Ajit Pawar Satara Tour : अजित पवारांचे सातारच्या सीमेवर जंगी स्वागत; गर्दी पाहून धनंजय मुंडे गाडीतच बसले

Satara News : उत्तरदायित्व सभेसाठी पुण्याहून कोल्हापूरकडे निघालेले राष्ट्रवादी काँग्रेसचे राष्ट्रीय अध्यक्ष तथा उपमुख्यमंत्री अजित पवार यांचे सातारा जिल्ह्याच्या सीमेवर शिंदेवाडी (ता. खंडाळा) येथे सातारा राष्ट्रवादी काँग्रेसच्या वतीने जंगी स्वागत करण्यात आले. क्रेनच्या साह्याने भला मोठा पुष्पहार आणि डीजे लावून जेसीबीतून फुलांची उधळण करत स्वागत करण्यात आले. स्वागताची गर्दी पाहून कृषिमंत्री धनंजय मुंडे यांनी गाडीतून न उतरता आतच बसून राहणे पसंत केले. (Ajit Pawar received a warm welcome at the Satara border)

उपमुख्यमंत्री अजित पवार यांच्या स्वागतासाठी सातारा जिल्ह्यात ठिकठिकाणी स्वागत कमानी उभारण्यात आल्या होत्या. विधानपरिषदेचे माजी सभापती रामराजे नाईक निंबाळकर, वाईचे आमदार मकरंद पाटील, फलटणचे आमदार दीपक चव्हाण यांच्यासह मोठ्या संख्येने कार्यकर्ते स्वागताला उपस्थित होते. गर्दीमुळे महामार्गावर अर्धा तास वाहतूक कोंडी झाली होती. स्वागतासाठी उभारलेल्या सभामंडपात सर्व नेते मंडळी उपस्थित होती. पण, राज्याचे कृषिमंत्री धनंजय मुंडे यांनी मात्र गाडीतच बसून राहणे पसंत केले.

राष्ट्रवादी कार्यकर्त्यांनी फुलांची उधळण करत अजित पवार यांचे जंगी स्वागत केले. राष्ट्रवादी काँग्रेसचे खंडाळा तालुका येथील सर्वच पदाधिकारी यांनी गर्दी केली होती. तसेच, शिंदेवाडी ग्रामपंचायतीचे सरपंच व महिलांनी पवार यांचा विशेष सत्कार केला. उपमुख्यमंत्री अजित पवार यांच्या गाडीत बसून मकरंद पाटील हे खंडाळा आणि आनेवाडीकडे रवाना झाले.

उपमुख्यमंत्र्यांचा दौरा असल्याने शिरवळ पोलिसांनी मोठा बंदोबस्त ठेवला होता. मात्र, अजित पवार यांचे आगमन झाल्यावर गर्दीवर नियंत्रण मिळवता मिळवता पोलिसांची दमछाक झाली. अनेक लोकांनी या वेळी पवार यांच्यासोबत फोटो काढण्यासाठी एकच धाव घेतली. यानंतर शिरवळ आणि खंडाळा येथेही स्वागत करण्यात आले. त्यानंतर ते आनेवाडीकडे रवाना झाले.