अखेर ठरलं.. शिवाजी महाराजांच्या आश्वारूढ पुतळ्याचे १८ रोजी आदित्य ठाकरेंच्या हस्ते अनावरण

औरंगाबाद : शहरातील क्रांती चौक परिसरात छत्रपती शिवाजी महाराज यांच्या आश्वारूढ पुतळ्याचे अनावरण १८ फेब्रुवारी रोजी रात्री बारा वाजता करण्यात येणार आहे. (Shivsena) यावेळी मुख्यमंत्री उध्दव ठाकरे (Uddhav Thackeray) हे दूरदृष्य प्रणालीद्वारे (Online) उपस्थित राहणार आहेत. तर पर्यावरण मंत्री आदित्य ठाकरे (Aditya Thackeray)तसेच पालकमंत्री सुभाष देसाई हे प्रत्यक्ष उपस्थित राहणार आहेत.

देशातील सर्वाधिक उंचीचे हे शिवछत्रपतींचे शिल्प असून त्याची निर्मिती पुण्यातील सुप्रसिद्ध शिल्पकार दीपक थोपटे यांनी केली आहे. तर चबुतऱ्याचे व परिसराचे सौदर्यींकरण महानगरपालिकेने पूर्ण केले आहे. शहराच्या वैभवात भर घालणाऱ्या या अश्वारुढ पुतळ्याच्या अनावरणावरून गेल्या काही दिवसांपासून चर्चा सुरू होती.

अनावरण कधी, कुणाच्या हस्ते होणार यावरून बरीच चर्चा सुरू होती. १९ फेब्रुवारी म्हणजेच शिवाजी महाराजांच्या जंयतीदिनीच या अश्वारुढ पुतळ्याचे अनावरण केले जावे, यासाठी शिवप्रेमी आग्रही होते. यासाठी विविध पक्ष, संस्था, संघटनांकडून जय्यत तयारी देखील सुरू करण्यात आली होती.

शिवसेनेच्या वतीने शिवजागर मोहिम देखील सुरू करण्यात आली असून या अतंर्गत विविध कार्यक्रम या निमित्ताने घेतले जात आहेत. मुख्ममंत्री उद्धव ठाकरे हे प्रत्यक्ष अनावरण सोहळ्याला उपस्थित राहतील अशी चर्चा होती.

परंतु १८ फेब्रुवारी रोजी रात्री १२ वाजता होणाऱ्या या सोहळ्यास ते आॅनलाईन हजेरी लावणार आहेत हे आता स्पष्ट झाले आहे. राज्याचे पर्यटनमंत्री आदित्य ठाकरे, उद्योग तथा जिल्ह्याचे पालकमंत्री सुभाष देसाई हे मात्र या अनावरण सोहळ्याला प्रत्यक्ष उपस्थित असणार आहेत.