Beed Crime News : मुख्यमंत्री फडणवीस यांची सभागृहात घोषणा अन् सीआयडीचे पथक मस्साजोगमध्ये दाखल!

बीड : केज तालुक्यातील मस्साजोगचे (Beed Crime News) सरपंच संतोष देशमुख यांच्या हत्या प्रकरणाने राज्यातील वातावरण ढवळून निघाले आहे. सत्ताधारी आणि विरोधक या प्रकरणावरून एकमेकांवर तुटून पडले आहेत. अशातच नागपूर येथील हिवाळी अधिवेशनात संतोष देशमुख खून प्रकरणाचे पडसाद दोन्ही सभागृहात उमटले.

मुख्यमंत्री देवेंद्र फडणवीस, (Devendra Fadanvis) विधान परिषदेचे विरोधी पक्षनेते अंबादास दानवे यांच्यात सभागृहात चकमकही उडाली. दरम्यान, मुख्यमंत्री देवेंद्र फडणवीस यांनी सभागृहात संतोष देशमुख खून प्रकरणाचा तपास सीआयडीकडे सोपवण्यात आल्याचे सांगत त्यासाठी एसआयटी स्थापन करणार असल्याचेही सांगितले होते.

मुख्यमंत्री सभागृहात ही घोषणा करत नाही, तोच आजच सीआयडीचे पथक मस्साजोगमध्ये दाखल झाले. कालपासून बीडमध्ये असलेल्या पथकाने आज देशमुख कुटुंबियांची मस्साजोग येथे जाऊन भेट घेतली. मागच्या आठवड्यात सोमवारी (ता. 9) संतोष देशमुख यांचे केज तालुक्यातून अपहरण करुन त्यांचा खुन करण्यात आला. विधान परिषदेचे विरोधी पक्षनेते अंबादास दानवे यांनी सभागृहात हा मुद्दा उपस्थित करुन केज पोलिसांच्या भूमिकेवर प्रश्‍नचिन्ह उपस्थित केले होते.

तर तिकडे संसदेत बीडचे खासदार बजरंग सोनवणे यांनीही या हत्या प्रकरणाला वाचा फोडली. या घटनेतील दोषींना फाशी द्या, अशी मागणी त्यांनी केली. दरम्यान, या प्रकरणाचा तपास सीआयडीचे उप अधीक्षक गुजर हे करत आहेत. सोमवारी सीआयडीचे छत्रपती संभाजीनगर विभागाचे अधीक्षक सचिन पाटील यांचे पथक मस्साजोगला दाखल झाले.

अपहरण घटनेचे प्रत्यक्षदर्शी व फिर्यादी व सरपंच देशमुख यांचे बंधू धनंजय देशमुख यांच्याशी या पथकाने चर्चा केली. या घटनेतील काही पैलूंबाबत सीआयडीने धनंजय देशमुख यांच्याशी चर्चा केली असून मुख्यमंत्री देवेंद्र फडणवीस यांनी जात-धर्म-पक्ष राजकीय संबंध याचा विचार न करता दोषींवर कठोर कारवाई केली जाईल, अशी ग्वाही आज सभागृहात दिली.