Ajit Pawar On Munde: धनंजय मुंडेंची पुन्हा मंत्रिपदासाठी तटकरेंकडे 'लॉबिंग'; अजितदादांची सूचक प्रतिक्रिया आली समोर

Beed News : बीड जिल्ह्यातील मस्साजोगचे सरपंच संतोष देशमुख हत्येप्रकरणाचं वातावरण चांगलंच तापलं होतं. यात थेट संबंध नसला तरी याप्रकरणी राष्ट्रवादी काँग्रेसचे नेते धनंजय मुंडे यांच्यावरही गंभीर आरोप झाले होते. यानंतर त्यांनी तब्येतीचं कारण देत मुंडेंनी मंत्रि‍पदाचा राजीनामा दिला होता. पण आता त्यांनी पुन्हा एकदा मंत्रिमंडळातील कमबॅकसाठी पूर्ण ताकद पणाला लावल्याचं समोर आलं आहे. त्यांनी थेट प्रदेशाध्यक्ष सुनील तटकरेंकडे तशी विनंतीही केली आहे. एकीकडे मुंडेंच्या कमबॅकवरुन राजकारण पेटलं असतानाच यावर आता उपमुख्यमंत्री अजित पवारांची (Ajit Pawar) प्रतिक्रिया समोर आली आहे.

राज्याचे उपमुख्यमंत्री अजित पवार यांनी सोमवारी(ता.22) राष्ट्रवादी काँग्रेसचे नेते धनंजय मुंडे यांच्या मंत्रिमंडळातील कमबॅकच्या इच्छेवर भाष्य केलं. त्यांनी राजकीय अनुभव वापरुन मुंडेंबाबत अधिकचं भाष्य टाळलं. पण एका वाक्यातच त्यांनी मुंडेंच्या मंत्रि‍पदाबद्दल सूचक विधान केलं आहे.

अजित पवार यांनी धनंजय मुंडेंच्या (Dhananjay Munde) विनंतीला मान दिला जाईल, त्यांच्या विनंतीचा विचार केला जाईल, असं म्हटलं आहे. अजितदादांची प्रतिक्रिया अर्थातच धनंजय मुंडेंच्या मंत्रिमंडळातील कमबॅकचे मोठे संकेत असल्याचे राजकीय वर्तुळात बोलले जात आहे.

यापूर्वीही धनंजय मुंडे यांना कृषिमंत्रिपदाच्या कार्यकाळात झालेल्या भ्रष्टाचारप्रकरणी न्यायालयाकडून क्लीन चिट मिळाली आहे. त्यामुळे त्यांचा महायुती सरकारच्या मंत्रिमंडळातील त्यांच्या कमबॅकच्या चर्चा पुन्हा एकदा प्रवेशाचा जोर आहे. त्यावर यापूर्वी यांनी अजित पवार यांनी याबाबतचा निर्णय मुख्यमंत्री घेतात असं जाहीरपणे सांगितलं होतं.

मात्र,याचवेळी अजित पवारांनी धनंजय मुंडेंच्या संदर्भात न्यायालयीन व राज्य सरकार मार्फत चौकशी जी सुरू होती, त्याचा अहवाल प्राप्त झालेला आहे. मंत्रिमंडळात कोण असावं, याबाबतचा निर्णय मुख्यमंत्री व महायुतीच्या माध्यमातून आम्ही सगळे एकत्र बसून घेऊ" असंही म्हटलं होतं.

धनंजय मुंडे काय म्हणाले ?

धनंजय मुंडे यांनी राजकारणात आपल्याला सुनील तटकरे यांचा कायम आधार राहिला आहे, त्यांचे आणि माझे संबंध हे सगळ्याना माहित आहे, असे म्हणत आपले गाऱ्हाणे त्यांच्यासमोर मांडले. आता रिकामं ठेवू नका, जबाबादारी द्या, या त्यांच्या विधानातून मला मिळाली तेवढी शिक्षा पुरे झाली, आता तुम्हीच अजितदादांना सांगा अन् मंत्रिपद द्या, असाच त्यांच्या बोलण्याचा अर्थ काढला जात आहे.

धनंजय मुंडे यांनी आपला पक्षाचे प्रदेशाध्यक्ष खासदार सुनील तटकरे यांच्याकडे मंत्रि‍पदासाठी वशिला लावला आहे. ते म्हणाले, वळवला आहे. कर्जतमधील एका कार्यक्रमात धनंजय मुंडे यांनी आपल्या भाषणात ' चुकलो तर कान धरा, नाही चुकलो तर चालतंय, पण आता रिकामं ठेवू नका, जबाबदारी द्या', असं चक्क साकडं तटकरेंना घातलं. यावर तटकरेंनी त्याचक्षणी वरिष्ठ याबाबत योग्य निर्णय घेतील, असं म्हटलं. त्यानंतर, आता अजित पवारांनीही याबाबत प्रतिक्रिया दिली आहे.