Maratha Reservation : मराठा समाजाच्या आरक्षणाचा प्रश्न निकाली न लागल्यास यावेळी इतिहास घडवणार. मुंबईत जाणारच, आरक्षण मिळवल्याशिवाय परतायचे नाही. सरकार कितीही अडथळे आणो, पोलिस कितीही ताकद लावोत, आता मागे फिरायचे नाही. मुंबई आमची आहे, राज्य आमचे आहे, आणि हक्काचं आरक्षणही आमचंच आहे, असा इशारा मराठा आरक्षण आंदोलनाचे नेतृत्व करणारे मनोज जरांगे यांनी दिला. 29 जाती ओबीसीत घातल्या, मग सरकारला मराठ्यांचेच वावडे का? असा सवाल जरांगे पाटील यांनी केला.
बीड तालुक्यातील मांजरसुंबा येथे गाव बैठकी निमित्त इशारा सभेचे आयोजन करण्यात आले होते. या सभेला मार्गदर्शन करताना मनोज जरागे पाटील यांनी मुख्यमंत्री देवेंद्र फडणवीस (Devendra Fadnavis) यांच्यावर टीका केली. बाबांनो, ताकद मोठी आहे, ज्यांना आमच्याबद्दल विचारही करायचा नाही, त्यांच्यासाठी लेकरांचे नुकसान होऊ देऊ नका. आम्ही शांततेत लढतोय, आमच्या मुलांना विनाकारण डिवचू नका. आम्ही पोलिसांना कधीही त्रास दिला नाही, पण आमच्या आंदोलनाला दबावाखाली तोडायचा प्रयत्न केलात तर तो तुमच्याच गळ्यात पडेल, असा इशाराही जरांगे यांनी यावेळी दिला.
27 ऑगस्टला अंतरवलीतून निघणार आणि 29 ला मुंबई गाठणार. गणपती बाप्पाला सोबत घेऊन लढाईला पूर्णविराम देऊ. मुंबईत मराठ्यांना येऊ द्यायचं नाही, यासाठी काहींचे षड्यंत्र सुरू आहे, पण आपण गणपती घेऊन मुंबईत घुसणारच. (Manoj Jarange Patil) मराठा समाज शांततेने आंदोलन करणार आहे. दगडफेक, जाळपोळ, तोडफोड करणारे आपले नाहीत. असा कोणी प्रयत्न केला तर लगेच पकडून पोलिसांच्या हवाली करा. आंदोलनाचा उद्देश फक्त हक्काचं आरक्षण असल्याचे त्यांनी स्पष्ट केले.
मुख्यमंत्री इतर नेत्यांना कोपरांनी मारतात, पण समाजाचा प्रश्न सोडवत नाहीत. त्यांनी 29 जातींना ओबीसीत घेतले, मग मराठा समाजाला का डावलले? हैद्राबाद गॅझेट लागू का करत नाहीत, कुणबी नोंदी सापडल्या तरी अंमलबजावणी होत नाही. मराठा समाजाबद्दल एवढा खुन्नस का? असा सवाल करत मराठ्यांचा प्रश्न सुटला तर त्यांचा खोटा राजकीय डाव उघड होईल, अशी भीती सरकारला असल्याचे जरांगे पाटील म्हणाले.
समाजाने नेत्यांच्या मागे पळू नका, त्यांच्या दबावाला बळी पडू नका. आपल्या जातीसाठी एक व्हा, असे आवाहन जरांगे पाटील यांनी मराठा समाजाच्या आमदार, मंत्र्यांना केले. राजकारणाचा विचार नका करू, तुमच्या लेकरांचा शाप घेऊ नका. मुंबईत जाण्याची तयारी सुरू करा. गावोगाव फोन करा डॉक्टर, वकील, शिक्षक, नेत्यांनी आपल्या गाड्या बाहेर काढाव्यात, असे आवाहनही जरांगे पाटील यांनी केले.
मराठा – ओबीसीमध्ये भांडण लावण्याचे प्रयत्न सुरू आहेत, पण आम्ही ते होऊ देणार नाही. आमचा लढा जातिवादासाठी नाही, हक्कासाठी आहे. हिंदू संस्कृती, वारकरी परंपरा जपत आम्ही हे आंदोलन करतोय. चार महिन्यांपासून मागणी करतोय, आमची चूक काय? आम्ही आरक्षणाशिवाय माघार घेणार नाही. आरक्षण भेटले नाही तर भाजप आमदारांना गावात फिरू देणार नाही. मुंबईत त्रास दिला तर राज्य बंद करू. आमच्या शांततेचा गैरफायदा घेऊ नका. मराठे उठले तर राज्यातील कोणतीही ताकद त्यांना थांबवू शकत नाही, असा इशाराही मनोज जरांगे यांनी दिला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.