Yashpal Bhinge News : ...तेव्हा अशोक चव्हाणांच्या पराभवास कारणीभूत ठरलेले यशपाल भिंगे काँग्रेसमध्ये दाखल!

Congress News : लोकसभा निवडणूक 2019मध्ये नांदेड मतदारसंघातून काँग्रेसचे उमेदवार राहिलेल्या अशोक चव्हाण यांच्या पराभवास कारणीभूत ठरलेले, वंचित बहुजन आघाडीचे तत्कालीन उमेदवार यशपाल भिंगे यांनी रविवारी काँग्रेसमध्ये प्रवेश केला आहे. सध्या ते केसीआर यांच्या बीआरएस पक्षात होते. भारतरत्न डॉ. बाबासाहेब आंबेडकर यांच्या जयंती निमित्त यशपाल भिंगे यांनी नागपूर येथील दीक्षा भूमीवर जाऊन अभिवादन केले आणि त्यानंतर काँग्रेसमध्ये प्रवेश केला.

2019च्या लोकसभा निवडणुकीत नांदेड मतदारसंघातून भाजपचे उमेदवार प्रतापराव चिखलीकर विजयी झाले होते, त्यांना 486806 मतं मिळाली होती. तर दुसऱ्या स्थानावर काँग्रेसचे उमेदवार अशोक चव्हाण होते त्यांना 446658 मतं मिळाली होती आणि तिसऱ्या स्थानावर वंचित बहुजन आघाडीचे तत्कालीन उमेदवार यशपाल भिंगे हे होते,त्यांनी 161696 मतं मिळवून, अशोक चव्हाणांच्या पराभवास कारणीभूत ठरले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

कारण, प्रतापराव पाटील चिखलीकर आणि अशोक चव्हाण यांच्या मतांमधील फरक केवळ 40 हजार 148 एवढाच होता. या लोकसभा निवडणुकीनंतर पुढे यशपाल भिंगे यांनी बीआरएस पक्षात प्रवेश केला होता आणि आता ते काँग्रेसमध्ये दाखल झाले आहेत.

नागपूर येथे रविवारी अखिल भारतीय काँग्रेस पक्षाचे राष्ट्रीय अध्यक्ष मल्लिकार्जुन खर्गे यांच्या उपस्थितीत यशपाल भिंगे यांच्या नेतृत्वाखाली मुदखेडचे नगराध्यक्ष राज बहादूर कोत्तवर, उपनगराध्यक्ष लक्ष्मण देवधे, शिंदे गटाचे नागपूर जिल्हाप्रमुख अमोलभाऊ गुजर, नागपूर शिंदे गटाच्या उपजिल्हाप्रमुख मनीषाताई बिडकर, अहमदनगरचे घनःशाम शेलार आणि अनेक कार्यकर्त्यांनी काँग्रेस पक्षात प्रवेश केला.

यावेळी विधिमंडळ पक्षनेते बाळासाहेब थोरात, प्रदेश उपाध्यक्ष नाना गावंडे, अहमदनगरचे जिल्हाध्यक्ष जयंत वाघ, उपाध्यक्ष संपत म्हस्के, उमेश डांगे, इम्रान शेख आदि उपस्थित होते.

(Edited by - Mayur Ratnaparkhe)