Manoj Jarange Patil : मराठ्यांच्या मनात ज्वालामुखीसारखी आग! देशमुख कुटुंबाला न्याय मिळेपर्यंत लढा देण्याचा मनोज जरांगे यांचा इशारा

Massajog News : संतोषभैय्या देशमुख यांची क्रूरपणे हत्या करणाऱ्यांची आठवण धन्या मुंडेला येते, यावरून या हत्या प्रकरणात त्याचाही हात असल्याचे एकप्रकारे त्याने कबुलीच दिली आहे. अशा लोकांना अजित पवार आणि त्यांचा पक्ष पाठीशी घालतो. मुख्यमंत्री देवेंद्र फडणवीस हे त्याच्यावर कारवाई करत नाहीत, मग तुमचाही यात हात आहे का? अशी शंका उपस्थितीत होते. मराठा समाज शांत आहे, पण संतोष भैय्या देशमुख यांच्या कुटुंबाला न्याय दिल्याशिवाय आम्ही स्वस्थ बसणार नाही. मराठ्यांच्या मनात ज्वालामुखीसारखी आग असल्याचा इशारा मनोज जरांगे पाटील यांनी दिला.

मस्साजोगचे सरपंच संतोष देशमुख यांची खंडणी प्रकरणातून अपहरण आणि त्यानंतर झालेली निर्घृण हत्या या घटनेला आज एक वर्ष पूर्ण झाले. या पहिल्या पुण्यस्मरणाच्या दिवशी मस्साजोग येथे सगळ्या राजकीय पक्षाच्या नेत्यांनी आज आवर्जून हजेरी लावली. मराठा आरक्षण आंदोलक मनोज जरांगे पाटील यांनीही संतोष देशमुख यांना श्रद्धांजली अर्पण केली आणि त्यानंतर बीड जिल्हाच नाही तर संपूर्ण राज्यातील मराठा समाज हा या कुटुंबाच्या पाठीशी भक्कमपणे उभा असल्याची ग्वाही दिली. जोपर्यंत या कुटुंबाला न्याय मिळत नाही, तोपर्यंत समाज त्यांना वाऱ्यावर सोडणार नाही.

एका कुटुंबाचा आधार गेला, संतोषभैय्या देशमुख यांच्या मुलांना आज वर्ष झाले घरात बाप दिसत नाही अन् त्यांचे खूनी, त्यांना आश्रय देणारे भाषण ठोकतात. निर्घृण करणाऱ्यांची आठवण काढतात? ही नीच वृत्ती ठेचावी लागेल. समाज, नेते आणि सर्वसामान्यांना आता आपल्यालाच सांभाळावे लागेल. आतापर्यंत आपण अजित पवार किंवा त्यांच्या पक्षावर टीका केली नाही. पण संतोष देशमुखांची हत्या करणाऱ्या आरोपींची आठवण त्यांच्या पक्षाचा आमदार धन्या मुंडे काढतो? त्याच्यावर अजित पवार काहीच कारवाई करत नाही, मुख्यमंत्री त्याला पाठीशी घालत असतील तर आता आम्हाला शांत बसून चालणार नाही.

अजूनही वेळ गेलेली नाही, धन्या मुंडेलो संतोषभैय्यांच्या हत्या प्रकरणात सहआरोपी करा, अशी मागणी मनोज जरांगे पाटील यांनी यावेळी केली. आपण आतापर्यंत कोणत्याही राजकीय नेत्याच्या घराची पायरी चढलो नाही. पण धनंजय देशमुख म्हणत असतील तर संतोषभैय्यांना न्याय मिळावा यासाठी मी तुमच्यासोबत मुख्यमंत्री देवेंद्र फडणवीस यांच्याकडे यायला तयार आहे. एकदा त्यांना भेटून सांगूच आणि या प्रकरणाचा सोक्षमोक्ष लावू. मी वैयक्तिक राजकारणासाठी कधी कोणाच्या दारात जाणार नाही. पण तुम्ही सांगाल तेव्हा तुमच्यासोबत येईल, असेही मनोज जरांगे पाटील यांनी मस्साजोगकरांशी बोलताना स्पष्ट केले.

धनंजय देशमुखांनी खचून जाऊ नये, ते खचले तर कुटुंब खचेल अन् कुटुंब खचले तर गाव खचेल याचा परिणाम आपल्या न्यायाच्या लढाईवर होईल. आम्ही या कुटुंबाला कधीही एकटं पडू देणार नाही, संतोषभैय्या देशमुखांचे आरोपी फाशीवर चढेपर्यंत आम्ही सोबत असू, अशी ग्वाही जरांगे पाटील यांनी यावेळी दिली. संतोष देशमुख यांच्या हत्येचा तपास आणि या प्रकरणाला गती मिळत नाहीये. पण संतोष देशमुख यांच्या हत्येचं प्रकरण आम्ही दबू देणार नाही. कुणाचा बाप आला तरी आम्ही हा मुद्दा सोडणार नाही. कुटुंबाला न्याय मिळेपर्यंत मराठा समाज शांत बसणार नाही. सरकारची गाठ मराठ्यांसोबत आहे, असा इशाराही जरांगे पाटील यांनी यावेळी दिला.

अजित पवारही मस्साजोगमध्ये..

राज्याचे उपमुख्यमंत्री अजित पवार यांनीही मस्साजोगमध्ये भेट देऊन संतोष देशमुख यांची मुलगी वैभवी, भाऊ धनंजय व कुटुंबियांची भेट घेत त्यांच्याशी चर्चा केली. वर्ष झाले तरी आम्हाला न्याय मिळाला नाही, अशी खंत वैभवी यांनी यावेळी बोलून दाखवली. धनंजय देशमुख यांनीही प्रकरण दाबले जात असल्याचे सांगत अजित पवारांना लक्ष घालण्याची विनंती केली.

यांनीही दिली भेट..

संतोष देशमुख यांच्या प्रथम पुण्यस्मरणाच्या निमित्ताने बीडचे खासदार बजरंग सोनवणे, भाजपचे आमदार सुरेश धस, बीडचे संदीप क्षीरसागर, शिवसेना उद्धव बाळासाहेब ठाकरे पक्षाचे नेते अंबादास दानवे, केजचे अक्षय मुंदडा आदींनी मस्साजोगमध्ये जाऊन संतोष देशमुख यांना श्रद्धांजली अर्पण केली. आरोपींना फाशी झाल्याशिवाय आम्ही स्वस्थ बसणार नाही, अशा भावना या नेत्यांनी व्यक्त केल्या.

FAQs

1. संतोष देशमुख प्रकरण काय आहे?
देशमुख यांच्या मृत्यूबाबत संशय व्यक्त केला गेला असून निष्पक्ष तपास व न्यायाची मागणी होत आहे.

2. मनोज जरांगे पाटील काय म्हणाले?
देशमुख कुटुंबाला न्याय मिळावा म्हणून मुख्यमंत्री फडणवीसांची भेट घेण्याची तयारी व्यक्त केली.

3. पुढील आंदोलनाची शक्यता आहे का?
होय, त्यांनी न्याय न मिळाल्यास आंदोलन उग्र करण्याचा इशारा दिला आहे.

4. विरोधकांची भूमिका काय आहे?
विरोधकांनी सरकारवर दबाव वाढवून तातडीने कारवाईची मागणी केली आहे.

5. या प्रकरणाचा परिणाम काय झाला आहे?
महाराष्ट्रातील राजकीय वातावरण तापले असून समाजात मोठी प्रतिक्रिया उमटली आहे.