Shashikant Shinde News: वैद्यकीय महाविद्यालयात १ कोटींच्या भंगारावर दरोडा; शशिकांत शिंदेंचा रोख नक्की कोणाकडे?

Satara Politics : ग्रामपंचायत निकालानंतर कोरेगाव विधानसभा मतदारसंघातील राजकारण तापलं आहे. वैद्यकीय महाविद्यालयाच्या जागेत कोरेगावच्या आमदारांच्या कार्यकर्त्यांनी दरोडा टाकत सुमारे एक कोटींच्या किमतीचे स्टील भंगारात विकले, असा आरोप राष्ट्रवादीचे (NCP) आमदार शशिकांत शिंदे (Shashikant Shinde) यांनी केला आहे.

ग्रामपंचायत निकालानंतर राष्ट्रवादीचे आमदार शशिकांत शिंदे आणि शिंदे गटाचे आमदार महेश शिंदे यांच्यात पुन्हा एकदा शाब्दिक युद्ध रंगलं आहे. शशिकांत शिंदे यांनी महेश शिंदेंवर धक्कादायक आरोप केले आहेत. ''महेश शिंदे आणि त्यांच्या कार्यकर्त्यांनी वैद्यकीय महाविद्यालयच्या जागेतील जवळपास १ कोटींच्या किमतीचे स्टील भंगारात विकले, असा आरोप महेश शिंदे यांच नाव नं घेता शशिकांत शिंदे यांनी केला आहे. याबाबत कोणताही शासकीय विभाग याबाबत पुढे येऊन तक्रार करण्यास तयार नाही. यामुळे आता मी स्वत: याबाबच तक्रार देणार आहे आणि माझी तक्रार घेतली नाही तर मी सर्व शासकीय विभागांना न्यायालयात खेचणार आहे, असे दावा त्यांनी सांगितले.

तर दूसरीकडे कुमठ्याची टाकी पाडली, याचं मोठं राजकीय भांडवल करत गुन्हे दाखल करण्यात आले. मात्र, एवढ्या मोठ्या प्रकरणात साधी तक्रार सुद्ध केली गेली नाही हे आश्चर्याची बाब आहे. महेश शिंदे हे सुडबुद्धीचं राजकारण करत असल्याची टिका शशिकांत शिंदे यांनी केली आहे.

महाविद्यालयाच्या जागेतील जवळपास 1 कोटीचे स्टिल भंगारात विकले गेल्यानंतर शासकीय यंत्रणेने तक्रार देणे गरजेचे होते. पण आजपर्यंत या दरोड्याबाबत तक्रार दाखल करण्यात आली नसेल तर हा दरोडा नियोजित आहे का, असा सवालही शशिकांत शिंदे यांनी उपस्थित केला आहे. तसेच जर हा दरोडा नियोजित असेल तर नक्की या दरोड्यात कोणाकोणाचा सहभाग होता, हेही शोधणेही गरजेचे असल्याचे शशिकांत शिंदे यांनी म्हटले आहे. तसेच दरोडा पडल्यानंतर तातडीने तक्रार न दिल्याने सर्वात आधी जबाबदार अधिकाऱ्याचे निलंबन आणि त्याच्यावर कडक कारवाई करणे गरजेचे आहे. याशिवाय यात आणखी कोणाचा समावेश होता, हे पाहणेही गरजेचे असल्याचे शिंद यांनी म्हटलं आहे.