Sanjay Shirsat On Sushma Andhare : सुषमा अंधारे यांच्याबद्दल प्रश्न विचारू नका, माझ्यासासाठी तो विषय संपला..

Chhatrapati Sambhajinagar : आमदार संजय शिरसाट यांच्याविरोधात ठाकरे गटाच्या उपनेत्या सुषमा अंधारे (Sushma Andhare) यांनी विनयभंग आणि तीन रुपयांचा अब्रुनुकसानीचा दावा दाखल केला आहे. यानंतर पुन्हा या प्रकरणाची चर्चा सुरू आहे. यावर माध्यमांनी प्रश्न विचारताच मात्र आमदार संजय शिरसाट चांगलेच संतापले.

अंधारेंना इतकी प्रसिद्धी का देता? अशाने आपले वजन वाढले असा त्यांचा समज होतो. त्यांच्याबद्दल मला प्रश्न विचारत जावू नका, माझ्यासाठी तो विषय आता संपला आहे. (Shivsena) त्यांनी पाठवलेल्या नोटीसीला मी कायदेशीरपणे उत्तर देईन, असेही शिरसाट म्हणाले. (Sanjay Shirsat) शिरसाट व अंधारे यांच्यात आता आरोप-प्रत्यारोप आणि कायदेशीर लढाई सुरू झाली आहे.

दोन आठवड्यांपुर्वी संजय शिरसाट यांनी शिवसेनेच्या एका मेळाव्यात बोलतांना अंधारे यांच्याबद्दल अवमानकारक भाषा वापरली होती. यावरून ठाकरे गटाने शिरसाट यांच्याविरोधात रान पेटवले होते. अनेक पोलिस ठाण्यात शिरसाट यांच्या विरोधात विनयभंगाच्या तक्रारी दाखल करण्यात आल्या होत्या. या शिवाय महिला आयोगाकडे देखील तक्रार करण्यात आली होती.

तर काल अंधारे यांनी शिरसाट यांच्या विरोधात तीन रुपयांचा अब्रुनुकसानीचा दावा दाखल केला. या सगळ्यावर माध्यमांनी जेव्हा विचारले तेव्हा शिरसाट म्हणाले, अंधारे यांच्याबद्दल प्रश्न विचारत जावू नका, का त्यांना एवढी प्रसिद्धी तुम्ही लोक देत आहात. माझ्या दृष्टीने हा विषय संपला आहे. माझ्यावर त्यांनी जो गुन्हा, दावा दाखल केला आहे, त्याला मी कायदेशीरपणे उत्तर देईन.

विनयभंगाच्या तक्रारी, खटले दाखल करणे हा अंधारे यांचा छंद आहे. काही जुनी प्रकरणं माझ्याकडे देखील आली आहेत. २०१२ मध्ये त्यांनी अशाच प्रकारे दोन तरुणांविरुद्ध विनयभंगाचा गुन्हा दाखल केला होता. पुढे न्यायालयात हे दोन्ही तरूण निर्दोष असल्याचे सिद्ध झाले. तर अशी अनेक प्रकरणं आहेत, त्यामुळे त्यांना काय करायचे ते करू द्या, कृपया मला त्यांच्याबद्दल विचारत जावू नका, अशी विनंती देखील शिरसाट यांनी माध्यमांना केली.