Chandrakant Khaire News : आम्ही २८ वर्ष शांत ठेवलेले शहर एमआयएम-भाजप पुन्हा पेटवू पाहत आहेत..

Chhatrapati Sambhajinagar : मी शहराचा आमदार आणि जिल्ह्याचा खासदार असतांना या शहरात कधी दंगल घडू दिली नाही. २८ वर्ष शांत ठेवत बंधुभाव आम्ही कायम ठेवला. पण २०२८ मध्ये एमआयएममुळे शहरातील राजाबाजार भागात दंगल घडली होती. एमआयएम आल्यापासूनच शहरातील वातावरण बिघडत असल्याचा आरोप ठाकरे गटाचे नेते चंद्रकांत खैरे (Chandrakant Khaire) यांनी केला.

छत्रपती संभाजीनगर नाव बदलल्यानंतर भविष्यात काही राजकीय फायदा होईल हा उद्देश डोळ्यासमोर ठेवून भाजपचे मंत्री डाॅ. भागवत कराड (Bhagwat Karad) आणि एमआयएम (Aimim) राजकारण करत असल्याचा दावाही खैरे यांनी केला. गुडीपाडव्या निमित्त काढण्यात येणाऱ्या भव्य शोभायात्रेची माहिती देण्यासाठी खैरे यांनी पत्रकार परिषद बोलावली होती.

यावेळी शहरातील वातावरण, नामांतराच्या विषयावर बोलतांना खैरे म्हणाले, जिल्ह्याचे नाव छत्रपती संभाजीनगर झाले आहे, आता सगळ्यांनी ते स्वीकारून शांत राहिलं पाहिजे. पण भाजप आणि एमआयएम याविषयावरून शहरातील वातावरण बिघडवण्याचे काम करत आहे. आम्ही २८ वर्षात या शहरात एकही दंगल होवू दिली नाही. २०१८ मध्ये जी दंगल झाली ती एमआयएममुळे झाली होती.

राज्यसभेवर खासदार असलेल्या डाॅ. भागवत कराड यांना आता लोकसभा लढवण्याची इच्छा झाली आहे, त्यामुळे एमआयएमला जवळ करण्याचे त्यांचे प्रयत्न सुरू आहेत, पण ते शक्य होणार नाही. नामांतराच्या विषयावरून शहरातील वातवरण खराब करण्याचा कोणी प्रयत्न केला तर आम्ही त्यांना उत्तर देवू. उद्योजकांमध्ये, सामान्य नागरिकांमध्ये भितीचे वातावरण आहे.

त्यामुळे नामांतरावरून सुरू असलेल्या राजकारणात आम्हाला अजिबात रस नाही. आजच्या मोर्चात देखील आम्ही सहभागी होणार नाही. तो मोर्चा पुर्णतः राजकीय असल्याचा आरोप देखील खैरे यांनी केला. राज्यातील महाविकास आघाडी सरकार ज्या पद्धतीने पाडले, तसेच राज्यातील वातावरण बिघडवण्याचे प्रयत्न देशपातळीवरून सुरू असल्याचा आरोप देखील खैरे यांनी केला.