Beed Crime News : हवेत गोळीबार करत सोशल मीडियावर फोटो पोस्ट करणं तिघांच्या अंगलट, परळी पोलिसांची मोठी कारवाई

Beed News, 29 Dec : मस्साजोग गावचे सरपंच संतोष देशमुख (Santosh Deshmukh) यांच्या हत्या प्रकरणामुळे बीडमधील गुन्हेगारांवर पोलिसांचा धाक उरला आहे का नाही? असा प्रश्न उपस्थित केला जात आहे. शिवाय मागील काही दिवसांपासून विरोधकांकडून तसंच सामाजिक कार्यकर्त्या अंजली दमानिया यांच्याकडून बीडमधील काही लोकांची हातात बंदूक घेतल्याचे फोटो ट्विट करण्यात आले आहेत.

त्यांच्या ट्विटनंतर पोलिसांनी फोटोतील व्यक्तींना अटक करत त्यांच्यावर गुन्हा दाखल करण्यात आला आहे. अशातच आता परळी (Parli) तालुक्यात पुन्हा एकदा हवेत गोळीबार केल्याचा फोटो व्हिडिओ सोशल मिडीयावर पोस्ट केल्याप्रकरणी तिघांवर गुन्हा दाखल करण्यात आला आहे. दोनच दिवसांपूर्वी एकावर गुन्हा नोंद करुन त्याला अटक करण्यात आली होती.

त्यानंतर आता पुन्हा एकदा परळी ग्रामीण पोलिसांत आणखी 3 जणांविरोधात गुन्हा नोंदवण्यात आला आहे. हवेत गोळीबार करतानाचा फोटो सोशल मिडीयावर अपलोड केल्या प्रकरणी हा गुन्हा नोंदवण्यात आला आहे. यामध्ये परवानाधारक तर एक अवैध पिस्टल बाळगणाऱ्यांचा समावेश आहे.

या प्रकरणी माणिक हरिश्चंद्र फड रा. कन्हेरवाडी याच्याकडे परवानाधारक पिस्टल आहे. त्याने पिस्टलसह फोटो काढून तो सोशल मिडीयावर टाकून दहशत निर्माण करण्याचा प्रयत्न केला तसंच परवान्यातील नियमांचे उल्लंघन केला, अशी पोलिस (Police) कर्मचारी विष्णू घुगे यांनी तक्रार दिली होती त्यानुसार हा गुन्हा नोंद करण्यात आला आहे.

तर जयप्रकाश उर्फ बाळू रामधन सोनवणे रा. अंबाजोगाई याने पोळ्याच्या दिवशी पांगरी कॅम्प येथे परवानाधारक बारा बोअर बंदूकीतून हवेत गोळीबार केला होता. या प्रकरणी परळी ग्रामीण पोलिसांत गुन्हा नोंद झाला. तर कुणाल श्रीकांत फड रा. दाऊदपूर याने त्याच्याकडे पिस्टल परवाना नसतानाही त्याने पिस्टलसोबत फोटो काढून ते सोशल मिडीयावर अपलोड केले. त्याच्या विरोधातही गुन्हा दाखल करण्यात आला आहे.