Maharashtra Politics Live : ...तर मी सुद्धा MPSC स्पर्धा परीक्षेची तयारी करणाऱ्या विद्यार्थ्यांच्या आंदोलनात सहभाग होईल:धनंजय मुंडे

मुंबईतील शिवाजी पार्क येथे 'कॉक्रोच जनता पार्टी' आणि इतर संघटनांनी आक्रमक भूमिका घेत जेल भरो आंदोलन पुकारले होते. मुख्य निवडणूक आयुक्त ज्ञानेश कुमार यांच्या राजीनाम्याच्या मागणी आणि निवडणूक आयोग सत्ताधारी पक्षाच्या दबावाखाली काम करत असून पात्र मतदारांची नावे यादीतून हटवली जात असल्याचा गंभीर आरोप आंदोलकांनी केला आहे.

माजी मंत्री धनंजय मुंडे यांनी पुण्यातील शास्त्री रस्त्यावरील MPSC स्पर्धा परीक्षेची तयारी करणाऱ्या विद्यार्थ्यांच्या आंदोलनस्थळाला भेट दिली. या आंदोलनकर्त्या विद्यार्थ्यांची भेट घेण्यासाठी माजी मंत्री धनंजय मुंडे आंदोलनस्थळी दाखल झाले होते. यावेळी धनंजय मुंडेंनी विद्यार्थ्यांशी संवाद साधत त्यांच्या मागण्या आणि समस्या जाणून घेतल्या. त्यांनी यावेळी विद्यार्थ्यांना त्यांच्या सर्व मागण्या मुख्यमंत्र्‍यांच्या कानावर घातल्या असल्याचं सांगितलं. या मागण्या पूर्ण झाल्या नाहीत, तर मी सुद्धा आंदोलनात सहभाग होईल, असा घरचा आहेर सरकारला धनंजय मुंडेंनी दिला आहे. 

मंत्री गणेश नाईक हे उद्धव ठाकरेंच्या शिवसेनेचे दिवंगत विभागप्रमुख प्रदीप पूर्णेकर यांच्या कुटुंबीयांचे सांत्वन करण्यासाठी त्यांच्या घरी गेले होते. याचदरम्या, एक अज्ञात महिला पूर्णेकरांच्या घरात शिरल्याची धक्कादायक घटना समोर आली. तिला तत्काळ कापूरबावडी पोलिसांनी ताब्यात घेतलं. या महिलेची चौकशी केल्यानंतर तिला सोडण्यात आल्याची माहिती पोलिसांनी दिली आहे.

मुंबईच्या शिवाजी पार्कमध्ये सुरु असलेल्या सीजेपीच्या आंदोलनात काही हिंदुत्ववादी संघटनेच्या तरुणांनी गोंधळ घालण्याचा प्रयत्न केला. आंदोलनस्थळी भाषणं सुरु असताना या तरुणांनी जय श्रीरामच्या घोषणा द्यायला सुरुवात केली. यावेळी पोलिसांनी मध्यस्थी करत त्यांना बाहेर काढण्याचा प्रयत्न केला.

करमाड : पावसाअभावी छत्रपती संभाजीनगर तालुक्यात खरीप पिकांची स्थिती बिकट झाली असून, सोयाबीन व कपाशीची पिके करपून गेली आहेत. पिण्याच्या पाण्यासह जनावरांच्या चाऱ्याचा प्रश्नही गंभीर बनला आहे. या पार्श्वभूमीवर महसूलमंत्री चंद्रशेखर बावनकुळे यांनी शुक्रवारी (ता. २) गाढे जळगाव परिसरातील दुष्काळी पिकांची पाहणी केली. दिवाळीपूर्वी शेतकऱ्यांच्या बँक खात्यावर दुष्काळी अनुदान जमा करण्यात येईल, अशी ग्वाही त्यांनी यावेळी दिली.

शिवाजी पार्कमध्ये सध्या कॉक्रोच जनता पार्टीचं आंदोलन सुरु आहे. या आंदोलनात अभिजीत दिपके यांनी मुख्य निवडणूक आयुक्त ज्ञानेश कुमार यांच्यासह सरकारवर टीका केली. यावेळी त्यांनी पंतप्रधान नरेंद्र मोदी यांच्यावर कडवी टीका करताना देशात केवळ पंतप्रधानाच व्हिक्टिम अर्थात पीडित आहेत. स्वतःच्या इमेजची ते काळजी करणारे प्रचंड आत्मकेंद्री व्यक्ती आहेत, अशा शब्दांत टीका केली.

पुणे : ‘युनिफाइड डेव्हलपमेंट कंट्रोल अँड प्रमोशन रेग्युलेशन्स’मधील (यूडीसीपीआर) नियमांचा आधार घेऊन पुण्यात बेसुमार बांधकामे सुरू आहेत. त्याचा परिणाम पायाभूत सुविधांवर आणि नागरिकांच्या जीवनमानावर होत आहे. पाणी, सांडपाणी, कचरा यासह अन्य सुविधा नसताना अरुंद रस्त्यावर टोलेजंग इमारती उभ्या राहात आहेत. यूडीसीपीआरमधील प्रकरण ६ आणि ७ नुसार वाढीव एफएसआय देण्यापूर्वी शहरातील सुविधांचा व क्षमतांचा विचार झालेला नाही, त्याविरोधात उच्च न्यायालयात याचिका दाखल करण्यात आली आहे.

महाराष्ट्र शासनाने सोलापूर जिल्ह्यातील ११ तालुके दुष्काळग्रस्त जाहीर केले असून जिल्ह्यात सरासरी ५७ टक्के पावसाची मोठी तूट आहे . ग्रामीण जनता आणि शेतकरी सध्या पिकांचे नुकसान, पाण्याचे दुर्भिक्ष आणि जनावरांच्या चाऱ्याच्या चिंतेमुळे जगण्याचा मोठा संघर्ष करत आहेत. संपूर्ण जिल्हा प्रशासन सध्या दुष्काळ निवारण, टँकर पुरवठा आणि पंचनाम्यांमध्ये व्यस्त असताना, सोलापूर जिल्हा मध्यवर्ती सहकारी बँकेची निवडणूक घेणे अत्यंत अयोग्य ठरेल. त्यामुळे ही निवडणूक परिस्थिती सुधारेपर्यंत तातडीने पुढे ढकलावी, अशी आग्रही मागणी रयत क्रांती संघटनेचे सोलापूर जिल्हाध्यक्ष नामदेव यशवंत पवार यांनी मुख्यमंत्र्यांकडे एका निवेदनाद्वारे केली आहे.

मराठवाड्याच्या सिंचनाबाबत भौतिक व आर्थिक अनुशेष शिल्लक असल्याने 'तज्ज्ञ समिती' नेमून नवीन अहवाल येईपर्यंत अंतरिम मदत म्हणून दरवर्षी सिंचन अनुशेष निधी देण्यात यावा, या मागणीसाठी जनहित याचिका दाखल करण्यात आली आहे.

या याचिकेवरील नुकत्याच झालेल्या सुनावणीत औरंगाबाद खंडपीठाचे न्या. नितीन सूर्यवंशी आणि न्या. आबासाहेब शिंदे यांनी राज्याच्या मुख्य सचिवांसह इतर प्रतिवादींना नोटीस बजावली आहे. मराठवाडा सिंचन अनुशेषाचा निधी मिळावा आणि समन्यायी विकासाबाबत 'नागपूर करार- १९५३' ची अंमलबजावणी करावी या मागणीसाठी जल अभ्यासक वाय. आर. जाधव यांनी मुंबई उच्च न्यायालयाच्या औरंगाबाद खंडपीठात जनहित याचिका दाखल केली आहे.

सीजेपी करत असलेल्या अशा आंदोलनाची गरज काय असं म्हटलं आहे. निवडणूक आयोगाच्या कार्यपद्धतीनुसार एसआयआर प्रक्रिया सुरु केली आहे. त्यांनी त्यांचे निर्णय घेतले. कार्यक्रम घोषित केला. पण विरोधकांकडून आरोपांचं राजकारण सुरु आहे. एसआयआरच्या प्रक्रियेला राबवण्यापूर्वी निवडणूक आयोगाने गल्ली ते दिल्ली सर्व राजकीय पक्षांबरोबर बैठका घेतल्या. या सगळ्या प्रकाराची राजकीय पक्षांना माहिती दिली आहे. नागरिकांनाही पत्रकार परिषद घेऊन माहिती दिली आहे. विरोधकांची वृत्ती छिद्रान्वेषी (खोट काढणारा, दोषदर्शी) आहे. फेक नरेटिव्ह सेट करण्याचा त्यांचा उद्देश आहे, असं आशिष शेलारांनी म्हटलं आहे.

दुष्काळी भागातील सर्वेक्षण योग्य करा. सर्वांनी पंचनामे करण्यासाठी पुढाकार घ्यावा, कुठेही चूक होऊ नये. उद्यापासून तीन दिवसांच्या दुष्काळ दाैऱ्यावर चंद्रशेखर बावनकुळे आहेत. चंद्रशेखर बावनकुळे यांनी म्हटले की, आम्हाला लवकरच शेतकऱ्यांना मदत द्यायची आहे. याकरिता आमचे सरकार काम करणार आहे. शेतकरी वेगळ्या परिस्थितीमध्ये आहे. पिण्याच्या पाण्याचा मोठा प्रश्न आहे. जनावरे आहेत, चाऱ्याचे नियोजन महत्वाचे असल्याचे त्यांनी स्पष्ट केले.

लातूर जिल्ह्याच्या कर्नाटक सीमावर्ती भागात दुष्काळाची तीव्रता वाढली असून पिके करपल्याने शेतकरी आर्थिक संकटात सापडला आहे. पावसाअभावी खरीप पिकांचे मोठे नुकसान झाल आहे, तर या भागातील नदी-नाले, विहिरी आणि पाण्याचे जलस्रोत आटत चालले आहेत. दरम्यान, शेजारच्या कर्नाटक राज्यात शेतकऱ्यांना मदतही मिळाली. मात्र आम्हाला कधी मिळणार, अशी आहार्त हाक लातूरच्या कर्नाटक सीमा वरती भागातील शेतकरी देत आहेत.

हॉस्पिटल सुरू करणार आहोत. त्या शेजारी मेडिकल दुकान व रक्त तपासणी लॅब उपलब्ध करून देतो, असे सांगत डॉक्टर दाम्पत्यासह एका माजी नगरसेवकाने सत्तावन्न लाख रुपयांची फसवणूक केली असल्याची तक्रार एका डॉक्टरसह चार जणांनी केली. तिसगाव येथील डॉ. प्रताप सुभाष वाघ यांनी दिलेल्या तक्रारीवरून पोलिसांनी डॉ. वसंत गंगाधर अनेराये, त्यांच्या पत्नी डॉ. ऋतुजा अनेराये व भाजपचे माजी नगरसेवक अनिल गोरख बोरुडे यांच्या विरोधात फसवणुकीचा गुन्हा दाखल केला आहे.

नेपाळ आणि उत्तर प्रदेशात झालेल्या मुसळधार पावसामुळे बिहारमधील गंडक नदी अनेक ठिकाणी यापूर्वीच्या सर्वोच्च पूरपातळीपेक्षा सुमारे 22 सें.मी.ने वरून वाहत आहे. त्यामुळे नदीच्या दोन्ही तटबंदींवर मोठा दबाव निर्माण झाला आहे. सारणमधील पनापूर आणि मुझफ्फरपूरमधील साहेबगंज येथे तटबंदीला भगदाड पडले आहे. गंगा नदी धोक्याच्या पातळीवरून वाहत असल्याने गंडक नदीवर उलट्या प्रवाहाचा दबाव वाढला आहे.

शरद पवार आज पुरंदर बारामतीच्या दौऱ्यावर आहेत. महाराष्ट्र सरकारने 266 तालुक्यात दुष्काळ जाहीर केल्यानंतर शरद पवार आज प्रथमच दुष्काळ पाहणी दौरा करत आहेत. यादरम्यान वागदरवाडीमध्ये पवार यांनी शेतकऱ्यांच्या बांधावर जाऊन दुष्काळ स्थितीचा आढावा घेतला. खूप पाऊस कमी झाला असून चाऱ्याचा प्रश्न निर्माण झाला आहे. तात्काळ चाऱ्याची छावणी सुरू करावीत, अशी मागणी उपस्थित शेतकऱ्यांनी शरद पवार यांच्याकडे केली.

यवतमाळ शहरातील बाबाजी दाते महिला सहकारी बँकेतील थकबाकीदारांवर सक्तवसुली संचालनालयाने (ईडी) छापे घातले. यवतमाळ आणि वणी येथील नऊ थकबाकीदारांवर छापा पडल्याची माहिती आहे. यात थकबाकीदारांच्या घरातील कर्ज प्रकरणाची कागदपत्रे तपासण्यात आली असून, या प्रकारामुळे सर्वत्र खळबळ उडाली आहे.

एकनाथ शिंदे शिवसेनेच्या माजी महापौर नगरसेविका मीनाक्षी शिंदे यांनी प्रदीप पुर्णेकर हत्याप्रकरणावर पत्रकार परिषदेत घेत, दिशा सालियान मृत्यूप्रकरणावर बोट ठेवत ठाकरे पिता-पुत्रावर गंभीर आरोप केले. दिशा सालियन प्रकरणात तिचे वडील फेऱ्या मारत आहेत. फिर्यादीमध्ये आदित्य ठाकरे यांचे नाव का टाकले नाही. उद्धव ठाकरे त्यावेळी CM होते, त्यांनी पुरावे नष्ट केले. ज्यांनी पुरावे नष्ट केले असतील त्यांची चौकशी करावी. आदित्य ठाकरे यांना देखील अटक करावे. आता Fir झाली आहे. त्या कॉपी त आदित्य आणि उद्धव ठाकरे यांची नावे लिहिली आहे, याकडे मीनाक्षी शिंदे यांनी लक्ष वेधले.

कोपरगाव शहरात आज गांधी जयंतीचे औचित्य साधून 'नो यूपीआय डे' साजरा करण्यात येत आहे. केंद्र सरकारने यूपीआय व्यवहारांवर एमडीआर शुल्क आकारण्याच्या घेतलेल्या निर्णयाविरोधात व्यापारी वर्ग आक्रमक झाला असून, कोपरगावमध्ये आज अनोख्या गांधीगिरी मार्गाने तीव्र निषेध नोंदवला जात आहे. महाराष्ट्र चेंबर ऑफ कॉमर्स आणि कोपरगाव तालुका व्यापारी महासंघाच्या नेतृत्वाखाली पदाधिकाऱ्यांनी शहरात फिरून व्यापाऱ्यांच्या भेटी घेतल्या आणि या शुल्काविषयी सविस्तर जनजागृती केली. तसेच नो यूपी आयचे पोस्टर लावण्यात आले आहेत.

४ तारखेच्या मोर्चाबाबत राज ठाकरेंनी नेत्यांची बैठक बोलावली आहे. मोर्चाच्या मार्गाबाबत या बैठकीत चर्चा होणार असून, मोर्चाच्या मार्गाविषयी अद्याप साशंकता कायम आहे.

दुष्काळग्रस्त भागाच्या पाहणी दौऱ्यावर असलेले शरद पवार शेतकऱ्यांच्या विविध समस्या जाणून घेणार आहेत. त्यानंतर कृषिमंत्र्यांची भेट घेऊन शेतकऱ्यांच्या मागण्या आणि अडचणी सरकारसमोर मांडणार असल्याचे त्यांनी सांगितले.

दिवेआगर दुर्घटनेत आळंदीतील आठ विद्यार्थ्यांचा मृत्यू झाल्याने आळंदी आणि पंचक्रोशीत शोककळा पसरली आहे. या घटनेनंतर संताप व्यक्त होत असून, विनर्स अकॅडमीवर सदोष मनुष्यवधाचा गुन्हा दाखल करण्याची मागणी नगराध्यक्ष प्रशांत कु-हाडे यांनी केली आहे. दुर्घटनेची सखोल चौकशी करून जबाबदारी निश्चित करण्याची मागणीही होत आहे.

दिवेआगर येथे सहलीदरम्यान आठ विद्यार्थ्यांचा बुडून मृत्यू झाल्याच्या घटनेनंतर आळंदीतील विनर्स अकॅडमीवर आळंदी नगरपरिषद कारवाई करणार असल्याची माहिती समोर येत आहे.

नाशिकच्या गंगापूर पोलिस ठाण्याच्या कर्मचाऱ्यांनी मोठी कामगिरी केली आहे. थेट पाकिस्तान सीमेवर जाऊन राजस्थानातून अमली पदार्थ आणि तस्करांना ताब्यात घेतले. या प्रकरणात रफिक खान (वय २३), रोहित मेघवाल (वय २२) आणि शौकत अली (वय २६) बाडमेर आणि जोधपूर येथील रहिवासी असलेल्या या तिघांना ताब्यात घेण्यात आले आहे.

ट्रक आणि पिकअप बोलेरोची धडक होऊन 5 जणांचा जागीच मृत्यू झाला, तर उपचारादरम्यान आणखी 2 जणांचा मृत्यू झाला आहे. या दुर्घटनेत 25 जण जखमी आहेत. हा भीषण अपघात समृद्धी महामार्गावर धामणगाव रेल्वे जवळ झाला .गावहून दुर्गादेवीची मूर्ती घेऊन जात असताना हा अपघात घडला. जखमींवर रुग्णालयात उपचार सुरू आहे.

दोन उमेदवारांचे अर्ज बाद झाल्याने भाजपची कोंडी, ऐनवेळी नव्या नावांची शिफारस, त्यावर शिवसेनेचा जोरदार आक्षेप आणि सभागृहात रंगलेले राजकीय नाट्य.....या सर्व घडामोडींनंतर उल्हासनगर महापालिकेच्या सात स्वीकृत नगरसेवकांची निवड अखेर बिनविरोध झाली. राजकीय संख्याबळाच्या खेळात शिवसेनेने पाच जागा मिळवल्या, तर भाजपच्या वाट्याला दोन जागा आल्या.

सीजेपी आज शिवाजीपार्कवर आंदोलन करणार आहे. मात्र, आंदोलनाला पोलिसांनी परवानगी नाकारली आहे. मात्र, अभिजीत दिपके आंदोलनावर ठाम असल्याने परिसरात कडेकोट बंदोबस्त तैनात करण्यात आला असून नियमित पोलिसांसह साध्या गणवेशातील फौजफाटा आणि दादर स्थानक परिसरात अतिरिक्त बंदोबस्त ठेवण्यात आलाय.