Manoj Jarange Patil : मराठवाड्यातील मराठे सरसकट कुणबी होणार, मनोज जरांगे-पाटील यांचा दावा, भुजबळांनाही डिवचले

Manoj Jarange News : मनोज जरांगे पाटील यांच्या आंदोलनानंतर सरकारने हैद्राबाद गॅझेट संदर्भात जीआर काढला. या जीआरनंतर जरांगे पाटील यांनी आपले उपोषण सोडले. मात्र, या जीआरचा मराठा समाजाला फायदा नाही, कुणबी प्रमाणपत्र मिळण्यासाठी जी प्रक्रिया होती तीच एका कागदावर उतरवून दिल्याचा आक्षेप घेण्यात येत होता. मात्र, सरकारच्या जीआरमुळे मराठवाड्यातील सरसकट मराठा ओबीसीमध्ये गेल्याचा दावा मनोज जरांगे पाटील यांनी माध्यमांशी बोलताना केला आहे.

ते म्हणाले, 'मुख्यमंत्री देवेंद्र फडणवीस यांनी दिलेल्या नव्या जीआरच्या आधारावर मराठा सरसकट ओबीसी आरक्षणात जाणार नसल्याचे म्हटले जात होते. तरी, हैदराबादच्या गॅझेटच्या माध्यमातून मराठवाड्यातील मराठे सरसकट ओबीसी आरक्षणात जाणार आहेत.'

'जीआर'मध्ये दुरुस्ती सुचविल्यास ती करून मिळणार असल्याचे आश्वासन राज्य सरकारने दिले आहे. तसेच आरक्षणाची प्रक्रिया कशी असेल, समाजबांधवांना प्रमाणपत्रे कधीपासून मिळणार, याबाबत सरकारसोबत चर्चा झाली आहे. अशी माहिती देखील जरांगे पाटील यांनी दिली.

भुजबळांचा विरोध म्हणजे फायदा

या जीआरमुळे ओबीसीच्या आरक्षणाला धक्का लागेल असे छगन भुजबळ म्हणतायेत मात्र तसे होणार नाही. त्यांनी अनेक काळ सत्ता, मंत्रिपद भोगले आहे. ते विरोध करत आहेत याचा अर्थ याची अंमलबजावणी होणारच, हे बांधवांनी विचारात घ्यावे, असे देखील जरांगे पाटील यांनी सांगितले. तसेच

मराठा समाज एकजुटीने शांततेच्या मार्गाने मुंबईला गेला आणि विजय घेऊनच परतला. महत्त्वाचे म्हणजे काही मराठे नेते आपल्याला काऊंटर करतात, विरोधत करतात त्याचे कारण आपल्याला कळत नाही मात्र मराठा समाजाने हक्क मिळवला आहे, असे देखील त्यांनी सांगितले.

आंतरवालीतील ओबीसी आंदोलन स्थगित

सरकारने काढलेल्या जीआरच्या विरोधात ओबीसी आंदोलकांकडून आंतरवाली सराटी येथे बेमुदत उपोषण सुरू करण्यात आले होते. जीआर रद्द करावा, संदीप शिंदे समितीला मुदत वाढ देऊ नये आदी मागण्या त्यांच्याकडून करण्यात आल्या होत्या. मंत्री अतुल सावे यांनी चर्चेचे आश्वासन दिल्यानंतर हे आंदोलन स्थगित करण्यात आले तसेच उपोषण तूर्त स्थगित केले असेल तरी लढा सुरूच राहिल असा निर्धार देखील आंदोलकांनी व्यक्त केला.