Akluj Election: मोहिते पाटलांची बालेकिल्ल्यातच दमछाक..!अकलूजमधील दहशत मोडीत काढणार,भाजपच्या माजी आमदाराची गर्जना

Akluj News : सोलापूर जिल्ह्यातील सर्वाधिक लक्षवेधी लढत म्हणून अकलूज (ता. माळशिरस) नगर परिषदेच्या निवडणुकीकडे पाहिले जात आहे. जवळपास 97 वर्षांच्या ग्रामपंचायतीच्या इतिहासात माजी उपमुख्यमंत्री विजयसिंह मोहिते-पाटील, आमदार रणजिसिंह मोहिते-पाटील व खासदार धैर्यशील मोहिते-पाटील यांचे निर्विवाद वर्चस्व राहिले आहे. पालकमंत्री जयकुमार गोरे व माजी आमदार राम सातपुते यांनी मोहिते-पाटलांसमोर त्यांच्याच होम ग्राऊंडवर मोठे आव्हान उभे केले आहे.

सोलापूर जिल्ह्यातील अकलूज हा कायमच मोहित पाटील कुटुंबाचा बालेकिल्ला राहिला आहे. राज्यातील सर्वांत मोठी ग्रामपंचायत अशी अकलूजचा लौकिक होता. आता ग्रामपंचायतीचे रुपांतर नगर परिषदेत झाले असून, या नगर परिषदेची पहिल्यांदाच निवडणूक होत आहे. खासदार धैर्यशील मोहिते पाटील यांनी कोणतीही भूमिका जाहीर न करता ‘थांबा आणि पाहा’ची भूमिका घेतली. त्यांनी हा सस्पेन्स उमेदवारी अर्ज भरण्याच्या शेवटच्या दिवसापर्यंत कायम ठेवला. विजयसिंह मोहिते-पाटील व परिसरातील कुटुंबांचा चार पिढ्यापासून येथील राजकारणाशी संबंध आहे.

अकलूजमधील घरांघरातील व्यक्ती हा मोहिते पाटील यांच्याशी राजकीय, व्यावसायिक, नोकरी अशा वेगवेगळ्या नात्याने जोडलेला आहे. तर, निवडणूक कार्यक्रम जाहीर होताच, ‘अकलूजमधील दहशत मोडीत काढीत भयमुक्त वातावरण निर्माण करणारा असल्याची गर्जना करत भाजप स्वतंत्रपणे निवडणूक लढणार आहोत,’ असे माजी आमदार राम सातपुते यांनी सूचित केले. यादरम्यान, तसेच, भाजप स्वतंत्रपणे निवडणूक लढणार असल्याचे सांगितले. भाजपकडील माने पाटील कुटुंब मोठी भूमिका बजावू शकतात.

राष्ट्रवादीच्या प्रवेशाने रंगत

या निवडणुकीत काँग्रेस, वंचित व महाराष्ट्र विकास सेना यांनीही उमेदवार देऊन नशिब अजमावले आहे. सहा महिन्यांपासून महाराष्ट्र जनसेवा संघटनेच्या माध्यमातून अकलूज नगर परिषदेच्या निवडणुकीची तयारी पद्मजादेवी मोहिते पाटील व धवलसिंह मोहिते पाटील यांनी केली होती. राष्ट्रवादी काँग्रेसचे जिल्हाध्यक्ष उमेश पाटील यांच्या माध्यमातून उपमुख्यमंत्री अजित पवार यांचे नेतृत्व मान्य करत अकलूज नगरपरिषदेत त्यांनी राष्ट्रवादीच्या चिन्हावर उमेदवार उभे केले आहेत.

काँग्रेसने स्वबळाची भाषा केली, मात्र त्यांनी केवळ एकच उमेदवार देता आला आहे. वंचित बहुजन आघाडीने नगराध्यक्ष पदासाठी एक तर नगरसेवक पदासाठी एक असे उमेदवार दिले आहेत. महाराष्ट्र विकास सेनेने नगराध्यक्ष पदासह नगरसेवक पदांसाठी पाच उमेदवार उभे केले आहेत. अपक्ष म्हणून सहा उमेदवार आपले नशीब आजमावत आहेत. या निवडणुकीत राष्ट्रवादी काँग्रेस शरदचंद्र पवार पक्षाने शिवसेना उद्धव ठाकरे तर भाजपने शिवसेनेला सोबत घेतले आहे.

नगराध्यक्षपद अनुसूचित जाती महिलांसाठी राखीव आहे. पालकमंत्री जयकुमार गोरे व माजी आमदार राम सातपुते यांनी मोहिते पाटलांकडून नाराज कार्यकर्त्यांना सोबत घेतले आहे. राष्ट्रवादी काँग्रेसने उच्चशिक्षित उमेदवार दिला आहे. त्यांना धवलसिंह मोहिते पाटील, जनसेवा संघटनेच्या जनसंपर्काचा त्यांना फायदा होईल, असे मानले जाते. नगराध्यक्षपदासाठी राष्ट्रवादी काॅँग्रेस शरदचंद्र पवार पक्षाकडून रेश्मा अडगळे, भाजपच्या पूजा कोतमिरे आणि राष्ट्रवादी काॅँग्रेस (अजित पवार) पक्षाकडून दिव्यानी रास्ते हे प्रमुख उमेदवार आहेत.नगरसेवकासाठी बहुतांश तिरंगी लढती आहेत. काही ठिकाणी चौरंगी तर फक्त एकाच ठिकाणी पंचरंगी निवडणूक आहे. नगराध्यक्षासाठी पाच तर नगरसेवकसाठी ९१ उमेदवार नशीब आजमावत आहेत.

मोहिते कुटुंबातील तीन उमेदवार

राष्ट्रवादी काँग्रेस शरदचंद्र पवार पक्षाकडून शिवतेजसिंह मोहिते पाटील व सयाजीराजे मोहिते पाटील हे दोन उमेदवार तर राष्ट्रवादी (NCP) काँग्रेसकडून उर्वशीराजे धवलसिंह मोहिते पाटील नगरसेवक पदासाठी उभे आहेत.

रणजितसिंह मोहिते-पाटील शांतच

ही निवडणूक खासदार धैर्यशील मोहिते-पाटील यांच्या नेतृत्वाखाली राष्ट्रवादी काँग्रेस शरदचंद्र पवार पक्ष तर राम सातपुते यांच्या नेतृत्वाखाली भाजप लढत आहेत. भाजपचे विधान परिषद सदस्य रणजितसिंह मोहिते-पाटील यांची भूमिका मात्र लोकसभेसारखीच शांत असल्याने भविष्यातील घडामोडींकडे सर्वांचे लक्ष लागले आहे.

भाजपला शिवसेनेचे मोठे आव्हान

• जिल्ह्यातील ११ नगरपरिषदांपैकी मोहोळ, करमाळा, दुधनी, सांगोला आणि अक्कलकोट या पाच नगरपरिषदेत शिवसेनेने भाजपला (BJP) आव्हान दिले आहे. उपमुख्यमंत्री एकनाथ शिंदे यांनी प्रचाराची एक फेरी पूर्णही केली आहे.

• पंढरपुरात भाजपच्या विरोधात तीर्थक्षेत्र विकास आघाडीने, कुर्डूवाडीत भाजपच्या विरोधात राष्ट्रवादी काँग्रेस व शिवसेना उद्धव बाळासाहेब ठाकरे पक्षाने स्वतंत्रपणे आव्हान उभा केले आहे.

• मैंदर्गीत भाजप विरुद्ध स्थानिक आघाडी, मंगळवेढ्यात भाजप विरोधात तीर्थक्षेत्र विकास आघाडी व अपक्ष अशा दोन उमेदवारांचे आव्हान आहे.

• बार्शीत भाजपच्या विरोधात शिवसेना उद्धव बाळासाहेब ठाकरे पक्षाने आव्हान उभा केले आहे.