Patan : सामाजिक विकृतींविरूद्धच्या लढाईस सज्ज रहा : चित्रा वाघ

ढेबेवाडी : 'महिलांच्या आर्थिक सक्षमीकरणात बचतगटांना मोठे महत्व आहे. राज्यात महिला बचतगटांची विविध उत्पादने वर्षातील बाराही महिने विकता येतील अशी योजना लवकरच आणून ती प्रभावीपणे राबविणार असल्याचे भाजप नेत्या चित्रा वाघ यांनी सांगितले. आता शिक्षण व कायद्याच्या शस्त्राने सामाजिक विकृती विरोधातील लढाईसाठी सज्ज राहा, असे आवाहनही त्यांनी महिलांना केले.

तळमावले (ता.पाटण) येथे लोकनेता ते राष्ट्रपिता सेवा पंधरवड्याचे औचित्य साधून कविता कचरे यांच्या मार्गदर्शनाखाली सिताई फाऊंडेशनच्या वतीने आज विविध क्षेत्रात उल्लेखनीय कामगिरी केलेल्या नऊ महिलांना सिताई नवदुर्गा पुरस्काराने सन्मानित करण्यात आले. यावेळी भाजपचे प्रदेश कार्यकारणी सदस्य भरत पाटील, सरपंच शोभाताई भुलुगडे, डॉ.सारिका गावडे, फत्तेसिंह पाटणकर, अमित पाटील, महादेव साळुंखे, डॉ. उमेश गोंजारी, विद्याताई पावसकर उपस्थित होत्या.

चित्रा वाघ म्हणाल्या, 'संघर्ष तुमच्या पाचवीलाच पुजला आहे. आईच्या पोटात असल्यापासून ते सरणावर पोहोचेपर्यंत महिलांच्या जीवनातील संघर्ष संपत नाही. विविध देवींची रूपे तुम्ही आहात पण, आता लढाई वेगळी आहे. समाजातील विकृती विरूद्ध तुम्हाला लढाई लढायची आहे. त्यासाठी शिक्षण व कायदा हिच शस्त्रे तुम्हाला वापरावी लागतील. तुमच्या न्याय, हक्क व संरक्षणासाठी खूप मोठे कायदे आहेत ते अभ्यासा व जाणून घ्या.

आरक्षणाने तुम्हाला सक्षमता व ताकद मिळाली असली तरी आरक्षण बदलल्यावरही तुम्ही कार्यरत राहायला पाहिजे. सध्याचे युग जाहिरातीचे आहे. कोणत्याही उत्पादनात मार्केटिंग व पॅकेजिंगला खूप महत्व असते. त्याचे प्रशिक्षण देवून महिला बचतगटांची विविध उत्पादने वर्षातील बाराही महिने विकता येतील, अशी योजना आम्ही राज्यात लवकरच आणून प्रभावीपणे राबविणार आहोत.' भरत पाटील यांचे भाषण झाले. सीमा घारगे,राधिका पन्हाळे, रोहिणी पाटील, सरिता घारे, विद्या नारकर, रेखाताई देशपांडे, प्रिती गुरव,वनिता शिर्के,दिपाली खोत यांचा पुरस्कार प्राप्त महिलांमध्ये समावेश होता.