Jitendra Awhad : जितेंद्र आव्हाड पिसाळलेले; त्यांच्या बापजाद्यांची हीच भूमिका का?; नरेंद्र पाटलांचा घणाघात

Narendra Patil News : मुंब्र्यात भोंग्याचा आवाज वाढल्याने जितेंद्र आव्हाड पिसाळले आहेत. ते स्वत:च कोण हे विसरलेले असल्याचे गंभीर वक्तव्य अण्णासाहेब पाटील आर्थिक मागास विकास महामंडळाचे अध्यक्ष नरेंद्र पाटील यांनी केलंय. जितेंद्र आव्हाड घेत असलेली भूमिका त्यांच्या बापजाद्यांची पण आहे का, असा सवालही नरेंद्र पाटील यांनी यावेळी केला आहे.

अण्णासाहेब पाटील आर्थिक मागास विकास महामंडळाच्या कामकाजाचा आढावा घेण्यासाठी जिल्ह्यात आलेल्या नरेंद्र पाटील (Narendra Patil) यांनी मंगळवारी पत्रकारांशी संवाद साधला. त्यावेळी त्यांनी जितेंद्र आव्हाड यांच्यावर घणाघात केला. तसेच आव्हाड यांच्या वक्तव्यांवरून पाटील यांनी राष्ट्रवादीचे अध्यक्ष शरद पवार (Sharad Pawar) यांच्यावरही निशाणा साधला.

राष्ट्रवादीचे जितेंद्र आव्हाड (Jitendra Awhad) यांनी केलेल्या वक्तव्यांचा नरेंद्र पाटील यांनी समाचार घेतला. आव्हाड यांनी जिजाऊंनी महिलांवरील अत्याचार पाहिल्यानंतर छत्रपती शिवाजी महाराज यांना महिलांवरील अत्याचाराविरोधात माहिती दिली. त्यांना तयार करुन प्रशिक्षीत केले.

त्यानंतर शिवाजी महाराजांनी रायरेश्वरावर हिंदवी स्वराज्याची शपथ घेतली. तेव्हा अफजलखान, शाईस्तेखान भारताबाहेर होते, अशी वक्तव्ये केली आहेत. या वक्तव्यांवर राष्ट्रवादीचे वरिष्ठ नेते सहमत आहेत का, असाही प्रश्न त्यांनी यावेळी उपस्थित केला.

जितेंद्र आव्हाड जी भूमिका घेताहेत ती त्यांच्या बापजाद्यांची आहे का, असा सवाल करत राष्ट्रवादीचे अध्यक्ष शरद पवार, विरोधी पक्षनेते अजित पवार (Ajit Pawar), राष्ट्रवादीचे प्रदेशाध्यक्ष जयंत पाटील (Jayant Patil) यांना त्यांची भूमिका स्पष्ट करण्याचे आव्हानही पाटील यांनी यावेळी केलं आहे. नाहीतर त्यांनी आव्हाडांना उत्तर मागावे, असे आवाहन केले. तसेच त्यांचीही तीच सर्वांची भूमिका असेल तर आडनावे बदलावीत, अशी टीकाही नरेंद्र पाटील यांनी केली आहे.

पत्रकार परिषदेला भाजपचे माजी जिल्हाध्यक्ष रमेश पोकळे, गोरख शिंदे, रवी शिंदे उपस्थित होते.