Suresh Dhas interview : पत्रकार विलास बडेंबद्दल केलेलं वक्तव्य अनावधानाने; सुरेश धस यांचं घुमजाव

Maharashtra politics news : खोक्या प्रकरणावरून बिश्नोई गँगच्या माध्यमातून हत्येचा कट रचण्याचा प्रयत्न झाल्याचा आरोप करत आमदार सुरेश धस यांनी एकच खळबळ उडवून दिली.

'सरकारनामा'ला दिलेल्या मुलाखतीत त्यांनी पत्रकार विलास बडे यांच्या नावाचा उल्लेख केला होता. त्यानंतर ही बाब प्रचंड व्हायरल झाली. मात्र पत्रकार विलास बडे यांनी बेछूट आणि बेसलेस आरोपांनंतर अब्रुनुकसानीचा दावा दाखल करण्याचा इशारा देताच, सुरेश धस यांनी घुमजाव केल आहे. मुलाखतीत विलास बडेंचा उल्लेख अनावधानाने झाला होता. त्यांचा या प्रकरणाशी काहीही संबंध नसल्याचं स्पष्टीकरण आमदार सुरेश धस यांनी केला.

भाजप (BJP) आमदार सुरेश धस यांनी पत्रकार विलास बडे यांच्या नावाविषयी दिलगिरी व्यक्त केली आहे. मुलाखतीत विलास बडेंचा उल्लेख अनावधानाने झाला. पण त्यांचा या प्रकरणाशी कोणताही संबंध नाही, असे आमदार धस यांनी स्पष्टीकरण दिले आहे. तसा व्हिडिओ देखील समाज माध्यमांवर पोस्ट केला आहे.

भाजप आमदार सुरेश धस यांनी 'सरकारनामा'ला दिलेली मुलाखत चांगलीच विस्फोटक झाली. या मुलाखतीत त्यांनी एका वळणावर त्यांच्या हत्येचा (Crime) कटाविषयी धक्कादायक विधान केले. हे विधान करताना, त्यांनी बिश्नोई गँगशी संबंध जोडल्याने खळबळ उडाली होती.

मुलाखतीत म्हटले होते की, 16 वर्षे मी माळकरी राहिलो, आता डॉक्टरच्या सल्ल्याने मांसाहार करतो. पण अजून हरणाचं मांस खाण्यापर्यंत गेलेलो नाही. इथं माझ्यावर हरणाचं मांस खाल्ल्याचा आरोप करून नंतर त्यांनी बाहेरच्या राज्यातून विमानाची तिकिटं काढून बिश्नोई समाजाची काही लोकं आणल्याचा दावा केला होता.

याने हरणाचं मांस खाल्लंय, असं सांगून बिश्नोई समाजात मला व्हिलन करण्याचा त्यांचा प्लॅन होता आणि त्यातून लॉरेन्स बिश्नोईने माझी हत्या करावी, असा कट रचण्यात होता, असे आमदार धस यांनी म्हटले होते. या कटात दोन पत्रकार असल्याचा दावा केला होता. पण त्यात चुकून विलास बडे यांच्या नावाचा उल्लेख केला असल्याचे स्पष्टीकरण आता आमदार धस यांनी दिले आहे.