Kolhapur Politics : "एकतर्फी प्रेम होत नसतं, जे पेराल तेच उगवणार..."; नाव न घेता महाडिकांचा सतेज पाटलांना डिवचलं

Kolhapur News, 03 Aug : कोल्हापुरातील राजकारणात महाडीक आणि पाटील यांचा वाद सर्वश्रुत आहे. दोन्ही नेते एकमेकांवर टीका करण्याची एकही संधी सोडत नाहीत. अशातच आता पुन्हा एकदा खासदार धनंजय महाडिक यांनी सतेज पाटलांना टोला लगावला आहे.

एकतर्फी कधीही प्रेम होत नसते, तुम्ही विश्‍वासास पात्र असता तर सगळे लोक तुमच्या बाजूने राहतात. शिवाय तुमची जशी काम करण्याची पध्दत असते त्याच पध्दतीने लोक तुमचं मोजमाप करतात.

त्यामुळे तुम्ही जे पेराल तेच उगवणार असा टोला महाडीक यांनी आमदार सतेज पाटील यांना नाव न घेता लगावला आहे. कोल्हापुरात उच्च न्यायालयाचे सर्किट बेंच मंजूर झाल्याबद्दल भाजपच्या वतीने आनंदोत्सवात आयोजिक करण्यात आला होता. यावेळी माध्यमांशी संवाद साधताना त्यांनी हा टोला लगावला आहे.

तसंच यावेळी आपण काम करत राहिलो तर लोक आपल्याला संधी देतात त्यामुळे लगेच नाराज होऊ नका, असा सल्ला देखील त्यांनी कार्यकर्त्यांना दिला आहे. ते म्हणाले, राजकारणात नाराज व्हायचे नसते, पण ते खूप नाराज झालेत. अपयशाने खचून जायचे नसतं. आम्हीही निवडणुकीत पराभूत झालो आहे. पण आम्ही खचलो नाही. काम करत राहिलो.

लोकांमध्ये काम करत राहिलो तर लोक आपल्याला संधी देतात. त्यामुळे लगेच नाराज होऊ नये, त्यांनी काम करत राहावे. आपण टोलचा प्रश्न मार्गी लावला. त्याचप्रमाणे सर्किट बेंचचा शब्द खरे करण्याचे काम मुख्यमंत्री देवेंद्र फडणवीस आणि उपमुख्यमंत्री एकनाथ शिंदे, अजित पवार यांनी केलं आहे.

यामध्ये मंत्री चंद्रकांत पाटील यांचे मोलाचे योगदान असून जिल्ह्याच्या विकासाला निधी देणारे हे सरकार आहे. त्यामुळेच कोल्हापूरसह इचलकरंजी महापालिकेवर महायुतीची सत्ता येणार यात शंका नाही, असा विश्वासही महाडीक यांनी यावेळी व्यक्त केला.