२०१९ च्या विधानसभेला भाजप-काँग्रेसची छुपी युती : उद्धव ठाकरेंनी आकडेवारीसहित गणित मांडले

कोल्हापूर : कोल्हापूर उत्तर विभानसभा पोटनिवडणुकीसाठी सध्या प्रचार अंतिम टप्प्यात आला आहे. या दरम्यान आज महाविकास आघाडीच्या उमेदवार जयश्री चंद्रकांत जाधव यांच्या प्रचारार्थ मुख्यमंत्री उद्धव ठाकरे यांनी ऑनलाईन प्रचारसभा घेतली. यात त्यांनी विरोधी पक्ष भाजपवर जोरदार टीका केली. तसेच २०१९ च्या विधानसभा निवडणुकीत कोल्हापूर उत्तरमध्ये भाजप आणि काँग्रेसची छुपी युती झाली असल्याचा आरोप केला. यासाठी त्यांनी २०१४ आणि २०१९ च्या विधानसभा निवडणुकांमधील आकडेवारीचा आधार घेतला.

उद्धव ठाकरे म्हणाले, मी दोन निवडणुकीचे आकडे सांगतो. २०१४ साली एकनाथ रावांचा फोन आला, आपलं जागा वाटपाचं काही जुळतं नाही, आपण स्वतंत्र लढूया. त्यावेळी काय झालं, तर शिवसेनेला मिळाली ६९ हजार ७३६ मत. भाजपला ४० हजार १०४ मत आणि काँग्रेसला मिळाली होती ४७ हजार ३१५ मत. मग २०१९ ला आपली युती झाली. तेव्हा आपल्याला भाजपच्या ४० हजार मतांपैकी सगळीच्या सगळी नाही, पण किमान ३५ हजार, ३०, २५, २० हजार तरी मत मिळालयला हवी होती.

पण त्यावेळी आपल्याला ७५ हजार एकूण मत मिळली. म्हणजे जेमतेम ५ ते ६ हजार मत वाढली. मग युती मधील ही भाजपची ४० हजार मत कुठे गेली. का पंचगंगेच्या दुषित पाण्यासारखी तुमच्या मतांमध्येही प्रदुषण झालं का? काँग्रेसची मत ४७ हजार होती ती ९१ हजार झाली. मग ४० हजार मत तुम्ही फिरवली नाहीत हे कशावरुन? असे उद्धव ठाकरे म्हणाले. त्यामुळे शिवसेना जे करते ते समोरुन करते. पाठीत वार करायची आमची औलाद नाही. होय तर होय आणि नाही तर नाही. आम्ही देशाच्या, राज्याच्या आणि कोल्हापुरच्या हितासाठी जे काही आहे ते उघडपणे करतो. पाठिंबा देतो तो उघडपणे देतो. आम्ही सत्तेसाठी हपापलेलो नाही.

आताही जयश्री जाधव यांना उघडपणे पाठिंबा आहे. त्यामुळे त्या निवडूण येणारचं. याचवेळी उद्धव ठाकरे यांनी २०२४ च्या निवडणुकीमध्ये कोल्हापूर उत्तरवर शिवसेनेचा दावा असल्याचे अप्रत्यक्षपणे स्पष्ट केले. ते म्हणाले, अरे ठिक आहे, गेल्यावेळी काँग्रेस जिंकली, यावेळी काँग्रेस जिंकली. पण युती आणि आघाडी म्हटल्यानंतर पुढे एकत्र जाताना काही घडामोडी घडतात. त्यामुळे पुढे जे काही करायचे आहे ते करायला आपण आहोत ना. बघु कोणमध्ये येते, असे म्हणतंं त्यांनी कार्यकर्त्यांना विश्वास दिला.