Santosh Deshmukh Case : वाल्मिक कराड क्रमांक एकचा आरोपी पण टोळीचा प्रमुख म्हणून दुसऱ्याचं नाव, ही सुटण्याची पळवाट? दमानिया यांचा सवाल

Beed News 03 Mar : मस्साजोगचे सरपंच संतोष देशमुख (Santosh Deshmukh) हत्या प्रकरणाचा तपास सीआयडीकडून सुरू आहे. या प्रकरणी पोलिसांनी दोषारोप पत्र दाखल केलं आहे. ज्यामध्ये खंडणी प्रकरणात आडवे आल्यामुळेच संतोष देशमुख यांची हत्या करण्यात आल्याचं नमूद करण्यात आलं आहे.

या दोषारोप पत्रात वाल्मिक कराडचा उल्लेख आरोपी क्रमांक एक म्हणून करण्यात आला आहे. तसंच कराड हाच मुख्य सूत्रधार असल्याचा उल्लेख देखील करण्यात आला आहे. मात्र, याच दोषारोप पत्रातील एका पानावर टोळीचा प्रमुख सुदर्शन घुले (Sudarshan Ghule) असं लिहिल्याचं समोर आलं आहे.

सामाजिक कार्यकर्त्या अंजली दमानिया (Anjali Damania) यांनी या दोषारोप पत्रातील एका पानाचा फोटो सोशल मीडियावर शेअर केला आहे. ज्यामध्ये त्यांनी चार्जशीटमध्ये टोळीचा प्रमुख सुदर्शन घुले असं का लिहिलं? असं विचारत ही वाल्मिक कराडसाठी सुटण्याची पळवाट आहे का? असा प्रश्न उपस्थित केला आहे.

दमानिया यांनी आपल्या ट्विटमध्ये लिहीलं, "सरपंच संतोष देशमुख हत्या प्रकरणातल्या कालच्या चार्जशीटमध्ये हे कसे आणि का लिहिले गेले? पान ३६ वर “टोळीचा प्रमुख सुदर्शन घुले” असे का लिहिले ? तो टोळीचा प्रमुख कसा? पुढच्या पानावर जरी वाल्मिक कराड (Walmik Karad) नंबर १ वर असले, तरीही हे वाक्य वगळले पाहिजे.

वाल्मिक कराडबद्दल फक्त लिहिण्यात आले की त्यांनी “आता जो कोणी आड येईल त्याला अडवा करावा लागेल” असे त्यांनी सुदर्शन घुले यांना सांगितले आणि “कामाला लागा आणि विष्णु चाटेशी बोलून घ्या “ एवढेच चार्जशीटमध्ये लिहिले आहे.

उद्या वाल्मिक कराड म्हणतील, मी कुठे त्यांना मारा असे म्हटले? ही सुटण्याची पळवाट आहे का?", असे प्रश्न दमानिया यांनी उपस्थित करत वाल्मिक कराडच्या सुटकेचा मार्ग सोप करण्यासाठी हा सर्व खटाटोप चालला आहे का? असा सवाल देखील त्यांनी उपस्थित केल्याचं पाहायला मिळत आहे. त्यामुळे आता यावर देशमुख कुटंबीय काय प्रतिक्रिया देणार हे पाहणं महत्वाचं ठरणार आहे.