Amol Kolhe : मराठा समाजाला ओबीसीतून आरक्षण मिळावे का? अमोल कोल्हेंनी स्पष्टच सांगितलं...

Maharashtra Political News : मराठा समाजाला ओबीसीतून आरक्षण मिळवण्यासाठी आंदोलक मनोज जरांगे आग्रही आहेत. आता शांतता रॅलीती त्यांनी 29 ऑगस्टपर्यंत सग्या सोयऱ्यांची अंमलबजावणी करण्याचे सरकारला आवाहन करत आहेत. या पार्श्वभूमीवर मराठा समाजातील कार्यकर्तेही आक्रमक झाले आहेत.

ते प्रत्येक नेत्याना मराठा आरक्षणाबाबत भूमिका विचारत आहेत. आतापर्यंत राज ठाकरे, नाना पटोले, शरद पवार Sharad Pawar यांनाही समजाने जाब विचारले आहेत. आज कार्यकर्त्यांनी खासदार आमोल कोल्हेंना अडवून जाब विचारला.

मराठा आरक्षणाचा मुद्दा आता चांगलाच तापला आहे. विविध जिल्ह्यात मराठा समाजाचे आंदोलक राजकीय नेत्यांना आरक्षणाबाबत त्यांची भूमिका काय, असा जाब विचारत आहेत. शरद पवारांच्या राष्ट्रवादी काँग्रेसची शिवस्वाराज्य यात्रा सोलापूरात दाखल झालेली आहे. त्यासाठी आलेल्या खासदार अमोल कोल्हे यांना मराठा समर्थकांनी अडवून आरक्षणाबाबत त्यांची भूमिकेबाबत प्रश्न केला.

मोहोळ येथील सभा संपल्यानंतर अमोल कोल्हे सोलापूरकडे जात होते. त्यावेळी मराठा बांधवांनी त्यांचा ताफा अडवला. त्यावेळी एक मराठा-लाख मराठा अशा घोषणा देत आंदोलकांनी खासदार कोल्हेंना मराठा आरक्षणाबाबत प्रश्न केला.

कोल्हे Amol Kolhe म्हणाले, मराठा आरक्षणाला आमचा 100 टक्के पाठिंबा आहे. माझी आणि मनोज जरांगे पाटील यांची चांगली ओळख आहे. त्यांना माझ्या भूमिकेबाबत माहिती आहे. त्याबाबत तुम्ही मनोजदादांना विचारू शकता. तसेच, पवार साहेबांनी कालच पक्षाची भूमिकाही स्पष्ट केलेली आहे, असे म्हणत कोल्हेंनी आंदोलकांची समजूत काढली.

दरम्यान, सोलापूर दौऱ्यात मनसे प्रमुख राज ठाकरे Raj Thackeray यांनी राज्यात आरक्षणाची गरज नसल्याचे म्हटले होते. त्यावरून आक्रमक झालेल्या मराठा आंदोलकांनी धाराशिव आणि बीड येथे राज ठकारेंना घेरले होते. तसेच शरद पवारांच्या सभेतही मराठा आंदोलक आक्रमक झाल्याचे पाहायला मिळाले.

काँग्रेसचे प्रदेशाध्यक्ष नाना पटोले Nana Patole यांचीही मराठा समाजाने कोंडी केली होती. त्यामुळे विधानसभा निवडणुकीच्या पार्श्वभूमीवर राज्यभर दौरे करणाऱ्या नेत्यांना मराठा आंदोलक त्यांची भूमिका स्पष्ट करण्यास भाग पाडत असल्याचे चित्र दिसून येत आहे.