Manoj Jarange : 'मी मुंबईला आलो, तर परत जाणार नाही'; मनोज जरांगेंची आता मराठा आरक्षणासाठी 'आरपार'ची लढाई

Mumbai Maratha protest : सामाजिक न्यायमंत्री संजय शिरसाट यांनी आंतरावली सराटी इथं मराठा आंदोलक मनोज जरांगे पाटील यांची भेट घेतली.

या भेटीत मराठा समाजाशी निगडीत असलेल्या विविध प्रश्नांवर चर्चेबरोबर विधानसभा अधिवेशनात मराठा आरक्षणाचा मुद्दा मार्गी लावण्याची मागणीबरोबरच जात पडताळणी प्रमाणपत्रांना लागणाऱ्या वेळामुळे विद्यार्थ्यांचे शैक्षणिक नुकसान टाळा, अशी मागणीही जरांगे पाटील यांनी केली. तसंच मराठा आरक्षणासाठी 29 ऑगस्टच्या आंदोलनावर ठाम असल्याचा इशारा दिला.

मनोज जरांगे पाटील यांनी मंत्री शिरसाट यांच्याबरोबर झालेल्या चर्चेत विधानसभा अधिवेशनात मराठा (Maratha) आरक्षणाचा मुद्दा मार्गी लावावा, यावर अधिक जोर दिला. मी 29 ऑगस्टपर्यंत काहीही बोलणार नाही. मी मुंबईला आलो, तर परत जाणार नाही, असा इशारा जरांगे पाटलांनी दिला.

महायुतीमधील (Mahayuti) मंत्री शिरसाट यांनी आंतरवाली सराटी इथं आले होते. यावेळी जात पडताळणी प्रमाणपत्रावरून दोघांत चर्चा झाली. राज्यातील अनेक विद्यार्थ्यांना जात पडताळणी प्रमाणपत्र मिळत नाही. याबाबत अधिकाऱ्यांकडून अडवणूक केली जात असल्याचे जरांगे पाटलांनी निदर्शनास आणून दिले.

अधिकारी सरकारला बदनाम करतात

‘सरकारकडून काम होतात. मात्र, अधिकारी चालढकल करत आहे. शिरसाट यांनी अशा अधिकाऱ्यांना निलंबित करावे. काही अधिकारी सामाजिक न्याय विभाग आणि सरकारला बदनाम करत आहे. नोंदी आहेत, तरीही जात पडताळणी साठी वेळ लावत आहेत. यामुळे विद्यार्थ्यांचे शैक्षणिक नुकसान होते', असेही जरांगे पाटील यांनी म्हटले.

जात पडताळणी प्रकरणावर सूचना

यावर मंत्री शिरसाट यांनी पडताळणी प्रमाणपत्रांमुळे विद्यार्थ्यांचे शैक्षणिक नुकसान होऊ नये, अशी आमची भूमिका आहे. सामाजिक न्याय विभागाला, मुख्य सचिवांना फोन करून जात पडताळणी प्रमाणपत्र निकाली काढण्याच्या सूचना दिल्या.

कोण आपलं आणि कोण परकं

आम्ही राज्यातील प्रत्येक आमदार, खासदार, मंत्री, दोन्ही उपमुख्यमंत्री आणि मुख्यमंत्री यांना आंतरवाली सराटी इथं बोलावणार आहोत. मराठा समाजाच्या आरक्षणाचा विषय येणाऱ्या या अधिवेशनात मार्गी लावा. जे खासदार, आमदार, मंत्री आले ते आपले. जे नाही आलेत, त्यावरून मराठा समाजाला कळेल की कोण आपले आणि कोण परके, अशी भूमिका जरांगे यांनी मांडली आहे.