प्रचाराच्या धामधुमीत सतेज पाटलांचा झणझणीत कोल्हापुरी मिसळवर ताव!

कोल्हापूर : कोल्हापूर उत्तर विधानसभा पोटनिवडणुकीत (Kolhapur Byelection) दोन्ही बाजूंनी प्रचाराला वेग आला आहे. महाविकास आघाडीच्या (Mahavikas Aagadhi) उमेदवार जयश्री चंद्रकांत जाधव (Jayashree Jadhav) यांच्यासाठी पालकमंत्री सतेज पाटील (Satej Patil) हे कोल्हापुरात तळ ठोकून आहेत, तर भाजप उमेदवार सत्यजित कदमांसाठी महाडिक गटाने कंबर कसली आहे. जाधव यांच्या प्रचाराच्या धामधुमीत गृहराज्यमंत्री पाटील यांनी झणझणीत कोल्हापुरी मिसळवर ताव मारला. तसेच चाय पे चर्चा करत नागरिकांशी संवाद साधला. (During Jayashree Jadhav's campaign, Satej Patil tasted Kolhapuri misal)

पालकमंत्री सतेज पाटील यांनी जयश्री जाधव यांच्या प्रचारार्थ आज (ता. २७ मार्च) सकाळी तोरस्कर चौक, मणेर मस्जिद परिसरात नागरिकांशी संवाद साधला. या वेळी त्यांनी झणझणीत कोल्हापुरी मिसळचा आस्वाद घेत या भागातील नागरिकांशी विकासात्मक कामे आणि विविध बाबींवर चर्चा केली. या वेळी सतेज पाटील म्हणाले की, चंद्रकांत जाधव यांच्या अकाली जाण्याने ही पोटनिवडणूक भारतीय जनता पक्षाने कोल्हापूरकरांवर लादली आहे. आता जयश्री जाधव या आपल्या बहिणीला निवडून आणणे, ही आपल्या सर्वांची जबाबदारी आहे. आपला आशीर्वाद एका बहिणाला देऊन सर्वांनी ही निवडणूक आपली आहे, असे समजून कार्यरत राहावे.

कोल्हापूर शहराच्या सर्वांगीण विकासासाठी आपण कायम कटिबद्ध आहोत. शहराच्या विकासाचा आराखडा आपण तयार केला असून पर्यटनदृष्ट्या शहराच्या विकासासाठी निधी कमी पडू दिला जाणार नाही. तसेच, या परिसरामध्ये असलेला जुना शिवाजी पूल, पंचगंगा घाट सुशोभीकरणाचा देखील आराखडा तयार करण्यात आला असून या परिसरातील नागरिकांच्या सोबत चर्चा करून लवकरच यासाठी निधी उपलब्ध करून दिला जाईल, अशी घोषणाही पालकमंत्री पाटील यांनी केली.

गंगावेश ते शिवाजी पुलाकडे जाणाऱ्या आखरी रस्त्याचे काम गेली अनेक वर्षे प्रलंबित होते. मात्र या रस्त्यासाठी देखील ५० लाखांचा निधी आपण उपलब्ध करून दिल्याचेही पालकमंत्री सतेज पाटील यांनी या वेळी सांगितले.

जाधवांचा मॉर्निंग वॉकसाठी आलेल्या नागरिकांशी संवाद

दरम्यान, रविवारच्या सुटीचे निमित्त साधत उमेदवार जयश्री जाधव यांनीही रंकाळा तलाव परिसरात मॉर्निंग वॉकसाठी आलेल्या नागरिकांशी संवाद साधला. कोल्हापूरचे नैसर्गिक वैभव असलेल्या रंकाळा तलावाच्या मूळ स्वरूपास कोणताही धक्का न लावता, तलावाचे संरक्षण व सुशोभिकरण करण्याचे काम पूर्ण करण्यासाठी संधी द्या, असे आवाहन जयश्री जाधव यांनी केले. रंकाळा तलावाबरोबर कोटीतीर्थ, राजाराम, कळंबा तलावाचाही विकास व्हावा, यासाठी प्रयत्न करणार असल्याचे त्यांनी सांगितले.