Shivsena News: मराठवाड्यातील शिवसेना स्थापनेला आज 41 वर्ष पूर्ण होत आहेत. 8 जून 1985 रोजी मराठवाड्यात शिवसेनेची पहिली शाखा स्थापन झाली. मराठवाड्याची राजधानी म्हणून ओळखल्या जाणाऱ्या छत्रपती संभाजीनगर महापालिकेच्या पहिल्याच निवडणूकीत 27 नगरसेवक निवडून आणण्याची किमया ते थेट महाराष्ट्राच्या मुख्यमंत्री पदावर शिवसैनिकाला बसवण्याची धमक मराठवाड्याच्या या मातीने दाखवून दिली, असे म्हणत शिवसेना नेते आमदार अंबादास दानवे यांनी शिवसैनिकांना मराठवाडा शाखा स्थापना दिनाच्या शुभेच्छा दिल्या.
शिवसैनिकांना शुभेच्छा देताना दानवे यांनी शिवसेनेच्या सामाजिक, सांस्कृतिक आणि विकास कामात दिलेल्या सातत्यपूर्ण योगदानाच्या आठवणींना उजाळा दिला. "8 जून 1985 रोजी मराठवाड्यात शिवसेनेचे पहिले पाऊल पडले आणि छत्रपती संभाजीनगरच्या मातीत एक नवा इतिहास लिहिला गेला. या वर्धापन दिनानिमित्त सर्व आजी-माजी पदाधिकारी, शिवसैनिक आणि युवासैनिकांना मनःपूर्वक हार्दिक शुभेच्छा!" असेही ते म्हणाले.
मराठवाड्यातील शिवसेनेची ऐतिहासिक उपलब्धी आणि योगदान
मराठवाड्याच्या अस्मितेची जागृती: 8 जून 1985 रोजी शिवसेनाप्रमुख बाळासाहेब ठाकरे यांच्या उपस्थितीत मराठवाड्यातील शिवसेनेच्या पहिल्या शाखेची स्थापना झाली. या शाखेने मराठवाड्यातील सामान्य माणसाला, तरुणांना आणि शेतकऱ्यांना अन्यायाविरुद्ध लढण्याची नवी ताकद दिली.
स्थानिक स्वराज्य संस्थांवर भगवा: शाखा स्थापनेनंतर अवघ्या काही वर्षांत 1988 मध्ये शिवसेनेने छत्रपती संभाजीनगर महानगरपालिकेवर ऐतिहासिक विजय मिळवून आपला पहिला महापौर बसवला. हा विजय शिवसेनेच्या ग्रामीण आणि शहरी भागातील मजबूत पकडीची सुरुवात होती.
छत्रपती संभाजीनगर नामकरणाचा लढा: मराठवाड्याची राजधानी असलेल्या या शहराचे नाव 'संभाजीनगर' व्हावे, ही मागणी शिवसेनेने पहिल्या दिवसापासून लावून धरली होती. बाळासाहेबांचे हे स्वप्न आणि शिवसैनिकांचा अनेक दशकांचा संघर्ष अखेर पूर्णत्वास गेला.
शेतकरी आणि कष्टकऱ्यांचे कवच: मराठवाड्यातील दुष्काळ, पाणीटंचाई आणि शेतकऱ्यांच्या आत्महत्या यांसारख्या प्रश्नांवर शिवसेनेने नेहमीच रस्त्यावर उतरून संघर्ष केला. पीक विमा मिळवून देणे असो की कर्जमुक्तीसाठी आंदोलन, शिवसेनेना नेहमीच शेतकऱ्यांच्या पाठीशी उभी राहिली.
मराठवाडा वॉटर ग्रीड आणि पायाभूत सुविधा: मराठवाड्याला दुष्काळमुक्त करण्यासाठी 'मराठवाडा वॉटर ग्रीड' सारख्या महत्त्वाकांक्षी प्रकल्पांची पायाभूत आखणी आणि औद्योगिक विकासाला (DMIC/AURIC) गती देण्यामध्ये शिवसेनेच्या नेतृत्वाचे मोठे योगदान राहिले आहे, याची आठवण अंबादास दानवे यांनी आवर्जून करून दिली.
"8 जून 1985 रोजी पेरलेले हे विचारांचे बीज आज एका अवाढव्य वटवृक्षात रूपांतरित झाले आहे. मराठवाड्याचा विकास, हिंदुत्वाची रक्षा आणि समाजकारण हीच शिवसेनेची ओळख आहे. शिवसेना छत्रपती संभाजीनगर शाखेच्या 41 व्या वर्धापन दिनानिमित्त सर्व शिवसैनिकांना पुन्हा एकदा भगव्या शुभेच्छा! हा वर्धापन दिन आपल्या सर्वांना जनसेवेची आणि संघटनेची नवी ऊर्जा देवो, हीच कामना" अशा भावना दानवेंनी व्यक्त केल्या.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.