Praveen Mane : अजितदादांना पुण्यातच मोठा धक्का; इंदापूरचा युवा नेता शरद पवार गटात प्रवेश करणार

Pune, 02 August : लोकसभा निवडणुकीच्या निकालानंतर उपमुख्यमंत्री अजित पवार यांना एका पाठोपाठ एक धक्के बसत आहेत. राज्यातील महत्वाचे नेते साथ सोडून जात असताना आता ज्येष्ठ नेते शरद पवार यांनी पुण्यातच अजितदादांना धक्का दिला आहे.

इंदापूरमधील सोनाई परिवाराचे प्रवीण माने हे उद्या (ता. 03 ऑगस्ट) राष्ट्रवादी काँग्रेस शरदचंद्र पवार गटात प्रवेश करणार आहेत.

पुणे जिल्हा परिषदेचे बांधकाम सभापती म्हणून प्रवीण माने (Praveen Mane) यांनी काम पाहिले आहे. इंदापूर तालुक्यातील राष्ट्रवादी काँग्रेसचे महत्वाचे नेते म्हणून त्यांची ओळख आहे. आगामी विधानसभा निवडणुकीच्या अनुषंगाने हा पक्ष प्रवेश झाल्याचे मानले जात आहे. महाविकास आघाडीत इंदापूरची (Indapur) जागा राष्ट्रवादी काँग्रेस सोडवून त्या ठिकाणाहून प्रवीण माने यांना उमेदवार दिली जाऊ शकते, त्यामुळे राष्ट्रवादी काँग्रेस शरदचंद्र पवार पक्षाचे ते विधानसभेची उमेदवार असू शकतात.

लोकसभा निवडणुकीच्या धामधुमीत प्रवीण माने यांनी राष्ट्रवादी काँग्रेस अजित पवार गटात प्रवेश केला होता. तसेच, इंदापूरच्या दौऱ्यावर आलेले उपमुख्यमंत्री देवेंद्र फडणवीस यांच्या स्वागतासाठीही प्रवीण माने उपस्थित होते. लोकसभा निवडणुकीच्या निकालानंतर अवघ्या काही दिवसांतच त्यांनी शरद पवार गटात प्रवेश करण्याचे संकेत दिले होते.

शरद पवार हे आमच्यासाठी कालही दैवत होते, आज आहेत आणि उद्याही आमच्यासाठी ते दैवत आहेत, असे विधान प्रवीण माने यांनी केले होते. त्यानंतर अवघ्या काही दिवसांतच त्यांनी शरद पवार गटात जाण्याचा निर्णय घेतला आहे. पुण्यात उद्या प्रवीण माने यांचा राष्ट्रचादी काँग्रेस शरदचंद्र पवार पक्षात प्रवेश होणार असल्याची माहिती सूत्रांनी दिली.

दरम्यान, विधानसभा निवडणुकीत ते शरद पवार यांच्या राष्ट्रवादी काँग्रेसचे इंदापूरचे संभाव्य उमेदवार मानले जात आहेत, त्यामुळेच प्रवीण माने यांनी हा निर्णय घेतल्याचे मानले जात आहे. माने यांच्या राष्ट्रवादी काँग्रेस शरदचंद्र पवार पक्षात प्रवेश करण्याचा निर्णय घेतल्यामुळे इंदापूरची राजकीय समीकरणे बदलू शकतात.