Maharashtra Co-operative Societies : सहकारी संस्थांच्या निवडणुका कधी? 400 हून अधिक संस्था प्रतिक्षेत

अनेक सहकारी संस्था निवडणुकीच्या प्रतीक्षेत आहेत. 2024 मध्ये तीन वेळा या निवडणुकींना स्थगिती मिळाली. मात्र 31 डिसेंबर रोजी मिळालेल्या तिसऱ्या स्थगितीचा कालावधी संपला आहे. सहकार खात्याकडून पुढील आदेश न आल्याने जिल्ह्यातील सहकारी संस्थेच्या निवडणुका नेमक्या कधी होणार? याबाबत संस्था चालकांसह सभासदांना उत्सुकता लागली आहे.

राजकारणातील पहिला टप्पा म्हणून या निवडणुकांकडे बघितले जाते. मात्र लोकसभा आणि विधानसभा निवडणूक झाल्यानंतर प्रतीक्षेत असलेल्या सहकारी संस्थेच्या निवडणुका केव्हा होणार याची उत्कंठा लागून राहिली आहे.

स्थानिक स्वराज संस्थांच्या निवडणुकांपासून पुढे बॅकांपर्यतच्या निवडणुकापर्यंत निवडणुका म्हणजे राजकारणातील पहिली पायरी होय. कोल्हापूर जिल्ह्यातील प्रमुख काही संस्था आणि छोट्या-मोठ्या जवळपास 400 हून अधिक सहकारी संस्था निवडणुकांच्या प्रतीक्षेत आहेत.

सध्या निवडणुका होणार की नाही याबाबत अनेक तर्क-वितर्क लावले जात आहेत. महापालिका, जिल्हा परिषद यांच्याही निवडणुका झालेल्या नाहीत. त्या तुलनेत सहकारी संस्थांच्या निवडणुका केवळ वर्षभर लाबंल्या आहेत. त्यामुळे खरंच यावर्षात तरी निवडणूक होणार काय? असा प्रश्‍न ग्रामस्थांकडून उपस्थित केला जात आहे.

सहकारी संस्थेच्या निवडणुकीच्या आदेशाला स्थगिती असली की नेमून दिलेल्या तारखेपर्यंतच ती स्थगिती संपते. दुसऱ्या दिवशी पुढील आदेश मिळत असतात. मात्र तीन ते चार दिवस उलटूनही सहकारी संस्थांच्या निवडणुकीबाबत पुढील आदेश आलेला नाही. त्यामुळे निवडणूक होणार आहे की त्याला पुन्हा स्थगिती मिळणार याबाबत संभ्रमावस्था आहे.

आगामी काळात येत्या एप्रिल महिन्यात स्थानिक स्वराज्य संस्थेसह महापालिका जिल्हा परिषद निवडणूक होण्याची शक्यता आहे. या निवडणुकांसाठी सज्ज राहण्याचे आदेश कोणत्याही क्षणी राज्य सरकारकडून येण्याची शक्यता आहे. त्यामुळे या स्थगित मिळालेल्या सहकारी संस्थेच्या निवडणुका पुन्हा स्थगित केल्या जाऊ शकतात, अशी ही शक्यता वर्तवली जात आहे.