर्स कारखान्यानं 8 महिन्यांपासून उसाचे पैसे दिले नाहीत. दुष्काळामुळे शेतकरी आधीच संकटात सापडलाय. पैसे न मिळाल्यानं त्यांच्यावर उपासमारीची वेळ आलीय. यामुळे संतप्त शेतकऱ्यांनी कारखान्याच्या संचालकांच्या दारात ठिय्या मांडलाय.
सांगलीच्या वाळवा तालुक्यात ऊस दराच्या प्रश्नावर स्वाभिमानी शेतकरी संघटना आक्रमक झालीय. स्वाभिमानी संघटनेचं सलग दुसऱ्या दिवशी आंदोलन सुरू आहे. दरम्यान कारखान्याकडे जाणारी ऊस वाहतूक संतप्त कार्यकर्त्यांनी रोखली. प्रति टन पाच हजार रुपये पहिली उचल मिळेपर्यंत कारखाने सुरू करू देणार नाही, अशी आक्रमक भूमिका या कार्यकर्त्यांनी घेतली..त्यामुळे मोठा तणाव निर्माण झाला आहे.
शिवसेना पक्ष आणि धनुष्यबाण चिन्हाच्या अधिकाराबाबत सर्वोच्च न्यायालयात होणारी महत्त्वाची सुनावणी पुढे ढकलण्यात आली आहे. कोर्टाकडून या प्रकरणाच्या सुनावणीसाठी लवकरच नवीन तारीख जाहीर केली जाणार आहे. आमदार अपात्रता आणि पक्षांतर्गत वादाशी संबंधित या कायदेशीर लढाईकडे संपूर्ण महाराष्ट्राचे लक्ष लागलंय..राहिले असून, तारीख पुढे ढकलल्यामुळे यावरील प्रतीक्षा आणखी काही काळ वाढली आहे.
शिकच्या निफाड तालुक्यात मुसळधार पाऊस झालाय..लासलगाव परिसरातही तब्बल दीड महिन्याच्या प्रतीक्षेनंतर दमदार पावसाने हजेरी लावली. या पावसामुळे शेतकरी वर्गात समाधानाचं वातावरण आहे. दरम्यान कालही नाशिक शहरात पाऊस झाला.
मराठा आंदोलक मनोज जरांगे यांच्या सहकाऱ्यांच्या मालमत्ता आणि आर्थिक व्यवहारांच्या चौकशीची मागणी आता थेट आयकर विभागाच्या दारात पोहोचली आहे. मनोज जरांगे यांचे जुने सहकारी अमोल खुणे यांनी ईडी कार्यालयात तक्रार देत जरांगे यांच्या सहकाऱ्यांच्या संपत्तीची चौकशी करण्याची मागणी केली होती. बारस्कर यांनी जरांगे यांच्या सहकाऱ्यांवर गंभीर आरोप केले होते. या तक्रारीची दखल घेत आयकर विभागाकडून आर्थिक व्यवहारांची चौकशी होणार असल्याची माहिती समोर आली आहे. दरम्यान मनोज जरांगे पाटील पुन्हा आक्रमक झाले असून 'चौकशी करा, जेलमध्ये टाका...आरक्षणासाठी माघार नाही’ अशी आक्रमक भूमिका घेतली आहे. तर कोणत्याही चौकशीला सामोरं जाण्याची तयारी असल्याचेही त्यांनी स्पष्ट केलं आहे.
रायगडच्या पेणमध्ये येणारा SEZ प्रकल्प रद्द झाला असून या प्रकल्पासाठी शेतकऱ्यांकडून घेतलेली जमीन परत करावी या मागणीसाठी पेणमधील सेझ प्रकल्पग्रस्त रस्त्यावर उतरले आहेत. शासन नियम आणि खंडपिठाचा निकाल याचा हवाला देत जमिन परत शेतकऱ्यांच्या नावावर करण्याची मागणी आंदोलनकर्त्यांकडून केली जात आहे. पेण, पनवेल आणि उरण मधील 45 गावांतील शेतकऱ्यांची जमिन सेझ प्रकल्पामध्ये समाविष्ट होणार होती आता सेझ प्रकल्प रद्द झाल्याने जमिन परत करा अशी मागणी केली जात आहे.
मराठवाड्यात झालेल्या आढावा बैठकीत मंत्री, आमदार, खासदार काजू बदाम खातानाचा व्हिडिओ व्हायरल झाल्यानंतर राज्यभरात तीव्र पडसाद उमटले आहेत. याच पार्श्वभूमिवर अकोले तालुक्यातील ठाकरेंच्या शिवसेनेच्या पदाधिकाऱ्यांनी कृषीमंत्र्यांना काजू, बदाम, अक्रोड लावलेले शेणाचे लाडू पाठवले आहेत.
बुलढाणा जिल्ह्यात पावसाने दोन महिन्यापासून दडी मारल्याने खरीप पिकांचे मोठे नुकसान झाले असून शेतकरी आर्थिक संकटात सापडला आहे. या पार्श्वभूमीवर दुष्काळ जाहीर करावा, शेतकऱ्यांचा सातबारा कोरा करावा, सरसकट कर्जमाफी द्यावी तसेच पीकविमा आणि दुष्काळी मदत तातडीने जाहीर करावी, या मागण्यांसाठी स्वराज्य पक्षाच्या वतीने संग्रामपूर तालुक्यात आंदोलन करण्यात आले. यावेळी संतप्त शेतकऱ्यांनी तहसील कार्यालयासमोर सोयाबीनच्या पिकासह बैलगाडी पेटवून सरकारचा निषेध केला. तसेच शेतकऱ्यांना हेक्टरी एक लाख रुपये दुष्काळी मदत, तर शेतमजुरांच्या कुटुंबांना ५० हजार रुपये आर्थिक मदत देण्यात यावी, अशी मागणी स्वराज्य पक्षाचे प्रदेशाध्यक्ष प्रशांत डिक्कर यांनी केलीय.
प्रत्येक विकासकामाच्या बाबतीत काही लोकप्रतिनिधी ‘यात आमचे काही आहे की नाही?’ असे विचारत असतात. अशा लोकांना काहीतरी देत देता ठेकेदार अक्षरशः मरून जातात. त्याचा परिणाम विकासकामांच्या गुणवत्तेवर आणि काम पूर्ण होण्यावर होतो. अशा परिस्थितीत ठेकेदार अनेकदा काम अर्धवट सोडून देतात. त्यामुळे जनतेला त्याचा त्रास सहन करावा लागतो. दर्जेदार काम करणारे ठेकेदार अशा फंदात पडणे टाळतात. लोकप्रतिनिधींना काहीतरी देता देता ठेकेदार मरून जातो आणि काम अर्धवट राहतात, अशी जाहीर कबुली राज्याचे उच्च व तंत्रशिक्षण मंत्री तथा पालकमंत्री चंद्रकांत पाटील यांनी सत्तेतील काही लोकप्रतिनिधींच्या कथित कमिशनखोरीवर दिली आहे.
लातूर जिल्ह्यातला शेतकरी दुष्काळ आणि पुरता होरपळलाय, पावसाअभावी उभी खरीपाची पिकं आता करपू लागली आहेत. पिके उध्वस्त झाली असतानाही अद्याप पंचनामे करण्यात आले नसल्याने शेतकऱ्यांमध्ये नाराजी आहे. पंचनामेच झाले नाहीत, तर मदत कशी मिळणार, असा सवाल शेतकरी उपस्थित करत आहेत. मतदान मागण्यासाठी येता, मग मदतीसाठी का येत नाही, असा सवालही शेतकऱ्यांनी सरकार आणि प्रशासनाला केला आहे. उध्वस्त झालेल्या पिकांची पाहणी करून तातडीने पंचनामे करावेत आणि नुकसानग्रस्त शेतकऱ्यांना मदत द्यावी, अशी मागणी शेतकऱ्यांनी केली. दरम्यान थेट शेतीच्या बांधावरून आढावा घेतला आहे आमचे प्रतिनिधी संदीप भोसले यांनी.
अहिल्यानगरमधील संगमनेरमध्ये वीज समस्येविरोधात शेतकऱ्यांनी आक्रोश मोर्चा काढला. काँग्रेस नेते बाळासाहेब थोरात यांच्या नेतृत्वाखाली शेकडो शेतकरी प्रांत कार्यालयावर धडकले. निवेदन स्वीकारण्यासाठी अधिकारी उपस्थित नसल्याने आंदोलकांनी पोलिसांचा विरोध झुगारून कार्यालयात प्रवेश केला. कार्यालयाबाहेर ठिय्या देत प्रशासनाविरोधात घोषणाबाजी करण्यात आली.
काँग्रेसचे ज्येष्ठ नेते आणि विधानसभेचे विरोधी पक्षनेते विजय वडेट्टीवार यांचे अधिकृत 'X' (पूर्वीचे ट्विटर) अकाऊंट हॅक झाले आहे. या घटनेची माहिती मिळताच त्यांनी तातडीने नागरिकांना आणि आपल्या समर्थकांना सतर्क राहण्याचे आवाहन केले आहे.
राज्यातील दुष्काळी परिस्थितीचा आढावा घेण्यासाठी मुख्यमंत्री देवेंद्र फडणवीस लवकरच दुष्काळग्रस्त भागांचा दौरा करण्याची शक्यता आहे. मराठवाड्यातील काही भागांना भेट देऊन ते शेतकऱ्यांच्या बांधावर जाऊन परिस्थितीची पाहणी करू शकतात. मुख्यमंत्री कार्यालयाने गंभीर परिस्थिती असलेल्या भागांची माहिती मागवली असून धाराशिव आणि सोलापूर दौऱ्याची शक्यता आहे.
पुण्यातील गणेश विसर्जन मिरवणुकीचा कालावधी कमी करण्यासाठी पोलिसांनी महत्त्वाचा निर्णय घेतला आहे. मागील दोन वर्षांपासून मिरवणुकीत सहभागी असलेल्या मंडळांनाच यंदा परवानगी देण्याची भूमिका पोलिसांनी घेतली आहे. नवीन 150 मंडळांना नोटिसा बजावण्यात आल्या आहेत. या निर्णयावर शिंदेसेनेचे रविंद्र धंगेकर यांनी पोलिस आयुक्तांवर टीका केली आहे.
मालाड पूर्व परिसरात बनावट /भेसळयुक्त तूप तयार करून साठवणूक केल्याप्रकरणी संबंधित विभागाने मोठी कारवाई केली. या कारवाईमध्ये तब्बल 2,464 किलो तूप, अंदाजे ₹13 लाखांचा मुद्देमाल जप्त करण्यात आला आहे.
कोरड्या दुष्काळामुळे हिंगोली जिल्ह्यात 15 दिवसात तब्बल पाच शेतकऱ्यांनी आत्महत्या केल्याची धक्कादायक आकडेवारी पुढे आली आहे
संगमनेर तालुक्यातील विजेच्या खेळखंडोब्याविरोधात बाळासाहेब थोरात यांच्या नेतृत्वाखाली आक्रोश मोर्चा काढण्यात आला. धरणाचे आवर्तन सुरू असतानाही वीजपुरवठा खंडित असल्याने शेतीपिके धोक्यात आली आहेत.
म्हसवड येथे बेकायदेशीर वाळू वाहतूक रोखणाऱ्या पोलिस हवालदार महावीर कोकरे यांना वाळू चोरांनी डंपरच्या पायरीवरून शेकडो मीटर फरफटत नेत थेट चिरडून ठार मारण्याचा थरारक प्रयत्न केला. या हल्ल्यात गंभीर जखमी झालेल्या हवालदारावर एका खासगी रुग्णालयात हॉस्पिटलमध्ये उपचार सुरू असून, पोलिसांनी प्रितम लोखंडे आणि अवि तोरणे यांना ताब्यात घेतले आहे. मात्र, खाकी वर्दीवरील या प्राणघातक हल्ल्याचा गुन्हा दाखल करण्यास पोलिसांना तब्बल 28 तास लागल्याने पोलिसांच्या या भूमिकेवर संशय व्यक्त केला जात आहे.
भंडारा शहरातील सिंधी कॉलनी परिसरातील एका सार्वजनिक गणेश मंडळाच्या मंडपात मध्यरात्री चोरीची घटना घडली. कार्यकर्ते गाढ झोपेत असताना चोरांनी थेट गणपती बाप्पाच्या मूर्तीवरील पैशाचा हार आणि एका कार्यकर्त्याचा मोबाईल घेऊन पळ काढला. ही संपूर्ण घटना गणेश पेंडालमध्ये लावण्यात आलेल्या सीसीटीव्ही कॅमेऱ्यात चित्रित झाली आहे. याप्रकरणी पोलिस सीसीटीव्ही फुटेजच्या आधारे चोरांचा शोध घेत आहेत.
तुळजापूरचे भाजप आमदार राणाजगजीतसिंह पाटील व शिवसेना ठाकरे सेना पक्षाचे नेते आमदार आंबदास दानवे यांच्यातील वाद आता चांगलाच पेटला आहे. भाजपच्या कार्यकर्त्याकडून अंबादास दानवे यांच्या फोटोला जोडो मारो, तर शिवसेना ठाकरे सेनेच्या कार्यकर्त्यांनी छत्रपती शिवाजी महाराज चौकात अंबादास दानवे यांच्या फोटोला दुग्धाभिषेक घातला. अंबादास दानवे व राणाजगजितसिंह पाटील यांच्या आव्हान प्रती आव्हानानंतर कार्यकर्ते रस्त्यावर उतरले आहेत.
“हारे बिना जीता नहीं जा सकता!”, संकटाच्या वादळात राष्ट्रीय नेता जेव्हा थेट पाठीशी उभा राहतो, तेव्हा कार्यकर्त्याची ताकद दसपट वाढते. “सब गया तो भी चलेगा, आपकी लड़ाई में साथ रहूँगा” म्हणत काँग्रेसशी एकनिष्ठ राहणारे चिखलीचे माजी आमदार राहुल बोंद्रे यांनी भाजपच्या प्रेशर पॉलिटिक्सला स्पष्ट नकार देत काँग्रेससोबतच राहण्याचा घेतलेला निर्णय स्वाभिमानी काँग्रेस कार्यकर्त्याचा आहे. “घबराना नहीं है, प्रेशर में मत आओ... हारे बिना जीता नहीं जा सकता!” असा धीर देत कार्यकर्त्याला कुटुंब मानणारे आमचे नेते राहुलजी गांधी आणि शब्दाला जागणारे निष्ठावंत बोंद्रेजी, दोघांचेही अभिनंदन!
वाशिम जिल्ह्यातील बाजार समितीमध्ये तुरीच्या दरात वाढ झाली आहे. गेल्या 20 दिवसात तुरीच्या दरात तब्बल 1 हजार रुपयांची वाढ झाली आहे. कारंजा बाजार समितीत 1 सप्टेंबरला तुरीला 7305 ते 8500 रुपये प्रतिक्विंटल दर मिळत होता. 21 सप्टेंबरला हा दर वाढून 8252 ते 9600 रुपये झाला. म्हणजेच कमाल दरात 1 हजार रुपयांची वाढ झाल्याने शेतकऱ्यांना दिलासा मिळाला आहे.
उल्हासनगरच्या सुभाष टेकडी परिसरात पूर्ववैमनस्यातून रोहित जगदाळे या युवकाच्या झालेल्या हत्येचा विठ्ठलवाडी पोलिसांनी छडा लावला असून पाच आरोपींना अटक केली आहे. प्रथम बनकर, अतिश मनोहर, अनिकेत खरात उर्फ टॉम, साहिल म्हस्के आणि प्रतीक क्षेत्रे अशी आरोपींची नावे आहेत. शुक्रवारी मध्यरात्री रोहितवर आरोपींनी पेव्हर ब्लॉक आणि चाकूने हल्ला झाला होता.
अमरावती जिल्ह्यासह निर्माण झालेल्या गंभीर दुष्काळी परिस्थितीच्या पार्श्वभूमीवर, शेतकऱ्यांना दिलासा देण्यासाठी आणि दुष्काळ निवारणाच्या उपाययोजना युद्धपातळीवर राबवण्यासाठी जिल्हा प्रशासनाने कठोर पावले उचलली आहेत. यासाठी जिल्हाधिकारी आशिष येरेकर यांनी आपत्ती व्यवस्थापन अधिनियम, 2005 अंतर्गत परिपत्रक जारी करून पूर्वपरवानगीशिवाय मुख्यालय सोडल्यास थेट फौजदारी गुन्हा करण्याचा इशारा दिला आहे.
गेल्या दोन महिन्यापासून चिखली मतदारसंघातील राजकारण हा चर्चेचा विषय राज्यभरात ठरला आहे. चिखलीचे काँग्रेसचे माजी आमदार राहुल बोंद्रे यांनी काल फेसबुक लाईव्ह करत भाजपमध्ये पक्ष प्रवेश करत असल्याचे जाहीर केले. भाजपचे मुख्यमंत्री देवेंद्र फडणवीस यांच्या उपस्थितीत आज हा पक्षप्रवेश होऊ शकतो, असे चिखलीच्या आमदार श्वेता महाले यांनी सुद्धा दुजोरा दिला. मात्र काल सायंकाळी या संपूर्ण घटना क्रमात एक मोठा ट्विस्ट आला. राहुल गांधींनी थेट राहुल बोंद्रेंना व्हाट्सअप कॉल करत त्यांची मनधरणी केली, शिवाय "हार के बाद ही जीत है" असा कानमंत्रही दिला. या संपूर्ण घटनाक्रमात काँग्रेस प्रदेशाध्यक्ष हर्षवर्धन सपकाळ यांनी मध्यस्थी केल्याची माहिती आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.