Khaire Visit Affected Farm : पिकं गेली, घरं पडली, जनावरे दगावली; शेतकऱ्यांचा किती अंत पाहणार ?

Marathwada : पावसाळ्यात अतिवृष्टीमुळे हैराण झालेला बळीराजा आता गारपीट आणि अवकाळीने संकटात सापडला आहे. हातातोंडाशी आलेला घास निसर्गाने हिरावून घेतला आहे. आता शेतकऱ्यांना (Affected Farmars) मदत नाही केली तर तो कुठलं पाऊल उचलेल हे सांगता येत नाही, त्यामुळे सरकारने गांभीर्याने घ्यावे. पिके गेली, घरे पडली, मुकी जनावरे दगावली, सरकार शेतकऱ्यांचा आणखी किती अंत पाहणार ? असा सवाल ठाकरे गटाचे नेते चंद्रकांत खैरे यांनी सरकारला केला.

नुकसानग्रस्त शेतकऱ्यांचे तातडीने पंचनामे करून आर्थिक मदत द्या, अशी मागणीही (Chandrakant Khaire) खैरेंनी यावेळी केली. कन्नड तालुक्यातील जेहुर, औराळा, चापानेर भागातील गावांत झालेल्याअवकाळी पाऊस आणि गारपिटीमुळे झालेल्या नुकसानीची त्यांनी पाहणी केली. (Kannad) रब्बी आणि खरीप पिकांचे अतोनात नुकसान झाले आहे. पूर्वीचे कर्ज फेडण्यासाठी पुन्हा काढलेले कर्ज फेडावं कसं ? मायबाप सरकार मदत करणार का ? ही चिंता शेतकऱ्यांच्या चेहऱ्यावर आहे.

कांदा, गहु ,उन्हाळी मका, बाजरी, फळबागा, भाजीपाला, द्राक्षे, आंबे, बीजवाई कांदा जमीनदोस्त झाले आहे. मुकी जनावरे देखील मोठ्या प्रमाणात दगावली. पावसाळ्यात झालेल्या अतिवृष्टीची नुकसानभरपाई अद्याप मिळालेली नाही. त्यात आता पुन्हा प्रशासन आणि अधिकाऱ्यांकडे कागदपत्र घेऊन चकरा माराव्या लागणार आहेत, असे खैरे म्हणाले.

मुंगसापूर येथील शेतकरी शिवाजी दाभाडे, जनार्दन दाभाडे यांचा संसार उघडा पडला. घरावरची पत्र उडाली, संसारउपयोगी साहित्याचे नुकसान झाले. अनेकांचे गोठे उडाले, कांदाचाळीत पाणी गेले, आता तरी सरकारने जागे होऊन मदत करावी, असे आवाहन खैरे यांनी केले. मार्च महिन्यात झालेल्या अवकाळी पावसाने बळीराजा संकटात सापडला होता. ती जखम ताजी असतांना गारपिटीने होत्याचे नव्हते केले.

अनेकांना आता रडण्याशिवाय पर्याय राहिला नाही. रात्र रात्र बळीराजा झोपला नाही, प्रशासन आणि सरकारने आता तरी शेतकऱ्यांना न्याय द्यावा, त्यांचे अश्रू पुसावेत अशी मागणी आमदार उदयसिंग राजपूत यांनी केली. ९ एप्रिल रोजी झालेल्या नुकसानीची पाहणी करून तातडीने विभागीय आयुक्त सुनील केंद्रेकर, जिल्हाधिकारी अस्तिककुमार पांडे यांची भेट घेऊन राजपूत यांनी त्यांना निवेदन दिले.