Dhananjay Munde Met Ajit Pawar : अजित पवारांसमोर धनंजय मुंडेंचे प्रेझेंटेशन; परळी वैद्यनाथ तीर्थक्षेत्र विकास आराखड्यासाठी वाढीव 83 कोटी!

Beed News : बारा ज्योतिर्लिंगांपैकी एक असलेले पाचवे श्री परळी वैद्यनाथ तीर्थक्षेत्र विकास आराखड्यासाठी वाढीव 83 कोटी रूपयांचा निधी देण्यास राज्याचे उपमुख्यमंत्री तथा अर्थमंत्री अजित पवार यांनी आज मान्यता दिली. आमदार धनंजय मुंडे यांनी जिल्हाधिकारी कार्यालयातील आढावा बैठकीत या संदर्भात मागणी केली होती. या वाढीव निधीमुळे आता हा आराखडा एकूण 351 कोटींचा झाला आहे.

पाचवे ज्योतिर्लिंग असलेल्या श्री वैद्यनाथ प्रभूंच्या मंदिर व परिसराच्या विकास कामांचा आज राज्याचे उपमुख्यमंत्री अजित पवार (Ajit Pawar) यांच्या अध्यक्षतेखाली जिल्हाधिकारी कार्यालयात आढावा घेण्यात आला. यावेळी विकास आराखड्याच्या माध्यमातून सध्या सुरू असलेल्या व नव्याने हाती घेण्यात येणाऱ्या विकास कामांचे सादरीकरण करण्यात आले.

मंदिर व परिसराचा विकास करताना पौराणिक महत्त्व अबाधित राखून अभूतपूर्व विकास कार्य करण्यात यावे, अशा सूचना अजित पवार यांनी संबंधित अधिकाऱ्यांना दिल्या. (Dhananjay Munde) वाहनतळ, मेरुगिरी पर्वत परिसरातील कामे, दर्शन मंडप, नंदी, शिव प्रतिमा, उद्यान, प्रवेशव्दारे यासह लागणाऱ्या अधिकच्या जमीन अधिग्रहण करण्याची जबाबदारी धनंजय मुंडे यांनी घेतली आहे. परंतु या वाढीव जागेसाठी निधीची आवश्यकता होती.

वाढीव जागेसह विविध कामांच्या पूर्ततेसाठी वाढीव निधीची तरतूद करण्याबाबत धनंजय मुंडे यांनी अजित पवार यांच्याकडे विनंती केली. ती लगेच मान्य केल्यामुळे या तीर्थक्षेत्र विकासासाठी अतिरिक्त 83 कोटींचा निधी मिळण्याचा मार्ग मोकळा झाला आहे. आता हा आराखडा 268.68 कोटिंवरून 351 कोटी इतका वाढवण्यास मान्यता दिली आहे.

या कामाला गती व निधी मंजूर करता यावा यासाठी हे काम नियोजन विभागाकडे वर्ग करण्यास अजित पवारांनी मान्यता दिली. याबद्दल अजित पवार व संबंधितांचे परळीकरांच्या व सर्व शिवभक्तांच्या वतीने धनंजय मुंडे यांनी आभार व्यक्त केले. अजित पवारांच्या उपस्थितीत परळी वैद्यनाथ तीर्थक्षेत्र विकास आराखड्याचे धनंजय मुंडे यांनी स्वतःअजित पवार यांच्यासमोर प्रेझंटेशन दिले.