Manoj jarange News : मनोज जरांगेंनी घेतली संभाजीराजेंची बाजू ; म्हणाले, 'एकाकी नाहीत...'

Beed News : शिक्षक, डॉक्टर आणि वकिलांच्या मेळाव्यातील भाषणादरम्यान अचानक अशक्तपणा व रक्तदाब कमी झाल्याने बीड येथे उपचार घेत असलेल्या मराठा आरक्षण आंदोलक मनोज जरांगे यांना शनिवारी सुटी देण्यात आली. 20 तासांच्या उपचारानंतर त्यांची प्रकृती स्थिर झाली. दरम्यान, संभाजीराजे हे एकाकी नाहीत आपण त्यांच्यासोबत आहोत, असे मनोज जरांगे पाटील यांनी माध्यमांशी बोलताना स्पष्ट केले.

शुक्रवारी (ता. 28) रात्री मेळाव्यासाठी आलेल्या जरांगे यांची भाषणादरम्यान प्रकृती बिघडली. त्यांना रात्री दहा वाजता येथील मेडीकेअर रुग्णालयात उपचारासाठी दाखल करण्यात आले होते. डॉ. सुनील बोबडे, डॉ. प्रदीप शेळके, डॉ. संकेत बाहेती या तज्ज्ञांनी त्यांच्या विविध चाचण्या करुन उपचार केले.

शरीरातील पाणी कमी झाल्याने त्यांचा रक्तदाब कमी होऊन त्यांना अशक्तपणा आला होता. शनिवारी सहा वाजता जरांगे यांची प्रकृती स्थिर झाल्याने त्यांना रुग्णालयातून सुटी देण्यात आली. दरम्यान, जरांगेंना भेटण्यासाठी समर्थकांची रुग्णालय परिसरात रात्रीपासून ते शनिवारी दिवसभर मोठी गर्दी होती. दरम्यान, यावेळी महंत शिवाजी महाराज नारायणगडकर यांनी मनोज जरांगेंची भेट घेतली.

कुत्रे, मांजरावरून जातीय तेढ

संभाजीराजे एकाकी नाहीत आपण त्यांच्यासोबत आहोत, असे मनोज जरांगे पाटील यांनी माध्यमांशी बोलताना सांगितले. कुत्रे आणि मांजरावरून जातीय तेढ निर्माण करण्याचा प्रयत्न केला जात आहे. मात्र, या मुद्द्यावर भूमिका घेणारे संभाजीराजे एकाकी नाहीत, आपण त्यांच्या सोबत आहोत.

संतोष देशमुख यांना न्याय द्यायचा असेल तर आरोपी फासावर गेले पाहिजेत. मात्र, अलीकडे समोर येत असलेल्या माहितीवरुन सरकारला याच गांभीर्य दिसत नाही. या प्रकरणात पोलिसांना देखील सहआरोपी केले पाहिजे, अशी मागणीही जरांगेंनी केली.

दुर्लक्ष करणारे पोलीस मारणाऱ्यांपेक्षा दोषी आहेत, त्यांच्यावरही कारवाई केली पाहीजे. अधिकाऱ्यामुळेच खून झाल्याचा आरोपही त्यांनी केला. या प्रकरणाला दुसरीकडे नेण्याचा डाव असल्याचा संशयही व्यक्त करतानाच यात धनंजय मुंडे यांचीही खेळी असू शकते, असा आरोप जरांगेंनी केला.

(२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)