Nagar News : लाचखोर महिला सरपंच पतीसह अटकेत; दहा टक्के कमिशन घेताना ACB ने पकडलं!

Nagar News : महिला सरपंचाला ४० हजार रुपयांची लाच घेताना अहमदनगर लाचलुचपत प्रतिबंधक विभागाच्या अधिकाऱ्यांनी पकडलं. श्रीगोंदा तालुक्यातील कोकणगावात ही कारवाई करण्यात आली. सरपंच उज्वला सतीश रजपूत आणि पती सतीश बबन रजपूत या दोघांना अटक करण्यात आली आहे.

४ लाख ६१ हजार ५६८ रुपयांच्या खर्चातून करण्यात आलेल्या संरक्षण भिंतीच्या कामात दहा टक्के ४६ हजारांच्या लाचेची मागणी केली होती. तडजोडीअंती ४० हजार रुपयांच्या लाचेची रक्कम स्विकारताना कारवाई करण्यात आली.

तक्रारदार हे शासकीय कॉन्ट्रॅक्टर आहे. त्यांनी कोकणगाव ग्रामपंचायत अंतर्गत गावातील रस्ता दुरुस्ती,संरक्षण भिंत बांधकाम अशा कामाचा टेंडर घेतले होते. या कामाचा एकूण खर्च 4 लाख 61 हजार 568 रुपये इतका होता. ठरलेल्या मुदतीत ठेकेदाराने मुदतीत सर्व काम पूर्ण केली होती. मात्र तरीही केलेल्या कामाचे बिल निघण्यास अडचणी येत होत्या.

तक्रारदार यांनी त्यांचे कामाचे बिल अकाउंटला जमा करण्याबाबत सरपंच व त्यांचे पती यांना विनंती केल्यावर त्यांनी एकूण बिलाच्या 10 टक्के प्रमाणे 46 हजार रुपये लाचेची मागणी केली असल्याची तक्रार तक्रारदार यांनी लाचलुचपत प्रतिबंधक विभागाच्या अहमदनगर कार्यालयाकडे 10 जुलैला केली होती.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

सदर तक्रारीच्या अनुषंगाने दिनांक 10 जुलै रोजी कोकणगाव ग्रामपंचायत येथे लाच मागणी पडताळणी केली असता यातील सरपंच उज्वला सतिष रजपूत व त्यांचे पती सतिष रजपूत यांनी तक्रारदार यांच्याकडे 46 हजार रूपयांच्या लाचेची मागणी केली होती. ही लाच रक्कम स्वीकारण्याचे मान्य केले.

बिल जमा झाल्यानंतर काल (गुरुवारी) आरोपी महिला सरपंच उज्वला रजपूत यांनी तक्रारदार यांना लाच रक्कम घेऊन बोलविले असता कोकणगाव ग्रामपंचायत येथे आज (शुक्रवारी) रोजी सापळा लावण्यात आला.

श्रीगोंदा पोलिसांना उज्वला सतिष रजपूत (वय 32 वर्ष) आणि सतिष बबन रजपूत (वय 42) यांना अटक केली आहे. शरद गोर्डे, रमेश चौधरी, बाबासाहेब कराड, सचिन सुदृक, रवी निमसे, संध्या म्हस्के, राधा खेमनर दशरथ लाड यांच्या पथकानं ही कारवाई केली.

(Edited By: Mangesh Mahale)