Marathwada Teacher Constituency Result : महाविकास आघाडीचे विक्रम काळे चौथ्यांदा विधान परिषदेवर ; भाजप पुन्हा पराभूत..

२५Aurangabad : औरंगाबाद विभाग शिक्षक मतदारसंघातून अपेक्षेप्रमाणे महाविकास आघाडीचे विक्रम काळे (Vikram Kale) हे चौथ्यांदा विधान परिषदेवर निवडून गेले आहेत. त्यांनी भाजप-युतीचे उमेदवार किरण पाटील यांचा ६ हजार ९३७ मतांनी पराभव केला.

काळे यांना २५ हजार ३८० तर किरण पाटील यांना १६ हजार ६८३ मते मिळाली. तर तिसऱ्या क्रमांकावर (Marathwada) मराठवाडा शिक्षक संघाचे अपक्ष उमेदवार सुर्यकांत विश्वाराव हे होते. त्यांना १४ हजार १२८ इतकी मते मिळाली. (Bjp) वंचित आघाडी, कालिदास माने, प्रहारचे संजय तायडे यांचा प्रभाव निवडणुकीत जाणवला नाही.

एकूण १४ उमेदवार निवडणुक रिंगणात होते. महाविकास आघाडी विरुद्ध भाजप अशी थेट लढत होईल असा अंदाज वर्तवण्यात आला होता. परंतु मराठवाडा शिक्षक संघाच्या सुर्यकांत विश्वासराव यांना अनपेक्षितपणे लक्षवेधी मते मिळवली आणि दुहेरी वाटणारी लढत तिरंगी झाली.

पहिल्या पंसतीसाठी २५ हजार ३८६ मतांचा कोटा ठरवण्यात आला होता. परंतु पहिल्या पसंतीत हा कोटा पुर्ण न झाल्यामुळे दुसऱ्या पसंतीची मते मोजण्यात आली. चौदा फेऱ्याच्या मतमोजणी अखेर विक्रम काळे यांचा विजय झाला. मतमोजणीस सकाळी ८ वाजता सुरुवात झाली, ती रात्री उशीरापर्यंत सुरू होती.

विजय दृष्टीपथात असल्याने अधिकृत घोषणा होण्याआधीच महाविकास आघाडीच्या कार्यकर्त्यांनी गुलाल उधळत जल्लोष सुरू केला होता. महाविकास आघाडीचे जिल्ह्यातील नेते यावेळी उपस्थितीत होते. मराठवाडा पदवीधरचे आमदार सतीश चव्हाण, शिवसेनेचे नेते चंद्रकांत खैरे हे दखील या जल्लोषात सहभागी झाले होते.