Gram Panchayat Election Results : एकच वादा अजितदादा! राज्यात अजित पवार गटाचा डंका; इंदापूरमध्ये हर्षवर्धन पाटलांना धक्का

Maharashtra Gram Panchayat Election Results : राज्यातील २, ३५९ ग्रामपंचायतींचे निकाल लागत आहेत. या निवडणुकीसाठी रविवारी मतदान झाले होते. आणि आज मतमोजणी सुरू असून, निकाल हाती येत आहेत. ग्रामपंचायत निवडणुकांच्या निकालात भाजप, शिंदे गट आणि अजित पवार गट यांच्या महायुतीला मोठं यश मिळताना दिसत आहे. विशेष म्हणजे शिंदे-फडणवीस सरकारमध्ये सहभागी झाल्यानंतरही राष्ट्रवादी काँग्रेसच्या अजित पवार गटाला ग्रामीण भागाची पसंती मिळाली आहे. यामुळे पुणे जिल्ह्यात अजित पवारांचा दबदबा कायम आहे.

ग्रामपंचायत निवडणुकीच्या निकालाने राज्यात राजकीय धुरळा उडाला आहे. उपमुख्यमंत्री अजित पवार यांच्या गटाने राज्यातील १०० हून अधिक ग्रामपंचायतींवर झेंडा फडकवला आहे. भाजप सोबत जाऊनही अजित पवारांचा करिश्मा अजूनही कायम असल्याचं या निकालावरून समोर येत आहे. यामुळे अजित पवार गटात आनंदाचं वातावरण निर्माण झालं आहे. बारामतीमधील १८ ग्रामपंचातींवर अजित पवार गटाचं वर्चस्व असल्याचं समोर आलं आहे.

अजित पवार गटाने इंदापूरमध्ये भाजपच्या हर्षवर्धन पाटील यांनाही जोरदार धक्का दिला आहे. इंदापूरमधील शिंदेवाडी आणि वकीलवस्ती ग्रामपंचायतीवर अजित पवार गटाची एक हाती सत्ता आली आहे. यामुळे वकीलवस्ती आणि शिंदेवाडी गावात माजी मंत्री हर्षवर्धन पाटील यांना मोठा धक्का बसल्याचं मानलं जात आहे.

शिंदेवाडी आणि वकीलवस्ती ग्रामपंचायत राष्ट्रवादीच्या ताब्यात आली आहे. शिंदेवाडी ग्रामपंचायतीच्या सरपंचपदी पल्लवी सौरभ झगडे या विजयी झाल्या आहेत. शिंदेवाडी ग्रामपंचायतमध्ये सरपंचपदासह सदस्यांच्या ९ जागा राष्ट्रवादी काँग्रेसने जिंकल्या आहेत.

वकीलवस्ती ग्रामपंचायतमध्ये सरपंचपदी राष्ट्रवादी काँग्रेसचा झेंडा फडकला आहे. वनिता बाळू भोसले या सरपंचपदी विजयी झाल्या आहेत. वकीलवस्तीच्या नऊ सदस्यांपैकी सहा राष्ट्रवादी, तर तीन भाजपचे उमेदवार विजयी झाले आहेत. बारामती आणि इंदापूर तालुक्यावर उपमुख्यमंत्री आणि राष्ट्रवादीचे दिग्गज नेते अजित पवार यांची पकड घट्ट असल्याचं या निकालांवरून स्पष्ट होत आहे.