Satej Patil Politics : सतेज पाटलांनी लंगोट बांधला, मैदानही मारणार; शड्डू ठोकत म्हणाले, 'तर लढाई मलाच...'

Satej Patil News : विधानसभा निवडणुकीत कोल्हापूर जिल्ह्यात काँग्रेस पक्षाची धुळधाण उडाली. एकाही जागेवर पक्षाला विजय मिळवता आला नाही. त्यातच महायुतीमध्ये मोठ्या प्रमाणात इन्कमिंग होत असून माजी आमदार पी एन पाटील यांचे पुत्र राहुल पाटील, राजेश पाटील राष्ट्रवादी काँग्रेसच्या मार्गावर आहेत. राहुल पाटील विधानसभा निवडणुकीत करवीरमधून उमेदवार होते. मात्र तेच आता साथ सोडून जाण्याच्या तयारीत आहे.

कोल्हापूर जिल्ह्यात एकामागून एक मोठे धक्के बसत असताना सतेज पाटील हे मैदानात उतरले आहेत. राहुल पाटील, राजेश पाटील यांनी पक्ष सोडू नये असे आवाहन त्यांनी केले आहे. हे आवाहन करत असताना त्यांचा जाण्याचा निर्णय ठाम असल्यास जिल्हा परिषद आणि पंचायत समितीच्या निवडणुकीत काँग्रेस पक्षाचा जिल्हाध्यक्ष म्हणून ती लढाई मलाच लढावी लागेल, असे म्हणत सतेज पाटली शड्डू ठोकत निवडणुकीच्या मैदानात उतरले आहेत.

काँग्रेस कमिटीच्या जिल्हा आणि शहर कार्यालयात जिल्हा परिषदेच्या शिंगणापूर, कुडित्रे आणि शिये मतदारसंघातील काँग्रेस पदाधिकारी आणि कार्यकर्त्यांनी आमदार सतेज पाटील यांच्याशी चर्चा करण्यासाठी घेतलेल्या बैठकीत सतेज पाटील यांनी जे सोबत असतील त्यांना घेऊन लढणार असल्याचे स्पष्टच सांगितले.

राहुल पाटील, राजेश पाटील हे काँग्रेससोबत राहिले तर करवीरची जबाबदारी त्यांच्यावर असेल हे स्पष्ट केले मात्र जर त्यांचा जाण्याचा निर्णय ठाम असेल तर आपणच मैदानात उतरून आगामी स्थानिक स्वराज संस्थेच्या निवडणुकीत जिल्हा परिषद, पंचायत समितीच्या निवडणुकीत काँग्रेसचा जिल्हाध्यक्ष म्हणून जबाबदारी घेऊ, असे सतेज पाटील यांनी स्पष्ट केले.

काँग्रसेसोबत राहिले पाहिजे...

शरद पवारांनी राष्ट्रवादी काँग्रेसची स्थापन केली. त्यावेळी काँग्रेसमध्ये फूट पडत त्यावेळी दिग्विजय खानविलकर, हसन मुश्रीफ हे काँग्रेसमधून राष्ट्रवादी पक्षात गेले. मात्र, दिवंगत आमदार पी. एन. पाटील हे काँग्रेससोबत एकनिष्ठ आणि ठामपणे राहिले. शेवटपर्यंत ते काँग्रेससोबतच होते. त्यांच्या निष्ठेचा आदर्श राहुल, राजेश पाटील यांनी घ्यावा, असे आवाहन देखील सतेज पाटलांनी केले.