AIMIM Politics : ऐन निवडणुकीत एमआयएम काढणार मोर्चा, राजकीय वातावरण तापणार!

Aimim News : एमआयएमचे प्रदेशाध्यक्ष इम्तियाज जलील यांच्यावर शहरातील शहागंज बुक्कुल गुडा भागात काही गुंडांनी जीवघेणा हल्ला केला होता. यावरून शहरातील वातावरण तापल्यानंतर पोलीसांनी या प्रकरणात 50 जणांवर गुन्हा नोंद केला होता.

कारवाई झाल्यामुळे प्रकरण शांत झाले असे वाटत असतानाच शुक्रवारी रात्री उशीरा इम्तियाज जलील यांनी सिटीचौक पोलीसांत धाव घेत हल्ला करणारे अजून मोकाट आहेत. त्यांच्यावर ज्या प्रकरणात गुन्हा दाखल व्हायला हवा तो न करता दुसऱ्याच प्रकरणात गुन्हा दाखल करण्यात आल्याचा आरोप केला.

पोलिसांनी गुन्हा दाखल करताना पुरेसी काळजी न घेतल्याने फायटर, सुरे, बर्फ तोडण्यासाठी वापरल्या जाणाऱ्या धारदार वस्तूसह जीवघेणा हल्ला करणाऱ्या कलीम कुरेशी आणि त्याच्या गुंडाना जामीन मिळाल्याचा आरोप करण्यात येत आहे.

पोलिसांनी हल्ला करणाऱ्या गुंडांना खुली सूट दिली आहे का? बुक्कलगुडा भागात झालेल्या जीवघेण्या हल्ला प्रकरणात कलीम कुरेशी व त्याच्या गुंडाविरोधात सिटीचौक पोलीसांनी अद्याप गुन्हा दाखल केलेला नाही. उलट आमच्याच माजी नगरसेवक व काही कार्यकर्त्यांच्या विरोधात किरकोळ वादातून गुन्हे दाखल करण्यात आले आहेत.

सिटीचौक आणि जिन्सी पोलीसांच्या हद्दीच्या वादात हे रेशनचोर, कलीम कुरेशी व त्यांचे गुंड मोकाट फिरत आहेत. त्यांच्यावर तात्काळ गुन्हे दाखल करून त्यांना अटक करा, ही कारवाई नाही झाली तर आज दुपारी तीन वाजता एमआयएमच्या वतीने पोलीस आयुक्त कार्यालयावर मोर्चा काढण्याचा इशारा इम्तियाज जलील यांनी दिला आहे.

पोलिस गुंडाना पाठीशी घालत आहेत, न्यायालयानेही तातडीने कलीम कुरेशाली जामीन मंजुर केला. आता पुढील तारीख ही १७ जानेवारी म्हणजेच महापालिकेची निवडणूक झाल्यानंतरची देण्यात आली आहे. म्हणजे या गुंडाना मोकळेरान मिळणार आहे, असा आरोप इम्तियाज जलील यांनी केला.

दुपारी तीनपर्यंत या गुंडावर सिटीचौक पोलीसांनी गुन्हे दाखल करून अटक केली नाही, तर आम्ही निवडणुका बाजूला ठेऊ आणि पोलीसांच्या विरोधातच मोर्चा काढू, असा इशारा त्यांनी दिला होता. त्यामुळे पुन्हा एकदा शहरातील राजकीय वातावरण तापले आहे.

अकबरुद्दीन ओवेसींची उद्या सभा

दरम्यान, उद्या (ता.11) रोजी एमआयएमचे वादग्रस्त नेते अकबरुद्दीन ओवेसी हे प्रचार सभेसाठी शहरात येत आहेत. सायंकाळी सात वाजता त्यांची आमखास मैदानावर सभा होणार आहे. त्याआधीच एमआयएमने पोलीसांच्या विरोधात मोर्चा काढण्याचा इशारा दिला आहे. आता पोलीस नेमकी काय भूमिका घेते याकडे सगळ्यांचे लक्ष असणार आहे.

प्रभाग क्रमांक 14 मध्ये परवानगी घेऊन एमआयएम उमेदवाराच्या प्रचारार्थ इम्तियाज जलील यांच्या उपस्थितीत पदयात्रा काढण्यात आली होती. बक्कलगुडा भागातून दुसऱ्या प्रभागात प्रचाराला जात असताना इम्तियाज जलील यांच्या गाडीवर 25-30 जणांनी हल्ला चढवला होता. कलिम कुरेशी यांच्या इशा-यावरुन हा हल्ला झाल्याचा आरोप आहे. कलिम कुरेशी यांचा मुलगाही होता यात सहभागी होता, असा दावा इम्तियाज जलील यांनी केला आहे.

अटकेच्या आधीच जामीन मिळाला

पोलिस आयुक्त यांना पत्र दिले तरीही आतापर्यंत त्या हल्लेखोरांवर गुन्हा दाखल करण्यात आला नाही. याचा जाब विचारण्यासाठी सिटी चौक पोलिस ठाण्यात रात्री उशिरा इम्तियाज जलील आणि एमआयएमचे कार्यकर्ते जमले होते. कलिम कुरेशी यांच्या समर्थकांवर रॅलीत झालेल्या वादात जीन्सी पोलिस ठाण्यात गुन्हा दाखल करण्यात आला. परंतु माझ्यावर हल्ला करण्याचा प्रयत्न केलेल्या गुंडांवर गुन्हा दाखल करण्यात आला नाही. जीन्सी पोलिस ठाण्यात दाखल गुन्ह्यातील आरोपींना पोलिसांचा नेण्याच्या अगोदर जामीन मिळाला.

एमआयएमच्या कार्यकर्त्यांवर लगेच गुन्हा...

माझ्या गाडीवर हल्ला करणा-या विरोधात गुन्हा दाखल झाला नाही. तर पोलिस आयुक्त कार्यालयावर मोर्चा काढण्याचा इशारा इम्तियाज जलिल यांनी माध्यमांशी बोलताना दिला आहे. उमेदवार फेरोज खान यांच्या घरासमोर काल बुरखाधारी महिलांनी विरोधी पक्षाचे स्टिकर लावण्याचा प्रयत्न केला. त्यांना रोखण्याचा प्रयत्न घरातील महिलांनी केला त्यांची तक्रार सिटी चौक पोलिस ठाण्यात केल्यानंतर तात्काळ एमआयएमचे उमेदवार व कार्यकर्त्यांविरोधात गुन्हा दाखल करण्यासाठी तत्परता दाखवण्यात आल्याचा आरोपही इम्तियाज जलिल यांनी केला आहे.