Pratap Sarnaik: महायुतीत अजब 'कारभार': मंत्र्याला न विचारताच अधिकाऱ्यांनी घेतला मोठा निर्णय; सामान्यांना फटका

लाडकी बहीण योजनेमुळे सत्तेत आलेल्या महायुतीनं सरकारनं आता लाडक्या बहिणींसह सामान्य प्रवाशांना जोरदार झटका दिला आहे. आधीच महागाईनं बेजार झालेल्या नागरिकांनी एसटी बस भाडेवाढ झाल्यानं संताप व्यक्त केला आहे. परिवहनमंत्री प्रताप सरनाईक यांनी . या भाडेवाढीबाबत मोठा गौप्यस्फोट केला आहे.

"एसटी भाडेवाढीची मला कल्पनाच नव्हती," असं सांगत सरनाईक यांनी महायुती सरकारला घरचा आहेर दिला आहे. प्रताप सरनाईकांनी केलेल्या या विधानामुळे अनेकांच्या भुवया उंचावल्या आहेत.

शुक्रवारी मध्यरात्रीपासून 14.95 टक्के एसटी वाढ करण्यात आली आहे. प्रवाशांनी याबाबत नाराजी व्यक्त केली आहे. काही ठिकाणी सरकारचा निषेध करण्यात आला आहे. धाराशीवचे पालकमंत्री म्हणून प्रताप सरनाईक यांनी ध्वजवंदन केले. त्यानंतर ते माध्यमाशी बोलत होते.

"एसटी भाडेवाढ एकत्रितपणे केली ती प्रशासनातील काही लोकांच्या चुकीमुळे झाली आहे. मलाही भाडेवाढीची कल्पना नव्हती. हा निर्णय प्राधिकरण घेते. मलाही दुसर्‍या दिवशी कळाले. मला ही याचे आश्चर्य वाटले," असे सरनाईक यांनी म्हटलं आहे. सरनाईक यांच्या या विधानामुळे एसटीच्या अधिकाऱ्यांनी मंत्र्यांना न विचारताच भाडेवाडीचा निर्णय घेतल्याचे दिसते.

प्रताप सरनाईक यांनी दोन दिवसांपूर्वी सांगितले होते की, 'वाढलेली महागाई, वाढते इंधन दर यामुळे एसटीवर जवळपास ३ कोटी रुपयांचा बोजा पडत आहे. अशावेळी त्यातून मार्ग काढण्यासाठी एसटीच्या तिकटामध्ये वाढ करण्यात येत आहे. प्रत्येक वर्षी विशिष्ट दरवाढ करणे अपेक्षित असते मात्र मागील काही वर्षांपासून दरवाढ करण्यात आलेली नाही, असे दोन दिवसापूर्वी सरनाईकांनी सांगितले होते.

आज धाराशीवमध्ये सरनाईक म्हणाले, "'मी अधिकाऱ्यांनाही विचारलं एवढी मोठी दरवाढ होते आपल्याला काहीच माहिती नाही. एखादी संस्था चालवायची म्हटल्यावर असे निर्णय घ्यावेच लागतात. यापुढे दरवर्षी ठराविक पद्धतीने कमी वाढ केली जाईल,"