Congress : लातूरमध्ये आधीच आऊटगोईंग, त्यात काँग्रेसने आणखी अकरा जणांची पक्षातून केली हकालपट्टी!

Latur Politics News : नगर पालिका, नगरपंचायत निवडणुक ऐन जोमात आलेली असताना लातूर जिल्हा काँग्रेसमध्ये अनेक घडामोडी घडत आहेत. माजी महापौर आणि आमदार अमित देशमुख यांचे विश्वासू सहकाही अशी ओळख असलेले विक्रांत गोजमगुंडे यांनी नुकताच राष्ट्रवादी काँग्रेस पक्षात प्रवेश केला. तर लातूर ग्रामीणचे माजी आमदार त्र्यंबकनाना भिसे यांनी मुख्यमंत्री देवेंद्र फडणवीस यांच्या उपस्थित भाजपचे कमळ हाती घेतले.

एकीकडे पक्षात एवढे धक्के बसत असताना निवडणुकीत काँग्रेसच्या अधिकृत उमेदवारांच्या विरोधात पक्षादेश डावून अपक्ष निवडणूक लढवणाऱ्या अकरा जणांची पक्षातून हकालपट्टी करण्यात आली आहे. पक्षातून आऊटगोईंग होत असले तरी पक्षाशी बेईमानी करणाऱ्यांची गय केली जाणार नाही, असा संदेश यातून लातूर जिल्ह्यातील नेत्यांनी देण्याचा प्रयत्न केल्याची चर्चा या निमित्ताने सुरू आहे.

नगरपालिका निवडणुकीत काँग्रेस पक्षाच्या उमेदवारांच्या विरोधात पक्षादेश डावलून अपक्ष म्हणून निवडणूक लढवीत असलेल्या अकरा जणांची पक्षशिस्तीचे पालन न केल्याचा ठपका ठेवून पक्षातून हकालपट्टी केल्याचे पत्र प्रदेशाध्यक्ष हर्षवर्धन सपकाळ यांच्या सूचनेवरून वरिष्ठ उपाध्यक्ष ॲड. गणेश पाटील यांनी दिल्याचे काँग्रेसचे जिल्हाध्यक्ष अभय साळुंके यांनी सांगितले.

निलंगा नगरपालिका निवडणुकीत काँग्रेस पक्षाने गटतट न पाहता गुणवत्तेवर तिकीट वाटप करून स्वच्छ चारित्र्याचे, जनतेच्या सतत संपर्कात रहाणारे 23 नगरसेवक व एक नगराध्यक्षपदाचा उमेदवार दिले आहेत. परंतु, काँग्रेसच्या काहींनी भाजपशी हातमिळवणी करून काँग्रेसला अडचण व्हावी म्हणून नगराध्यक्ष व दहा नगरसेवक पदासाठी बंडखोर अपक्ष उमेदवार उभे केले.

प्रदेशाध्यक्ष हर्षवर्धन सपकाळ यांच्या सूचनेवरून उपाध्यक्ष ॲड. गणेश पाटील यांनी बंडखोरी नगराध्यक्षपदाचे उमेदवार महमदखाॅ पठाण, नगरसेवकपदाचे उमेदवार लक्ष्मीबाई वांजरवाडे, बालाजी कांबळे, साजिद करीम शेख, लक्ष्मी अमोल सोनकांबळे, दीपक चोपणे, पवन पोतदार, रंजना इंहजीत कांबळे, शाबाद युसुफजानी काद्री, यशोदा विश्वनाथ कांबळे यांची हकालपट्टी केल्याचे पत्र प्रसिद्ध केल्याची माहिती जिल्हाध्यक्ष अभय साळुंके यांनी दिली.

दरम्यान, निलंगा नगरपालिका निवडणुकीपासून स्वतःला अलिप्त ठेवत काँग्रेसचे प्रदेश उपाध्यक्ष अशोक पाटील निलंगेकर हे पडद्यामागून अनेक हालचाली करत असल्याची चर्चा आहे. पक्षाने त्यांच्याकडे प्रभारी म्हणून जालना जिल्ह्याची जबाबदारी दिली असली तरी ते तिकडेही फिरकले नाहीत. निलंग्यातील काँग्रेसमधील बंडखोरीला त्यांचीच फूस असल्याचा दावा विरोधकांकडून केला जात आहे. मात्र पक्षाकडून आज फक्त बंडखोरांवर कारवाई करण्यात आली आहे. यानंतर कारवाईचा बडगा कोणावर? याकडे सगळ्यांचे लक्ष असणार आहे.

5 FAQs (Marathi)

1. काँग्रेसने किती लोकांना पक्षातून काढले?
एकूण ११ बंडखोरांची हकालपट्टी करण्यात आली.

2. ही कारवाई का करण्यात आली?
पक्षशिस्त मोडणे आणि बंडखोरी केल्यामुळे.

3. घटना कुठे घडली?
निलंगा येथे.

4. या कारवाईचा राजकीय परिणाम काय होऊ शकतो?
स्थानिक पातळीवर राजकीय समीकरणे बदलू शकतात आणि निवडणूक प्रचारावर मोठा प्रभाव पडू शकतो.

5. पुढील पाऊल काय असेल?
संबंधित नेते स्वतंत्रपणे लढण्याची किंवा इतर पक्षात जाण्याची शक्यता आहे.