राज्याच्या उपमुख्यमंत्री सुनेत्रा पवार म्हणाल्या, अजितदादा जेव्हा पहिल्यांदा खासदार झाले होते, तेव्हाच बीडच्या रेल्वेचा प्रस्ताव मंजूर झाला होता. बीडचा सर्वांगीण विकास आणि कनेक्टिव्हिटी हाच त्यांचा ध्यास होता.आज मराठवाड्याची कन्या म्हणून दादांचे अपूर्ण स्वप्न पूर्ण करताना मला अत्यंत अभिमान आणि आनंद होत आहे, अशा शब्दांत सुनेत्रा पवार यांनी आपल्या भावना व्यक्त केल्या.
राज्याच्या उपमुख्यमंत्री तथा बीडच्या पालकमंत्री सुनेत्रा पवार यांच्या हस्ते या थेट रेल्वेसेवेला हिरवा झेंडा दाखवण्यात आली. दिवंगत नेते अजित पवार यांच्या आठवणींना उजाळा देत गतवर्षी 17 सप्टेंबर 2025 रोजी जेव्हा बीड-अहिल्यानगर रेल्वे सुरू झाली, तेव्हा अजितदादांनी बीडकरांना शब्द दिला होता, पुढच्या वर्षी थेट बीडवरून पुण्याला जाल. दादांचा तोच शब्द पाळण्याचे भाग्य आज मला मिळाल्याचं उपमुख्यमंत्री सुनेत्रा पवार यांनी म्हटलं.
राज्याचे कृषिमंत्री दत्तात्रय भरणे यांनी कृषी विभाग आणि महसूल विभागाकडून दुष्काळजन्य परिस्थितीबाबत माहिती घेतली जाईल. दुष्काळ जाहीर करावा, ही जरी आजची गरज असेल, तरी तो आपोआपच जाहीर होईल, हे सांगण्याची वेगळी गरज नाही. राज्यातला शेतकरी अडचणीत आहे, मुख्यमंत्री देवेंद्र फडणवीसांनी याचा आढावा घेतल्याचंही भरणे यांनी म्हटलं.
बुलढाणा जिल्ह्यात गेल्या सुमारे ५० दिवसांपासून पावसाने दडी मारल्याने शेतकरी मोठ्या संकटात सापडला आहे. पावसाअभावी पिकांचे मोठ्या प्रमाणात नुकसान होत असून, शेतकऱ्यांवर आर्थिक संकट ओढावले आहे. त्यामुळे जिल्ह्यात कोरडा दुष्काळ जाहीर करण्याची मागणी जोर धरत आहे. दरम्यान, दुष्काळसदृश परिस्थिती असलेल्या जिल्ह्यांची एक यादी सोशल मीडियावर आणि विविध माध्यमांतून चर्चेत असून, त्यामध्ये बुलढाणा जिल्ह्याचे नाव नसल्याचे दिसत असल्याने शेतकऱ्यांमध्ये संभ्रमाचे वातावरण निर्माण झाले आहे. यावर केंद्रीय मंत्री प्रतापराव जाधव यांनी स्पष्टीकरण देत, अद्याप कोणतीही अंतिम यादी जाहीर झालेली नाही, असे स्पष्ट केले आहे.
काँग्रेसचे ज्येष्ठ नेते सुशीलकुमार शिंदे यांचे नातू शिखर पहारिया यांनी पंतप्रधान नरेंद्र मोदींच्या वाढदिवसाच्या निमित्ताने बॅनर लावले. सोलापुरातील भाजपच्या कार्यालयाच्या बाहेर हे बॅनर लावले आहेत. या बॅनरमुळे आता राजकीय वर्तुळात चर्चा सुरू झाली असून भाजपकडून देखील यावर प्रतिक्रिया आली आहे. ‘या बॅनरच्या माध्यमातून शिखर पहारिया सुशीलकुमार शिंदेना वेगळे संकेत देऊ इच्छित असतील, ते जर भाजपमध्ये येण्यास इच्छुक असतील तर त्यांचे स्वागत केले जाईल’ अशी प्रतिक्रिया भाजपच्या शहराध्यक्षा रोहिणी तडवळकर यांनी दिलीय.
कोकणातील प्रसिद्ध धार्मिक तीर्थक्षेत्र आणि जगभरातील लाखो भाविकांचे श्रद्धास्थान असलेल्या 'संस्थान श्रीदेव गणपतीपुळे' येथे दर्शनासाठी येणाऱ्या भक्तांसाठी अखेर वस्त्र संहिता लागू करण्याचा अत्यंत महत्त्वपूर्ण निर्णय मंदिर प्रशासनाने घेतला आहे. येत्या १ जानेवारी २०२७ पासून या नियमावलीची संपूर्ण मंदिर परिसरात अत्यंत कडक व काटेकोरपणे अंमलबजावणी केली जाणार असल्याचे संस्थान श्रीदेव गणपतीपुळे पंचकमेटीतर्फे स्पष्ट करण्यात आले आहे.
महाराष्ट्र लोकसेवा आयोगाच्या परीक्षेतील पेपरफुटी प्रकरण आणि आयोगाच्या कार्यपद्धतीवर उपस्थित झालेल्या गंभीर प्रश्नांमुळे एमपीएससी विद्यार्थी आणि शिक्षकांमध्ये तीव्र असंतोष निर्माण झाला आहे. दरम्यान आज अमरावतीमध्ये अप्पर मुख्य सचिव व्हि. राधा यांच्या अध्यक्षतेखाली नेमलेली समिती विद्यार्थी आणि शिक्षकांचे म्हणणे ऐकून घेण्यासाठी आली होती. यावेळी विदर्भ आणि मराठवाड्यातील विद्यार्थी मोठ्या संख्येने दाखल झाले होते. यावेळी विद्यार्थ्यांनी “आधी एमपीएससीच्या अध्यक्षांचा राजीनामा घ्या, अशी ठाम भूमिका घेतली आहे. तसेच एमपीएससी आयोगाचे समितीची पुनर्रचना व्हावी, उच्च दर्जाच्या अधिकाऱ्यांचा यामध्ये असावे, रखडलेली पदभरती तात्काळ घ्यावी, पारदर्शक पद्धतीने परीक्षा व्हाव्यात अशा मागण्या देखील विद्यार्थ्यांनी केल्या.
मराठा आरक्षणाच्या अनुषंगाने सातारा गॅझेट लागू करण्याबाबत सरकार दिलेल्या वेळेत निर्णय पूर्ण करण्यासाठी कटिबद्ध असल्याची ग्वाही पालकमंत्री शंभूराज देसाई यांनी दिली. हैदराबाद गॅझेट तेलंगणात आणि निजामकालीन लिपीत असल्याने त्याला वेळ लागला. मात्र सातारा गॅझेट मराठी अथवा संस्कृतमध्ये असण्याची शक्यता असल्याने तेवढा वेळ लागणार नाही, असा विश्वास त्यांनी व्यक्त केला. तसेच राजघराण्याचे वारसदार श्रीमंत शिवेंद्रसिंहराजे भोसले हे उपसमितीत असल्याने त्यांचा अभ्यास याकामी उपयुक्त ठरेल, असे सांगत मंत्रिमंडळाच्या प्रत्येक बैठकीनंतर उपसमितीची बैठक होऊन यावर नियमित आढावा घेतला जात असल्याचे देसाई यांनी स्पष्ट केले.
दिशा सालियान हिचा मृत्यू दुर्दैवी आहे, पण या प्रकरणाशी आमचा कुठलाही संबंध नाही. तरीही एफआयआरमध्ये माझे, आदित्यचे नाव टाकले. हा राजकीय षडयंत्राचाच भाग आहे. त्यांना काय करायची ती चौकशी करू द्या, पण जे चारित्र्य हनन सुरू आहे, ते आता थांबले पाहिजे, अन्यथा मला कायदेशीर पाऊल उचलावे लागेल अशी प्रतिक्रिया उद्धव ठाकरे यांनी दिली आहे.
पुण्यातील बीजे शासकीय महाविद्यालयाच्या डॉक्टरांनी ससून रुग्णालयाबाहेर आकृतीबंधाविरोधात आक्रमक आंदोलन पुकारलं आहे... या नवीन रचनेमुळे अनेक जागा कमी होऊन रुग्ण आणि शिक्षण घेणाऱ्या डॉक्टरांचे मोठे नुकसान होण्याची भीती त्यांनी व्यक्त केली आहे... ससूनमध्ये आधीच 31 पदं रिक्त असल्यानं कमी डॉक्टरांवर प्रचंड ताण येत असून, हा तिढा लवकरात लवकर सोडवण्याची मागणी डॉक्टरांकडून केली जात आहे...
गोकुळ दूध संघाच्या आगामी निवडणुकीच्या पार्श्वभूमीवर सतेज पाटील यांनी मोठी प्रतिक्रिया दिली आहे. आपल्या पॅनेलचे जवळपास 18 ते 19 उमेदवार निश्चित झाल्याचं त्यांनी सांगितलं. दूध उत्पादकांच्या हितासाठी ही लढाई असल्याचं सांगत गोकुळच्या निर्णयांमध्ये दूध उत्पादकांचं नेतृत्व आणि हित महत्त्वाचं असल्याची भूमिका त्यांनी मांडली.
महायुतीकडून उमेदवार आणि पॅनेल कुठे ठरणार, 'अदृश्य शक्ती'च्या चर्चेबाबत महायुतीतील नेत्यांनी स्पष्टीकरण द्यावं, तसेच निवडणुकीतील खर्च आणि राजकीय दबावाच्या चर्चेवरही सतेज पाटील यांनी भाष्य केलं. गोकुळच्या निवडणुकीत महायुती विरुद्ध समविचारी पॅनेल अशी लढत होणार असल्याचं त्यांनी सांगितलं.
प्रादेशिक परिवहन कार्यालय, पिंपरी-चिंचवड यांच्या वतीने दि. १ ते १५ सप्टेंबर २०२६ या कालावधीत वाहनांची विशेष तपासणी मोहीम राबविण्यात आली. या मोहिमेदरम्यान वाहनांवरील नियमबाह्य काळी फिल्म, आकर्षक अथवा फॅन्सी नंबर प्लेट, HSRP नंबर प्लेट नसलेली वाहने तसेच इतर राज्यात नोंदणीकृत लक्झरी ट्रॅव्हल्स बसेसची तपासणी करण्यात आली.
तपासणीदरम्यान मोटार वाहन कायदा व संबंधित नियमांचे उल्लंघन करणाऱ्या वाहनांवर दंडात्मक कारवाई करण्यात आली. या मोहिमेत एकूण ३९५ चलन करण्यात आले असून, त्यापैकी १६७ चलनांचा भरणा करण्यात आला. त्यातून ८ लाख ९ हजार २७० रुपये दंड वसूल करण्यात आला.
तालुक्यातील उंबरोठे नजीकच्या पिंजाळ नदीवर अंघोळीसाठी गेलेले दोघे तरूण बुडाले असून त्यापैकी एका तरूणाचा मृतदेह मिळाला असून दुस-या तरूणाचा शोध सुरू आहे.ही घटना बुधवारी (दि.16)सायंकाळच्या सुमारास घडली .या घटनेने हळहळ व्यक्त होत आहे. गितेश परिक्षीत पाटील ( वय 16)मानव चरणदास राठोड( वय 16)अशी नदीत बुडालेल्यांची नावे असून त्यापैकी गितेश याचा मृतदेह मिळाला आहे
सरकारचे शिष्टमंडळ मंत्री राधाकृष्ण विखे पाटील, दादा भुसे आमदार प्रसाद लाड यांनी रात्रीच मनोज जरांगे पाटील यांची भेट घेत त्यांच्याशी चर्चा करत तुमच्या सर्व अटी आम्ही मान्य करत आहोत ,अशा भुलथापा देत हे सुरू असलेलं आमरण उपोषण गुंडाळल आहे, त्यामुळे खरंच या सर्वांना आता मानावे लागेल, असे ओबीसी नेते नवनाथ वाघमारे यांनी म्हटले आहे. जरांगे पाटील यांचं आंदोलन मॅनेज करून विखे पाटील यांनी संपवलं, असे देखील ते म्हणाले.
पुण्यातील गुरुवार पेठेतील श्री शिवछत्रपती मित्र मंडळाने यंदा गणेशोत्सवात देखाव्यातून अजित पवार यांच्या आठवणींना उजाळा दिला आहे. देखाव्यात दादांचे प्रसिद्ध गुलाबी जॅकेट, मोठे कट-आऊट्स आणि 'वाह रे पठ्ठ्या', 'मी आहे ना' यांसारखे प्रसिद्ध संवाद असणारे फलक लावून त्यांना गणेशोत्सवाच्या माध्यमातून अनोखी सलामी देण्यात आली आहे.
पुणे पदवीधर व शिक्षक मतदारसंघात महायुतीचा विजय निश्चित करण्यासाठी मंगेश चिवटे यांची समजूत काढून त्यांना माघार घेण्यास सांगण्याचे सूतवाच वैद्यकीय शिक्षणमंत्री हसन मुश्रीफ यांनी कोल्हापुरात केले. भाजप व राष्ट्रवादीने प्रत्येकी एक जागा लढवल्यास महायुतीचा विजय सोपा होईल, तसेच गोकुळ निवडणूक बिनविरोध होणार नसल्याचे त्यांनी स्पष्ट केले.
आदिवासी स्कूल ठीक करो अभियानांतर्गत ते एटापल्ली तालुक्यातील डुंमे, आलेगा, पायडी या जिल्हा परिषद शाळांना कॉकरोज जनता पार्टीचे संस्थापक अभिजीत दिपके भेट देणार आहेत.
धाराशिव : मराठा आरक्षणाच्या मागणीसाठी धाराशिवमध्ये मराठा आंदोलक आक्रमक झाले. जिल्हाधिकारी कार्यालयाच्या गेटसमोर आंदोलकांनी जोरदार घोषणाबाजी करत सरकारविरोधात रोष व्यक्त केला. यावेळी परिसरात काही काळ तणावाचे वातावरण निर्माण झाले.
नाशिक जिल्ह्यात आदिवासी जेन झी सरकार विरोधात आंदोलन करीत आहेत. त्यांच्या प्रश्नांना शासनाकडून थेट बगल देण्याचा प्रयत्न होत आहे. या आंदोलकांशी चर्चा करण्याचे आदिवासी विकास मंत्री डॉ. अशोक उईके टाळत आहेत. यासंदर्भात आंदोलकांनी मंत्र्यांवर गंभीर आरोप केला होता. मंत्र्यांचा राजीनामा मागण्यात आला आहे. या प्रश्नावर आंदोलकांशी भेट टाळून मंत्री थेट आदिवासी आश्रम शाळांवर पोहोचले. यावेळी त्यांनी कर्मचारी आणि अन्य घटकांची समन्वय नसल्याने शिक्षणावर परिणाम होतो आहे. मात्र आंदोलक माझाच राजीनामा का मागतात? असा प्रश्न केला.
मराठवाडा सातत्याने संघर्ष करतोय असं म्हणत मराठवाड्यातील पुढच्या पिढीला दुष्काळ पाहू देणार नाही, असंही मुख्यमंत्री देवेंद्र फडणवीस यांनी म्हटलं आहे.
मुख्यमंत्री देवेंद्र फडणवीस मराठवाडा मुक्तीसंग्राम दिनानिमित्त छत्रपती संभाजीनगरमध्ये आले आहेत. यावेळी त्यांनी ध्वजारोहण त्यानंतर बोलताना त्यांनी मराठवाड्याला दुष्काळमुक्त करू असं आश्वासन दिलं.
मराठा आंदोलक मनोज जरांगे पाटील यांनी २० दिवसांपासून सुरू असलेले आपले उपोषण सोडले. तर आमदार प्रसाद लाड यांनी याबाबत माहिती दिली. मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार यांच्या विनंतीनुसार हे उपोषण सोडण्यात आले असून, येणाऱ्या ९० दिवसांत मनोज जरांगे पाटील यांना दिलेला शब्द पूर्ण करू असे सांगितले.
मुंबईकडे निघालेले मराठा आरक्षणाचे नेते मनोज जरांगे पाटील यांनी आपले उपोषण आज मागे घेतले. मात्र या प्रश्नावर शासनाकडून गांभीर्याने पाहिले जात नाही. त्यामुळे नाशिक जिल्ह्यात सर्वपक्षीय वज्रमूठ करण्यात आली आहे. या संदर्भात सर्वपक्षीय नेत्यांची बैठक बुधवारी नाशिक रोडला झाली. यावेळी विविध पक्षांचे नेते आणि सामाजिक कार्यकर्ते उपस्थित होते. आरक्षणाच्या प्रश्नावर एकजूट करण्यासाठी जिल्हाभर प्रयत्न केले जाणार आहेत.
कळंबा कारागृहातील सहा कैद्यांनी तुरुंग अधिकाऱ्याच्या केबिनमध्ये शिरून दगडाने मारहाण केल्याची धक्कादायक घटना घडली आहे.
मनोज जरांगे पाटील यांची आज सकाळी सहा वाजता सरकारच्या शिष्टमंडळाने भेट घेतली. यावेळी मागण्या मान्य करण्याचे शिष्टमंडळाने आश्वासन दिल्यानंतर जरांगे पाटील यांनी आपले उपोषण सोडले आहे. ते पुन्हा आंतरवाली सराटीकडे जाणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.