Jalna Protest News : एसटी गाड्यांची जाळपोळ करणाऱ्या ५२ जणांवर गुन्हा दाखल ; सातव्या दिवशी उपोषणकर्ते मागणीवर ठाम..

Jalna News : मराठा आरक्षणाची (Maratha Reservation) मागणी करणाऱ्या आंदोलकांवर झालेल्या लाठीमारांनंतर राज्यभर अनेक ठिकाणी आंदोलनाला हिंसक वळण लागले, जालन्यात एसटी गाड्यांची जाळपोळ करण्यात आली. या प्रकरणी ५२ जणांवर गुन्हा दाखल करण्यात आला आहे.

जालना येथे झालेल्या लाठीमारावरुन राज्यभरात वातावरण तापल्यानंतर एकाच दिवसात जालन्यात १६ एसटी बस जाळण्यात आल्या. तीन एसटी बसची तोडफोड करण्यात आली. या जाळपोळ प्रकरणात ४ कोटी ६० हजार रुपयांचे नुकसान झाले असल्याचे जालना परिवहन विभागाकडून सांगण्यात येत आहे.

वाहनाची तोडफोड केल्याप्रकरणी आंदोलकावर गुन्हे दाखल करण्यात आले आहेत. याबाबत परिवहन नियंत्रकांनी गोंदी पोलीस ठाण्यात गुन्हा दाखल केला आहे. बदनापूर शहरातही सरकारी वाहनांची जाळपोळ केल्याप्रकरणी गुन्हा दाखल करण्यात आला आहे.

सातव्या दिवशीही मराठा आरक्षणाच्या मागणीसाठी अंतरवाली सराटी गावातील उपोषणकर्ते आपल्या मागणीवर ठाम आहेत. सातव्या दिवशी ही गावात तणावपूर्ण शांतता आहे. सर्व पक्षांच्या नेत्यांनी उपोषणकर्त्यांच्या भेटी-गाठी सुरु केल्या आहेत. त्यातच पोलिसांनी मात्र या आंदोलन स्थळापासून काढता पाय घेतला आहे. पोलिसांनी सार्वजनिक मालमत्तेचे नुकसान केल्याप्रकरणी गोंदी पोलीस ठाण्यात साडेतीनहून अधिक जणांविरुद्ध गुन्हा दाखल केला आहे.

जालना जिल्ह्यात झालेल्या लाठीहल्याचे पडसाद संपूर्ण राज्यभरात उमटत आहेत. नांदेड जिल्ह्यात खबरदारीचा उपाय म्हणून नांदेड परिवहन विभागाने बस सेवा बंद करण्याचा निर्णय घेतला आहे. काल (शनिवारी) लांब पल्ल्याच्या गाड्या बंद केल्या होत्या. परंतु आज संपूर्ण बससेवा बंद करण्यात आली आहे. बससेवा बंद करण्यात आल्याने प्रवाशाचे मोठे हाल होत आहेत.

Edited By : Mangesh Mahale