Imtiyaz Jaleel News : फडणवीस गृहमंत्री, मग त्यांना छत्रपती संभाजीनगरची दंगल..?खासदार जलील यांचा गंभीर आरोप

Chhatrapati SambhajiNagar : राज्याचे उपमुख्यमंत्री देवेंद्र फडणवीस यांनी छत्रपती संभाजीनगरमधील दंगल ही पूर्वनियोजित होती असा खळबळजनक दावा केला होता. यावरुन छत्रपती संभाजीनगरचे एमआयएमचे खासदार इम्तियाज जलील यांनी मोठं विधान केलं आहे. फडणवीस हे गृहमंत्री आहेत, त्यांना ही दंगल पूर्वनियोजित आहे सांगण्यासाठी एवढा वेळ का लागला असा सवाल उपस्थित केला आहे.

इम्तियाज जलील (Imtiyaz Jaleel) यांनी छत्रपती संभाजीनगर येथे माध्यमांशी संवाद साधला. यावेळी त्यांनी फडणवीसांच्या आरोपावर भाष्य केलं आहे. जलील म्हणाले, देवेंद्र फडणवीस आता म्हणत आहेत की, ही दंगल पूर्वनियोजित आहे. मी हे पहिलेच सांगितलं आहे. जेव्हा राज्य सरकारने प्रतिसाद दिला नाही, तेव्हा मी प्रधानमंत्री आणि केंद्रीय गृहमंत्र्यांना पत्र पाठवलेले आहे.

आता फडणवीसांना विनंती करतो की, त्यांच्या पार्टीचे दोन केंद्रीय मंत्री असून राज्याचे एक मंत्री देखील आहेत. छत्रपती संभाजीनगरमधील दंगलीची उच्चस्तरीय चौकशीची मागणी उचलून धरा असंही जलील यावेळी म्हणाले.

देवेंद्र फडणवीस हे गृहमंत्री आहेत, त्यांना एवढा वेळ का लागला की ही दंगल पूर्वनियोजित आहे सांगण्यासाठी असा सवाल उपस्थित केला आहे. तसेच घटनेच्या पहिल्या दिवसापासून मी ही दंगल पूर्वनियोजित आहे असं सांगत आलो आहे. तसेच मी जे प्रश्न उपस्थित केले होते त्या प्रश्नाचा आधार घेऊनच फडणवीस ही दंगल पूर्वनियोजित असल्याचं मत व्यक्त करत आहे. मात्र,खुर्चीवर बसून सुद्धा फडणवीस यांना पूर्वनियोजित दंगल असल्याचं सांगायला एवढा वेळ लागला हे दुर्दैव असल्याचंही जलील यांनी सांगितले.

छत्रपती संभाजीनगरमधील पूर्वनियोजित दंगल कोणी घडवून आणली हे मला माहित असलं तरी सांगणार नाही. कारण ही दंगलीमागील मास्टरमाईंड शोधून काढण्याची जबाबदारी तुमची आहे. याचवेळी दंगलीची निवृत्त न्यायाधीशांकडून या हिंसाचाराची चौकशी करण्यात यावी अशी मागणी देखील जलील यांनी केला आहे. भारतीय जनता पार्टीने देशातून संविधान मिटवायचा निश्चय केला आहे. आणि त्या दृष्टीने त्यांचं काम देखील सुरु असल्याचा आरोपही जलील यांनी केला आहे.

(Edited By Deepak Kulkarni)