Rajesh Vitekar News : राजेश विटेकरांचा दुर्राणींना धक्का; संधी मिळताच केला करेक्ट कार्यक्रम

Parabhni News : लोकसभा निवडणुकीपासूनच आमदार राजेश विटकर व माजी आमदार बाबाजानी दुर्राणी यांच्यातील मतभेद चव्हाट्यावर आले होते. राष्ट्रवादी काँग्रेस अजित पवार गटात असल्यापासूनच दोघात मतभेद होते. लोकसभा निवडणुकीपासूनच दुर्राणींना विधानपरिषदेवर पुन्हा संधी मिळणार नसल्याचे लक्षात आले होते. त्यामुळेच 27 जुलैला दुर्राणी यांनी शरद पवार यांच्या गटात प्रवेश केला होता. त्याच वेळी विटेकरांनी संधी मिळताच करेक्ट कार्यक्रम करणार असल्याचे स्पष्ट केले होते.

विधान परिषद निवडणुकीत विजय मिळवल्यानंतर राजेश विटेकरांनी परभणी जिल्ह्यातील राष्ट्रवादी काँग्रेस (Ncp) अजित पवार गटाची सर्व सूत्रे हातात घेतली. त्यानंतर लगेचच पाथरी तालुका संजय गांधी निराधार समिती बरखास्त करीत अध्यक्ष असलेल्या बाबाजानी दुर्राणी (Babajani Durrani) यांची उचलबांगडी केली होती. त्यांच्या जागी शिवसेना शिंदे गटाचे आसेफ खान यांची वर्णी लावली. त्यामुळे दुर्राणी यांना मोठा धक्का बसला आहे. (Rajesh Vitekar News)

लोकसभा निवडणुकीनंतर दुर्राणी यांनी विधानपरिषद निवडणुकीत राजेश विटेकर (Rajesh Vitekar) यांना उमेदवारी मिळणार हे गृहीत धरून या सर्व प्रक्रियेपासून ते दूर राहिले होते. त्यानंतर आमदारकीचा कार्यकाळ संपण्यास एक दिवस शिल्लक असताना त्यांनी 27 जुलैला शरद पवार यांच्या गटात प्रवेश केला होता. त्यांनी शरद पवार यांच्या गटात प्रवेश केल्यानंतर परभणी जिल्ह्यातील वातावरण चांगलेच तापले होते.

त्यानंतरच आमदार राजेश विटेकर यांनी शिवसेना शिंदे गटाच्या वतीने आयोजित करण्यात आलेल्या सत्कार कार्यक्रमात दुर्राणींचा संधी मिळताच करेक्ट कार्यक्रम करणार असल्याचे सांगितले होते. त्याची पहिली झलक आता पाहायला मिळाली असून त्यानुसार दुर्राणींना संजय गांधी निराधार योजना कमिटीच्या अध्यक्षपदावरून त्यांनी हटवले.

30 जुलैला पालकमंत्री संजय बनसोडे यांनी नव्याने समिती नेमली आहे. एक ऑगस्ट रोजी जिल्हाधिकारी रघुनाथ गावंडे यांनी पूर्वीची समिती रद्द करून नवीन नियुक्तीचे आदेश काढले आहेत. त्यातून विटेकर यांनी माजी आमदार दुर्राणींना धक्का दिला आहे.

राजेश विटेकर यांच्या शिफारसीनुसार पालकमंत्री संजय बनसोडे यांनी पाथरी तालुका संजय गांधी निराधार समितीवर शिवसेना शिंदे गटाचे आसेफ खान यांची वर्णी लावली. महायुतीच्या सरकारने आमदार असताना बाबाजानी दुर्राणी यांची पालकमंत्री संजय बनसोडे यांच्या शिफारसीवरून 29 फेब्रुवारी 2024 ला पाथरी तालुका संजय गांधी निराधार योजनेचे समितीच्या अध्यक्षपदी निवड केली होती.

दरम्यान, येत्या काळात परभणी जिल्ह्यातील राजकारण यावरून चांगलेच तापण्याची शक्यता आहे. या निवडीनंतर येत्या काळात आता राजेश विटेकर आणि दुर्राणी यांच्यातील संघर्ष पहावयास मिळणार आहे. त्यामुळे सर्वांचे याकडे लक्ष लागले आहे