Maharashtra Politics : तुम्हाला मुख्यमंत्री व्हायचं होतं तर पोराला...; बंडू जाधवांचा ठाकरेंना घरचा आहेर

MP Bandu Jadhav on Uddhav Thackeray : सात महिन्यांपूर्वी शिवसेनेत उभी फूट पडली. शिवसेनेचे ४० आमदार फुटून भाजपला मिळाले. त्यामुळे महाविकास आघाडी सरकार कोसळले. त्यानंतर निवडणूक आयोगाने शिंदे गटास शिवसेना पक्षाचे नाव आणि धनुष्यबाण चिन्हही दिले. परिणामी ठाकरे गटावर नामुष्कीची वेळ आली आहे. त्यातूनही ठाकरे गटाकडून जोरदार हल्लाबोल केला जात आहे. आपली बाजू लोकांसमोर मांडण्यासाठी ठाकरे गटाने चांगलीच ताकद लावल्याचे दिसून येत आहे.

सध्या ठाकरे गटाकडे ५५ मधून आता १५ आमदार आणि १८ मधून फक्त पाच खासदार राहिले आहेत. ते ठाकरे गटाची बाजू लावून धरताना दिसत आहेत. परभणीचे (Parbhani) खासदार बंडू जाधवांनी आज शिंदे गटाने का गद्दारी केली याचा उलगडा करण्याचा प्रयत्न केला. यावेळी त्यांनी उद्धव ठाकरे यांच्या कार्यपद्धतीवर नाराजी व्यक्त करीत टीका केली. सरकार असूनही लाभ घेता आला नसल्याची खंतही जाधव यांनी यावेळी व्यक्त केली.

खासदार बंडू जाधव (Bandu Jadhav) म्हणाले, "महाविकास आघाडीचे सरकार अडीच वर्षे होते. त्या काळात कोरोना सुरू झाला. कोरोनाचा काळ असाच गेला. त्या काळात ज्या पद्धतीने सत्तेचा लाभ मिळायला हवा होता, तो आम्हाला मिळालाच नाही. यासारखे दुःख दुसरे कुठलेच असू शकत नाही. त्या काळात उद्धव साहेबांनी पक्ष संघटनेकडे ज्या पद्धतीने बघायला पाहिजे होते, किंवा कुणाला तरी बघायला अधिकार द्यायला हवे होते, तसे काही घडले नाही. त्यामुळेच आमच्यावर ही परिस्थिती ओढवली आहे, ही वस्तुस्थिती आहे. म्हणून या चोरांना संधी मिळाली."

जाधव यांनी यावेळी उद्धव ठाकरे (Uddhav Thackeray) यांच्यावर टीका करून घरचा आहेरही दिला. उद्धव ठाकरे यांना उद्देशून जाधव म्हणाले, "तुम्हाला मुख्यमंत्री व्हायचे होते तर पोराला मंत्री करायला नको होते. पोराला मंत्री करायचे होते तर तुम्ही मुख्यमंत्री व्हायला नको होते. पण दोघांनीही खुर्च्या आटवल्याने चोरांची भिती वाढली. बाप गेला तर मुलगा वरचढ होईल, त्याच्यापेक्षा मी जर वेगळी चूल मांडली तर काय होईल, या विचारातूनच गद्दारी झाली."