Gadhinglaj Election : उमेदवारांचे धाबे दणाणले! गडहिंग्लजमध्ये 'या' प्रभागाची निवडणूक पुढे ढकलली, नेमके कारण काय?

आरक्षण मर्यादा वाढल्यानंतर राज्यातील अनेक नगरपालिकांच्या निवडणुका पुढे ढकलण्यात आले आहेत. त्यामुळे संबंधित नगरपालिकेतील उमेदवारांना धक्का मिळाला असून अनेकांची कोंडी झाली. आता कोल्हापूर जिल्ह्यातील गडहिंग्लज नगरपालिकेतील देखील उमेदवारांचे धाबे दणाणले आहेत.

गडहिंग्लजमधील एका प्रभागाची निवडणूक स्थगित करण्यात आली आहे. राज्य निवडणूक आयोगाच्या आदेशानंतर शहरात खळबळ उडाली असून त्या संदर्भात एका उमेदवाराने घेतलेल्या हरकतीमूळे ही निवडणूक स्थगित करण्यात आली आहे. नगरपालिकेतील प्रभाग क्रमांक 3 'अ' ची निवडणूक स्थगित केली असल्याचे आदेश आज देण्यात आले.

राज्य निवडणूक आयोगाच्या या आदेशानंतर शहरात खळबळ उडाली. गडहिंग्लज शहरातील प्रभाग क्रमांक 3 'अ' ची निवडणूक स्थगित करण्यात आली आहे. या प्रभागातील 3 'ब' ची निवडणूक होणार आहे, अशी माहिती निवडणूक निर्णय अधिकारी तहसीलदार ऋषिकेत शेळके यांच्याकडून देण्यात आली आहे. एका उमेदवाराने घेतलेल्या हरकतीमूळे ही निवडणूक स्थगित करण्यात आली आहे. ही स्थगिती फक्त संबंधित प्रभागातील नगरसेवक पदासाठीची आहे. नगराध्यक्ष पदाला हा निर्णय लागू नाही.

प्रभाग 3 अ' मधून राष्ट्रवादीतर्फे सुजाता संतोष मांगले तर 'जनसुराज्य 'कडून चैत्रा काशिनाथ गवळी या निवडणूक लढवत आहेत. दरम्यान गवळी यांनी उमेदवारी अर्जातील काही रकाने मोकळे ठेवल्यामुळे अपक्ष उमेदवार गौरी चंद्रकांत सावंत यांनी हरकत घेतली होती. मात्र, निवडणूक अधिकाऱ्यांनी हरकत फेटाळल्याने सावंत यांनी जिल्हा न्यायालयात धाव घेतली होती.

न्यायालयानेही त्यांची फेटाळल्याने त्यांनी निवडणुकीत माघार घेतली. दरम्यान, 23 नोव्हेंबर 2025 किंवा त्यानंतर हरकतीवर निकाल झालेल्या नगरपालिका, नगर पंचायतीच्या संबंधित जागेच्या निवडणुका घेऊ नयेत, असे आदेश निवडणूक आयोगाने दिले. त्यानुसार या जागेची निवडणूक स्थगित करण्यात आली आहे.